قوعامداعى تالاي-تالاي ويلى تاقىرىپتاردى قوزعاپ جۇرگەن ايقىندىقتار باسىلىمنىڭ مەرەيتويىن جوعارعى دەڭگەيدە اتاپ ءوتتى. Aikyn media open دەپ اتالعان شاحمات تۋرنيرىنە جالپى سانى 30 ادام قاتىستى. قالامى قارىمدى تىلشىلەر, ايتۋلى بلوگەرلەر, جۋرناليستيكا سالاسىنىڭ مايتالمان ارداگەرلەرى دە بۇگىنگى دودادان تىس قالعان جوق. ويىن كوپشىلىككە بەلگىلى شۆەيتسار ۇلگىسىندە ءوتتى. بارلىق 7 تۋردا جينالعان ۇپاي ساندارى ەسەپتەلىپ, ۇزدىكتەر انىقتالدى. وسىعان دەيىن باق وكىلدەرى اراسىندا وتكىزىلگەن بىرنەشە تۋرنيردە توپ جارعان «ۇيعىر اۆازي» رەسپۋبليكالىق قوعامدىق-ساياسي گازەتىنىڭ ءتىلشىسى ارسلان الاحۋنوۆ بيىك تۇعىردان كورىنىپ, Air Astana اۋەكومپانياسى ارقىلى تەگەرانعا بيزنەس-كلاسقا ەكى ۇشاق بيلەتىن ۇتىپ الدى. وسىلايشا, باس جۇلدە رەتىندە بەرىلگەن قوس بيلەتپەن جەڭىمپاز وسى جىلدىڭ سوڭىنا دەيىن ءوزى قالاعان كۇنىندە يران استاناسىنا بارۋعا مۇمكىندىك الدى. شاحماتتان I رازرياد يەگەرى قۋانىش سۇلەيمەن ەكىنشى ورىندى ەنشىلەپ, «كەرنەۋ Limited» كومپانياسىنىڭ اتىنان تىگىلگەن پلانشەتكە يە بولدى. تارتىستى دودادا ءۇشىنشى ورىن يەگەرىن انىقتاۋ ءسال قيىنعا سوقتى. جالپى, جارىس قورىتىندىسى بويىنشا ۇپاي سانى تەڭ تۇسكەن قۇمار باقداۋلەت, اسقات بايپەيىسوۆ, نۇربەك ءتۇسىپحان, قانات قاماتاەۆ سىندى ءتورت بىردەي جۋرناليسكە ءۇشىنشى ورىن بۇيىردى. دەگەنمەن باسقالاردان كوەففيتسيەنت بويىنشا دارالانعان قۇمار باقداۋلەتكە قوسىمشا سىيلىق رەتىندە پلانشەت تابىستالدى.
– گازەتىمىز بيىل ءبىر مۇشەلگە كەلىپ وتىر. وسى ايتۋلى مەرەكەنى قالاي وتكىزسەك دەپ كوپ ويلاندىق. ناتيجەسىندە, شاحماتتان تۋرنير وتكىزۋگە بەل بايلادىق. بۇل ارقىلى جۋرناليستەردىڭ قولىنان شاحمات ويناۋ كەلەتىنىن كورسەتىپ, مىقتىلار ويىنىن كەڭىرەك ناسيحاتتاعىمىز كەلدى. ەلىمىزگە بەلگىلى جاس شاحماتشى جانسايا ابدىمالىكتىڭ شاحمات اكادەمياسى اشىلدى. ۇسىنىسىمىزدى جەرگە تاستاماي, وسى جەردە ءوتكىزۋىمىزگە كەلىسىم بەردى. وسى شارانىڭ وتۋىنە اتسالىسقان بارشا جاندارعا العىس بىلدىرگىمىز كەلەدى.ءتۋرنيردى الداعى ۋاقىتتا ءداستۇرلى تۇردە ۇيىمداستىرىپ تۇرامىز دەگەن جوسپارىمىز بار, – دەيدى «ايقىن» گازەتىنىڭ باس رەداكتورى نۇرتورە ءجۇسىپ.
«شاحمات» – ويىنداردىڭ تورەسى. ءوز تاراپىمنان ايتار ۇسىنىسىم بار. «ايقىن» گازەتىنىڭ ۇجىمى كەلەر جىلى تاعى وتكىزەتىن بولسا ءتۋرنيردى تاكەن الىمقۇلوۆتىڭ قۇرمەتىنە قويسا ەكەن. ويتكەنى قالامگەر-جۋرناليستەر اراسىندا ءدال تاكەن اعاعا تەڭ كەلەر قارسىلاس بولماعان. ءوز ارامىزدا كىشىگىرىم سايىستار ءجيى ءوتىپ تۇرادى. ارداگەر بولساق تا, مۇمكىندىگىنشە قاتىسامىز. يگى باستاما الداعى ۋاقىتتا دا جالعاسا بەرسە يگى», − دەيدى تۋرنيرگە قاتىسقان ارداگەر-جۋرناليست ايان نىسانالين.
سايىس سوڭىندا بارلىق قاتىسۋشىلار مەن قوناقتارعا نۇرتورە ءجۇسىپتىڭ «مىڭ قۇمىرسقا جانە ءبىز» كىتابى مەن ەرماحان شايحىنىڭ «قوڭىر قاجىنىڭ كۇندەلىگى» كىتابى ۇلەستىرىلىپ بەرىلدى.
ارمان وكتيابر, «ەگەمەن قازاقستان»
الماتى