تالتىرەكتەپ تاعى دا بىزگە قىزمەت ەتۋ ءۇشىن اۋىستىرعان ءلازىم. كولىك سايمانىن ساتاتىن دۇكەندەردى ارالاپ شىقتىق. ارزانىن ىزدەيمىز. دۇنيەنى ءدۇر سىلكىندىرگەن دوللاردىڭ قىمباتتاۋى سايمان الۋشىلاردىڭ ساعىن سىندىرىپ تۇر. دۇكەندەگىلەر «ءبىز قوسالقى بولشەكتەردى دوللارمەن ساتىپ الامىز, سايمان سودان سوڭ قىمبات», دەيدى. ءبىر دۇكەندە ەكى يىعىنا ەكى كىسى مىنگەندەي جيرەن ساقال پەتكا ەكى تەتىكتى قاتار ۇسىندى. «ءبىرى قىتايدىكى, 17 مىڭ تەڭگە تۇرادى. ال, مىناۋ دا سول قىتايدان, بىراق, بۇل زاۋىتتان شىققان. ساپاسى جاقسى, باعاسى 26 مىڭ تەڭگە», دەگەن. مەنىڭ ەسكى ماشينامنىڭ ءجۇرىپ كەتۋىنە تىلەكتەس پەتكا قايتا-قايتا اۋىستىرىپ اۋرە بولعانشا, قىمباتىن العان ءجون عوي, دەيدى.
الگى تەتىكتىڭ ەكەۋى بىردەي ءتارىزدى. ەكى جىلدا ءبىر-اق رەت قوزدايتىن اپامنىڭ ۇيىندەگى بوز قويدىڭ ەگىز قوزىسى ءتارىزدى.
قۇداي تىلەۋىڭدى بەرگىر پەتكانىڭ تەگىن اقىلىن تىڭداپ, قىمباتىن الدىق. ءويتكەنى, اۋىستىرۋدىڭ ءوزى تەتىكتىڭ قۇنىنان قىمبات. ەندى اس ىشۋگە جاراعانمەن, سايمان اۋىستىرۋعا جارامايتىن قولىمىزدى قالتامىزعا سالىپ, تەحنيكالىق قىزمەت كورسەتەتىن ستانسا ىزدەدىك. تاپتىق. مۇنىڭ ىشىندە دە تولعان پەتكانىڭ قانداستارى ەكەن. شارۋا ءتامام بولعان سوڭ ابدەن توزىپ, جىلتىراپ قالعان دوڭعالاقتاردى دا اۋىستىرىپ الماقشىمىز. تاز دوڭعالاقپەن تايعاناقتاپ جۇرە المايسىڭ. دوڭعالاق ساتىپ تۇرعاندار دا سولتۇستىكتەگى سامساعان قاراعايداي سول ۇلتتىڭ وكىلدەرى ەكەن. ەندى قالعانى وڭاي. العان دوڭعالاقتى اۋىستىرىپ الۋ عانا. باردىق. ءاپ-ساتتە ءار دوڭعالاقتى 1,5 مىڭ تەڭگەدەن ساشكا مەن كولكا كوزدى اشىپ-جۇمعانشا اۋىستىرىپ بەردى. ءبىزدىڭ جىرتىق قالتانىڭ تۇبىندە قالعان التى مىڭ تەڭگە ساشكانىڭ ءبۇتىن قالتاسىنا اۋىستى.
ۇيگە قايتتىق. كوكشەتاۋ قالاسىنداعى كەنەسارى كوشەسىنىڭ بويىندا توبەسىنە قاراساڭ توبەڭدەگى قالپاعىڭ كوگەرشىننىڭ قاناتىنداي قالىقتاپ جەرگە تۇسەتىن ءتورت بىردەي مەيرامحانا بار. اۋەلى بىرەۋىنىڭ جانىنان وتتىك. جۇمىس كۇنى بولسا دا توي ءوتىپ جاتىر ەكەن. ەسىگىنىڭ الدى تولعان قازاق. ادەمى اق كوستيۋم كيگەن, جارقىراعان گالستۋك بايلاعان قوزى قارىن بىرەۋ اڭگىمە ايتىپ تۇر ەكەن. قىزىق اڭگىمە شىعار, ماڭايىنداعىلار ۇيىرىلە تىڭداپ تۇر. كەلەسى مەيرامحانانىڭ الدىندا دا ءدال وسىنداي كورىنىس. ءۇشىنشى, ءتورتىنشىسى دە سول...
دۇنيەنى داعدارىس ۇيقى-تۇيقى قىلىپ تۇر دەيسىز ءسىز, ال, ءبىزدىڭ قازاق قۇدايعا شۇكىر, تويدا ءجۇر.
بايقال ءبايادىلوۆ
اقمولا وبلىسى