جانكۇيەرلەر تارتىستى باسەكەنىڭ كۋاسى بولدى. ارمەنيا قۇراماسى ويىن باستالا سالا العا ۇمتىلىپ, جەرلەستەرىمىزدى قىسپاققا الۋمەن بولدى. الايدا, ارمياندار ساپىنان نەگىزگى ويىنشىلاردىڭ ءبىرى كەۆورگ گازاريان العاشقى شابۋىلداردىڭ بىرىندە-اق قاقپاشى داۆيد لوريامەن دوپقا تالاستا جاراقات الىپ, الاڭنان كەتۋىنە ءماجبۇر بولدى.
كەزدەسۋدىڭ ءبىرىنشى تايمىندا الاڭ يەلەرى ساپىنان گەنريح محيتاريان, قازاقستان قۇراماسىنان ەركەبۇلان تۇڭعىشباەۆ سىندى فۋتبولشىلاردىڭ ەسەپ اشاتىن مۇمكىندىكتەرى بولعان, بىراق ساتتىلىك جەتىسپەدى.
الەكساندر بوروديۋكتەن جاڭا نۇسقاۋ العان فۋتبولشىلارىمىز ماتچتىڭ ەكىنشى بولىگىن شيراق باستادى. دوپقا كوبىرەك يەلىك ەتىپ, ارا-تۇرا قاۋىپتى شابۋىلدار دا ۇيىمداستىردى. الايدا, 64-مينۋتتا جاعداي كۇرت وزگەرىپ سالا بەردى. سەرگەي مالىي گەنريح محيتاريانعا قارسى ويىن ءتارتىبىن بۇزعانى ءۇشىن ەكىنشى سارى قاعازىن الىپ, الاڭنان قۋىلدى. مىنە, وسىدان كەيىن قورعانىسىمىز دا سىر بەرە باستادى. الاڭ يەلەرى ەمىن-ەركىن شابۋىلعا كوشتى. ناتيجەسىندە, 73-مينۋتتا ەسەپ اشىلدى. گەنريح محيتاريان ەكى-ءۇش فۋتبولشىنىڭ اراسىنان داۆيد لوريانىڭ قاقپاسىن ءدال كوزدەپ, ءوز ۇجىمىن العا شىعاردى. كوپ ۇزاماي ارمەنيالىقتار جەرلەستەرىمىزدى ەكىنشى مارتە قاپى قالدىردى. 75-مينۋتتا وڭ قاپتالدان اۋەلەي كەلگەن دوپتى اراز وزبيليز توقتاتپاستان قاقپاعا تۋرا باعىتتادى. ەسەپ 0:2.
وسىلايشا, الەكساندر بوروديۋكتىڭ قازاقستان قۇراماسىمەن العاشقى رەسمي ويىنى جەڭىلىسپەن اياقتالدى. وتانداستارىمىز 2 ۇپايمەن ە توبىندا كوش سوڭىندا, ياعني 6-ورىندا كەلەدى. ال ەنشىسىندە 6 ۇپايى بار ارمەنيا – 5-ورىندا.
ايان ءابدۋالي, «ەگەمەن قازاقستان»