ماسەلەن, قازاقستان ءۇشىن نەگىزگى ءمىندەتتەردىڭ ءبىرى – ەكونوميكانى ءارتاراپتاندىرۋ. ال ەكونوميكانى ءارتاراپتاندىرۋ جاڭا ءارى الەۋەتتى كاسىپورىنداردىڭ اشىلۋىنا مۇمكىندىكتەر بەرەدى. ول بۇرىنعىعا قاراعاندا كوپتەگەن جۇمىس ورىندارىنىڭ اشىلۋىنا جاعداي جاسايدى. بۇل ءوز كەزەگىندە ەكونوميكالىق ءوسىم الىپ كەلەدى.
قازاقستان ىسكەر توپتارعا بارىنشا جاعداي جاساۋعا باسا نازار اۋدارۋدا. قازاقستان سوڭعى بىرنەشە جىلدا ىسكەر توپتاردى كوتەرمەلەۋ, ولارعا جاعىمدى ورتا قالىپتاستىرىپ بەرۋ ءىسى بويىنشا كوپتەگەن شارالاردى جۇزەگە اسىرىپ, سونىڭ ناتيجەسىندە الەمدىك Doing Business رەيتينگىندە 35-ءشى ورىنعا جايعاستى. بۇل قازاقستان ءۇشىن وتە جوعارى كورسەتكىش. وسى سالادا قازاقستاننىڭ جاقسى ناتيجەلەردەن كورىنۋى پرەزيدەنتتىڭ ۇنەمى قولداۋ بىلدىرۋىمەن تىكەلەي بايلانىستى دەپ ويلايمىن.
قازاقستان ءۇشىن ەكونوميكانى ءارتاراپتاندىرۋ بارلىق سالا بويىنشا جاقسى كورسەتكىشتەرگە جەتۋگە جول اشادى. اسىرەسە, كورشى ەلدەرمەن ساۋدا-ساتتىق جاساۋدا ءوز ءتيىمدىلىگىن كورسەتەدى. مەنىڭ ويىمشا, ەكونوميكانى ءارتاراپتاندىرۋ اۋىل شارۋاشىلىعىن دامىتۋعا, قىزمەت كورسەتۋ سالالارىن جەتىلدىرۋگە تىڭ سەرپىن بەرەدى. بۇل ورايدا ىسكەر توپتارعا وڭتايلى كليمات قالىپتاستىرۋعا, سونداي-اق, تەحنولوگيالىق جاڭعىرتۋعا باسا كوڭىل اۋدارعان ءجون.
جولداۋدا ماكروەكونوميكالىق تۇراقتىلىق ماسەلەسى اتاپ كورسەتىلگەن. شىن ءمانىندە, ماكروەكونوميكالىق تۇراقتىلىق وتە ماڭىزدى. ويتكەنى, ول ۇزاق مەرزىمدى ءوسىمنىڭ الەۋەتىن نىعايتادى. قازاقستاننىڭ ورنىقتى ماكروەكونوميكالىق فوكتورعا يە بولۋى ونىڭ وزگەلەرمەن ارىپتەستىك الەۋەتىن كۇشەيتە تۇسەدى. سونداي-اق, ينۆەستورلاردىڭ قازاقستانعا دەگەن سەنىمى ارتادى. بۇل قازاقستان ەكونوميكاسىندا ءوسىمنىڭ ۇزاق ۋاقىت بويى ساقتالىپ تۇرۋىنا مۇمكىندىك بەرەدى.
سونداي-اق, جولداۋدا ءبىلىم بەرۋ سالاسىنا ايرىقشا كوڭىل بولىنگەن. دۇنيەجۇزىلىك بانك قازاقستاننىڭ ءبىلىم سالاسىنا قاتىستى باعدارلامالارىنا ۇنەمى قولداۋ بىلدىرۋدە. ءدال وسى سالا بويىنشا ءبىز بىرنەشە جىل بويى قازاقستان ۇكىمەتىمەن بىرلەسە جۇمىس ىستەپ كەلەمىز.
تاعى ءبىر ايتا كەتەر جايت, قازاقستاندا اۋىل شارۋاشىلىعىنىڭ كەلەشەگى زور. مەن ۇنەمى «اۋىل شارۋاشىلىعى سالاسى – ەسكىلىكتىڭ قالدىعى ەمەس. وعان ءبىزدىڭ بولاشاعىمىز تىكەلەي بايلانىستى. ماسەلەن, قازىرگى تاڭدا الەمدەگى جۇمىس بەرۋشىلەردىڭ ەڭ ىرىلەرى ازىق-ت ۇلىك ونىمدەرىن ءوندىرۋشىلەرگە تيەسىلى», – دەپ ايتىپ جۇرەمىن. باسقانى بىلاي قويعاندا, قازاقستانمەن كورشى مەملەكەتتەردىڭ ازىق-ت ۇلىك تاۋارلارىنا دەگەن سۇرانىسى ارتىپ كەلەدى. قازاقستاننىڭ بۇل سۇرانىستارعا لايىقتى جاۋاپ بەرۋىنە مۇمكىندىگى مول. وسى ورايدا, ەلدىڭ گەوگرافيالىق ورنالاسۋى, قۇنارلى ەگىستىك جەرلەردىڭ كوپتىگى قازاقستاننىڭ اۋىل شارۋاشىلىعى سالاسىنداعى باسىمدىقتارى بولىپ تابىلادى.
سيريل مۋللەر,
دۇنيەجۇزىلىك بانكتىڭ ەۋروپا جانە ورتالىق ازيا بويىنشا ۆيتسە-پرەزيدەنتى