26 ناۋرىزدا ۇجىمدىق قاۋىپسىزدىك تۋرالى شارت ۇيىمى پارلامەنتتىك اسسامبلەياسى كەڭەسىنىڭ وتىرىسى بولدى. ونىڭ كۇن ءتارتىبى ۇجىمدىق قاۋىپسىزدىك تۋرالى شارتقا قول قويىلۋىنىڭ 25 جىلدىعىنا, ۇقشۇ قۇرىلۋىنىڭ 15 جىلدىعىنا جانە ۇقشۇ پارلامەنتتىك اسسامبلەياسى قۇرىلۋىنىڭ 10 جىلدىعىنا ارنالدى.
ق.توقاەۆ ءوز سوزىندە ۇقشۇ-نى ەۋرازياداعى اسكەري-ساياسي تۇراقتىلىقتىڭ ماڭىزدى فاكتورى بولىپ وتىرعان بەدەلدى حالىقارالىق قۇرىلىم رەتىندە سيپاتتادى. «ۇقشۇ الەۋەتىن جانە ءبىزدىڭ ۇيىم اياسىنداعى ارىپتەستىكتى نىعايتۋ قازاقستان رەسپۋبليكاسىنىڭ مۇددەلەرىنە تولىقتاي ساي كەلەدى, سوندىقتان, ونىڭ قىزمەتىن ۇدەتۋگە باعىتتالعان ءبىرقاتار ناقتى ۇسىنىستار ەنگىزگەن پرەزيدەنت نۇرسۇلتان نازارباەۆتىڭ ۇدايى نازارىندا بولىپ وتىر», – دەپ اتاپ ءوتتى توراعا.
ق.توقاەۆ جاھاندىق جانە ايماقتىق قاۋىپسىزدىكتىڭ نەگىزگى بۋىندارىنىڭ ءبىرى رەتىندە ۇقشۇ ءوز ءرولىن نىعايتۋى ءتيىس دەپ سانايدى. «بەلسەندى ىنتىماقتاسۋ مەن ءوزارا ءىس-قيمىلسىز حالىقارالىق تەرروريزمگە قارسى بىرلەسە قارسى تۇرۋ, اۋعانستاندى تۇراقتاندىرۋعا جاردەمدەسۋ, ۇزاققا سوزىلعان تەكەتىرەستەردى رەتتەۋ جانە جالپى العاندا, قاۋىپسىزدىك, قارۋسىزدانۋ جانە سەنىم شارالارى ماسەلەلەرى بويىنشا اۋقىمدى ديالوگ مۇمكىن ەمەس», – دەدى قازاقستان دەلەگاتسياسىنىڭ باسشىسى.
ق.توقاەۆ ۇجىمدىق قاۋىپسىزدىك جۇيەسىن قۇقىقتىق تۇرعىدا قامتاماسىز ەتۋگە, ءبىزدىڭ مەملەكەتىمىزدىڭ زاڭناماسىن جاقىنداستىرۋ مەن ۇيلەستىرۋگە باعىتتالعان ۇقشۇ پارلامەنتتىك اسسامبلەياسىنىڭ قىزمەتىنە جوعارى باعا بەردى. ول قازاقستان پارلامەنتى ۇقشۇ اياسىندا قول قويىلعان بارلىق كەلىسىمدەردى ۋاقىتىندا راتيفيتسيالاعانىن اتاپ ءوتتى. سەنات ءتوراعاسى قازاقستان دەلەگاتسياسى پارلامەنتتىك ديپلوماتيانى نىعايتۋعا باعىتتالعان جۇمىستاردى جالعاستىرا بەرەتىنىن جەتكىزدى.
ۇقشۇ پا كەڭەسىنىڭ وتىرىسىندا ۇيىم قىزمەتىنىڭ قورىتىندىلارى مەن كەلەشەگى, ونىڭ ىشىندە ۇجىمدىق قاۋىپسىزدىك جۇيەسىن قۇقىقتىق تۇرعىدا قامتاماسىز ەتۋ ماسەلەلەرى تالقىلاندى. ۇقشۇ-عا مۇشە مەملەكەتتەر دەلەگاتسيالارىنىڭ حالىقارالىق پارلامەنتتىك قۇرىلىمدارداعى قىزمەتىن ودان ءارى ۇيلەستىرۋ ماسەلەلەرى قارالدى.
27-28 ناۋرىزدا قازاقستان دەلەگاتسياسى تمد پارلامەنتارالىق اسسامبلەياسى مەن حالىقارالىق تەرروريزممەن كۇرەس ءجونىندەگى پارلامەنتتىك كونفەرەنتسيا قۇرىلىمدارىنىڭ جۇمىسىنا قاتىسادى.