بۇل كۇندە قاراعاندى ءوڭىرى جەردى پايدالانۋ مەن ونى قورعاۋ ماقساتىندا قانداي ءىس-شارالاردى جۇزەگە اسىرۋدا؟ مەملەكەتتىك باقىلاۋدىڭ قاراعاندى وبلىسى بويىنشا ءناتيجەلەرى قانداي؟ كىمنىڭ جەرى ءوڭدەلىپ, كىمنىڭ جەرى ءشول بولىپ جاتىر؟ جۋىردا قاراعاندى وبلىسىنىڭ جەردiڭ پايدالانىلۋى مەن قورعالۋىن باقىلاۋ باسقارماسى «وبلىستا مەملەكەتتىك جەرلەردى پايدالانىلۋى مەن كورعالۋى» تاقىرىبىندا بريفينگ وتكىزدى.
باسقارما باسشىسى ساياش احمەتوۆتىڭ مالىمدەۋىنشە, جەكە جانە زاڭدى تۇلعا, مەملەكەتتىك ورگاندار بويىنشا 2016 جىلى 1894 ءوتىنىش, ارىز جانە سۇرانىس حاتتار قاراستىرىلعان. ەسەپتى كەزەڭدە 520 تەكسەرۋ ءىس-شارالارى 617,1 مىڭ شارشى شاقىرىم كولەمىندە جۇرگىزىلگەن.
تەكسەرۋ ناتيجەلەرى بويىنشا 563,1 شارشى شاقىرىم جەر كولەمىندە 435 زاڭ بۇزۋشىلىقتار انىقتالىپ, 180 زاڭدى جانە جەكە تۇلعالارعا قاتىستى 37,7 ملن تەڭگە اكىمشىلىك ايىپپۇل سالىنعان.
مەملەكەتتى اۋىل شارۋاشىلىعى ماقساتىنداعى جەرلەردى ۇتىمدى ءارى ءتيىمدى پايدالانۋ جاعى الاڭداتادى. ساياش احمەتوۆتىڭ بايانداماسىندا ايتىلعانداي, جەر تەلىمدەرىن تۇگەندەۋ بارىسىندا وبلىس بويىنشا 260 اۋىلشارۋاشىلىق سۋبەكتىلەرىنىڭ جالپى الاڭى 533,1 مىڭ گەكتار جەرىنىڭ پايدالانىلماي جاتقانى انىقتالعان جانە ءتيىمسىز پايدالانىلعان القاپتارعا تەكسەرىس جۇرگىزىلگەن. قاداعالاپ تەكسەرۋ ناتيجەسىندە اۋىل شارۋاشىلىعى ماقساتىنداعى الاڭى 46,9 مىڭ شارشى شاقىرىم جەردەگى 11 سۋبەكتى جەر زاڭىن بۇزۋىن توقتاتقان.
قابىلدانعان شارالاردىڭ ءناتيجەسىندە, 88,5 مىڭ شارشى شاقىرىم بولاتىن كۇتىمسىز قالعان تىڭ جەرلەر اۋىل شارۋاشىلىعى اينالىمىنا ەنگىزىلگەن. ول وبلىستاعى جالپى ەگىستىككە جارامدى جەرلەردىڭ 22,7 پايىزىن قۇرايتىن كورىنەدى. نەگىزىنەن مۇنداي جاعدايدا قۇقىقتىق ءتۇسىندىرۋ جۇمىستارى ءجۇيەلى جۇرگىزىلگەنى دۇرىس. ول رەتتە باسقارما تاراپىنان ءبىرشاما ناقتى قادامدار جاسالعان. بىلتىرعى جىلدىڭ 28 قاراشاسى مەن 2 جەلتوقسانى ارالىعىندا ءتۇسىندىرۋ توبى اباي, قارقارالى, نۇرا, وساكاروۆ جانە ۇلىتاۋ اۋداندارىندا وسى باعىتتاعى جۇمىستاردى جالعاستىرعان.
ميراس اسان, «ەگەمەن قازاقستان»
قاراعاندى