القا وتىرىسىنا پرەزيدەنت اكىمشىلىگىنىڭ, پرەمەر-مينيستر كەڭسەسىنىڭ, پارلامەنتتىڭ وكىلدەرى, باسقا دا مەملەكەتتىك ورگانداردىڭ جانە ۇلتتىق كومپانيالاردىڭ باسشىلارى قاتىستى. جيىننىڭ باسىندا ءسوز العان سىرتقى ىستەر ءمينيسترى قايرات ءابدىراحمانوۆ ەلباسىنىڭ بيىلعى جولداۋىندا العا قويىلعان مىندەتتەردى جانە بەس ينستيتۋتتىق رەفورمانى جۇزەگە اسىرۋدىڭ ماڭىزى مەن وزەكتىلىگىن اتاپ ءوتتى.
– ەكونوميكالىق ديپلوماتيانى كۇشەيتۋ – سىرتقى ىستەر مينيسترلىگىنىڭ جانە ونىڭ شەتەلدەردەگى مەكەمەلەرىنىڭ بارلىق جۇيەسىنىڭ اسا ماڭىزدى مىندەتى. وسىعان قاتىستى مەملەكەت باسشىسىنىڭ تاپسىرماسىمەن «ماقساتتى ەلدەر, تاۋار ايقىنداماسىنىڭ ءتىزىمى, قازاقستاندىق ونىمدەردى شەتەلدەردە ۇسىنۋعا بايلانىستى جۇمىستار بەكىتىلگەن قازاقستاندىق ونىمدەر ەكسپورتىن ىلگەرىلەتۋ» جونىندەگى بىرلەسكەن جوباعا قول قويىلدى. جاقىن ارادا ينۆەستيتسيا تارتۋعا بايلانىستى تاعى ءبىر ماڭىزدى قۇجاتقا قول قويىلۋعا ءتيىس. قازىر سىرتقى ىستەر مينيسترلىگى مەن اۋىل شارۋاشىلىعى مينيسترلىگى اراسىندا بىرلەسكەن جوبا ىسكە اسىرىلۋدا, – دەپ اتاپ ءوتتى ول.
ق.ءابدىراحمانوۆ ەكونوميكالىق ديپلوماتيانى ودان ءارى دامىتۋ ءۇشىن مينيسترلىكتىڭ جۇمىسىن قايتا قۇرۋ بارىسىندا ەلباسى تاپسىرعان مىندەتتەردى جەدەل جۇزەگە اسىرۋ قاجەتتىلىگىنە نازار اۋداردى. ماقسات – شەتەلدىك ينۆەستيتسيالاردى تارتۋ, وتاندىق تاۋارلاردى ەكسپورتتاۋ, كادر الەۋەتىن نىعايتۋ, حالىقارالىق ارەنادا قازاقستاننىڭ مۇددەسىن قورعاۋ بويىنشا بەلسەندى جۇمىس جۇرگىزۋ.
القا وتىرىسىندا مينيسترلىكتىڭ وتكەن جىلى ەكونوميكالىق ديپلوماتيانىڭ باسىم باعىتتارى بويىنشا اتقارعان جۇمىستارى قورىتىندىلاندى. جالپى, وتكەن جىلى سىرتقى ىستەر مينيسترلىگى مەن ونىڭ شەتەلدەردەگى مەكەمەلەرىنىڭ تىكەلەي اتسالىسۋىمەن ساۋدا-ەكونوميكالىق جانە ينۆەستيتسيالىق سالادا 300-دەن استام ءىس-شارا وتكىزىلىپتى. قازاقستانعا 600-گە تارتا شەتەلدىك دەلەگاتسيانىڭ ساپارلارى, قازاقستاندىق دەلەگاتسيانىڭ شەتەلدەرگە ساپارلارى ۇيىمداستىرىلعان.
2016 جىلدىڭ 9 ايىندا تىكەلەي شەتەل ينۆەستيتسياسىنىڭ جالپى كولەمى 27,3%-عا ءوسىپ, 14,5 ملرد اقش دوللارىن قۇرادى. ال 2005 جىلدان بەرگى ارالىقتا ەلىمىزگە 236 ملرد اقش دوللارىنان استام تىكەلەي شەتەل ينۆەستيتسياسى تارتىلىپتى.
– ەكونوميكانى ءارتاراپتاندىرۋ مەن يندۋستريالاندىرۋ باعدارلاماسىن ىسكە اسىرۋ اياسىندا قازاقستان تاۋارلارىن ەكسپورتتاۋ گەوگرافياسىن كەڭەيتىپ, شەتەلدىك ينۆەستيتسيالاردىڭ تۇراقتى تۇردە قۇيىلۋىن قامتاماسىز ەتۋ كەرەك. استانادا وتەتىن ەكسپو-2017 كورمەسى وعان زور مۇمكىندىكتەر بەرەدى, – دەدى ق.ءابدىراحمانوۆ.
كاسىبي مەملەكەتتىك اپپارات قۇرۋعا باعىتتالعان 1-ءشى ينستيتۋتتىق رەفورمانى ىسكە اسىرۋ بويىنشا القا ماجىلىسىندە كادر ساياساتىن مەريتوكراتيا قاعيداتى نەگىزىندە جانداندىرۋ, قىزمەتكەرلەردىڭ كاسىبي دەڭگەيىن كوتەرۋ, ءتيىستى زاڭنامالار مەن مەملەكەتتىك قىزمەتكەرلەردىڭ ەتيكالىق كودەكسىن مۇلتىكسىز ساقتاۋ ماسەلەلەرىنە باسا نازار اۋدارىلدى. مينيستردىڭ ايتۋىنشا, سىرتقى ىستەر مينيسترلىگىنىڭ 400-گە جۋىق قىزمەتكەرى شەتەلدىك جوعارى وقۋ ورىندارىن بىتىرگەن. 55 قىزمەتكەر – «بولاشاق» باعدارلاماسىنىڭ ستيپەندياتى بولىپ تابىلادى.
وتىرىس قورىتىندىسى بويىنشا سىرتقى ىستەر مينيسترلىگى القاسىنىڭ قاۋلىسى قابىلداندى.
ارنۇر اسقار, «ەگەمەن قازاقستان»