بارشاعا ورتاق مىندەت

جينالعاندار الدىندا ءسوز العان «قازاق ءتىلى مەن مادەنيەتى» قوعامدىق بىرلەستىگىنىڭ توراعاسى مەيرامبەك كيىكوۆتىڭ كوتەرگەن ماسەلەلەرى اسەرلى شىقتى. ول ءوزىنىڭ بايانداماسىندا مەملە­كەتتىك ءتىلدىڭ ماڭىزىن اشا وتىرىپ, وزگە ەتنوس وكىلدەرىنىڭ مەملەكەتتىك ءتىلدى يگەرۋى تيىستىگىن ەرەكشە اتادى. ال «شاڭىراق» تىلدەردى وقىتۋ ورتالىعىنىڭ مۇعالىمى راۋشان حاسەنوۆا ءوزىنىڭ «ءتىل تاعدىرى – ەل تاعدىرى» اتتى بايانداماسىندا مەملەكەتتىك ءتىلدىڭ تاعدىرشەشتى ءرولىن اشىپ كورسەتۋگە تىرىستى. سوندىقتان دا بۇل ءتىلدى قازاق بالالارىمەن قاتار وزگە دە ەتنوس وكىلدەرى ەركىن مەڭگەرۋى كەرەكتىگىنە ەرەكشە دەن قويدى. 

كوكشەتاۋ قالاسىنداعى پولياك ءبىلىم بەرۋ ورتالىعىنىڭ ەرىكتى-مۇعالىمى بولىپ جۇرگەن رەناتا شەنياۆسكا قازاقستان مەن پولشا اراسىنداعى ءبىلىم بەرۋ سالاسىنداعى ىنتى­ماق­تاستىق جايى­ن ءسوز ەتتى. رەتى كەل­گەندە رەناتا حانىم پول­شاداعى تىلدەردى دامىتۋ ورتا­لى­عىنىڭ باسشىلىعى  تاراپىنان قازاقستانعا ارنايى جىبەرىلگەنىن ايتا كەتۋ كەرەك. جانە دە ونىڭ دوستىق ۇيىندەگى جارىق تا جىلى كابينەتتەردە بالالارعا پولياك ءتىلىن ۇيرەتۋ ءۇشىن كەلۋىنە «اقمولا وبلىسى پولياكتارىنىڭ بىرلەستىگى» قوعامدىق بىرلەستىگىنىڭ توراعاسى الەكساندر سۋحوۆەتسكي قولۇشىن بەرىپتى. قازىرگى تاڭدا 70-كە تارتا وقۋشى, سونىڭ ىشىندە ەرەسەكتەرى دە بار جەتى توپقا ءبولىنىپ, پولياك ءتىلىن مەڭگەرۋدە كورىنەدى.

قازاق ءتىلىن جەتىك مەڭگەر­گەندىگىمەن وڭىرگە تانىمال كوك­شەتاۋ قالاسىنداعى №21 ورتا مەكتەپ وقۋشىسى ەليزاۆەتا بيبريح جينالعانداردى ءتانتى ەتتى. ول ءبىر كەزدەرى اقيىق اقىن مۇقاعالي ماقاتاەۆتىڭ ولەڭدەرىن جاتقا وقىپ رەسپۋبليكالىق «مىڭ با­لا» مادەني-اعارتۋشىلىق جو­باسىنىڭ جەڭىمپازى بولعان ەدى. «اقمولا وبلىسىنىڭ تاتار­لارى مەن باشقۇرلارى بىرلەس­تىگى» قوعامدىق بىرلەس­تىگىنىڭ توراعاسى رافايل سۋلكار­ناەۆ­تىڭ, اقمولا وبلىسى اكىمى اپ­پا­راتى جانىنداعى «قوعام­دىق كەلىسىم» كمم باسشى­سى­نىڭ ورىنباسارى مانات ىسما­عۇلوۆتىڭ جانە تىلدەردى وقىتۋ مەك­تەبىنىڭ جەتەكشىسى كۇل­تاي كارىمجانوۆالاردىڭ جا­سا­­عان باياندامالارى ەشكىمدى بەيجاي قالدىرمادى. بۇل رەتتە «قوعامدىق كەلىسىم» كمم ءادىس­تەمە ءبولىمىنىڭ باسشىسى تات­يانا پياتكوۆا ءوز كەزەگىندە ەلىمىز­دىڭ بارلىق وڭىرىندە باس­تاۋ العان قازاقستان حالقى اسسام­بلەياسىنىڭ رەسپۋبليكالىق «مىڭ بالا» تىلدەردى وقىتۋ جوباسىنا ەرەكشە توقتالدى. وسىلايشا اتالعان شارا ءوز دەڭگەيىندە ءوتىپ, ءوڭىر­دە مەملەكەتتىك ءتىلدىڭ قان­شا­لىقتى مەڭگەرۋ قاجەتتىگىن تا­عى ءبىر تابان جاقىنداتقانداي بول­دى.

اسقار تۇراپباي ۇلى, «ەگەمەن قازاقستان»