اقتوبە وبلىسى – قۇرىلىس يندۋسترياسى قارقىندى دامىپ كەلە جاتقان ءوڭىر. مۇندا جىل ءوتكەن سايىن قابىرعالىق قۇرىلىس ماتەريالدارىنا سۇرانىس جوعارى بولا تۇسۋدە. سوڭعى جىلدارى وبلىستا قۇرىلىس ونەركاسىبىن دامىتۋدىڭ رەسپۋبليكالىق سالالىق باعدارلاماسى اياسىندا بىرنەشە ءىرى يندۋستريالىق-يننوۆاتسيالىق جوبالار ءجۇزەگە اسىرىلدى. سونىڭ ءبىرى دە بىرەگەيى «ەكوتون-باتىس» جشس-نىڭ جىلۋ ۇستاعىش گازدى بەتون بۇيىمدارىن شىعاراتىن زاۋىتى بولىپ تابىلادى. العاشقىدا قۇرىلىس سالاسىنىڭ جاڭا ونىمىنە توسىرقاي قاراۋشىلىق بولعانىمەن بۇل ءونىمنىڭ تيىمدىلىگى تۇتىنۋشىلارىن تەز ارادا-اق ءتانتى ەتتى.
گازدى بەتون بۇيىمدارىنىڭ جىلۋ ۇستاعىش, وتقا ءتوزىمدى, جەڭىل دە ونىمدىلىگىنە بايلانىستى سيليكات كىرپىشتەن توعىزدان استام ارتىقشىلىعى بار. ەۋروپادا مۇنداي گازدى بەتوننان قۇرىلىس سالۋدى ەرتەرەك قولعا العان كورىنەدى. «كارى قۇرلىقتىڭ» قۇرىلىستارىنىڭ 90 پايىزى وسى گازدى بەتون ماتەريالىنان تۇرعىزىلادى ەكەن. گازدى بەتون بلوكتارى جەڭىل دە ۇلكەن, سوندىقتان قابىرعالاردى تەز ارادا قالاۋعا بولادى. بۇل ءبىر جاعىنان, ەڭبەك ونىمدىلىگىن ارتتىرسا, ەكىنشى جاعىنان, تاس قالاۋشىنىڭ ارتىق-اۋىس قيمىلداۋىنىڭ الدىن الىپ, كوپ جەڭىلدىك تۋعىزادى. ال كىرپىشكە قاراعاندا ەرىتىندى 5-7 ەسە از جۇمسالسا, قالاۋ شاپشاڭدىعى 3-4 ەسە ارتادى. تاس پەن اعاشتىڭ قاسيەتتەرىن بويىنا قاتار سىڭىرگەن گازدى بەتون بىرەگەي جوعارى تەحنولوگيالىق قۇرىلىس ماتەريالى بولىپ تابىلادى. گازدى بەتوننان سالىنعان عيمارات قىستا جىلى, جازدا قوڭىر سالقىندىقتى قالىپتى ۇستاپ تۇرادى.
مىنە, وسىنداي ەكونوميكالىق تيىمدىلىگى مەن ەكولوگيالىق تازالىعىنا كوزدەرى جەتكەن جەرگىلىكتى قۇرىلىس كومپانيالارى الىستان اكەلىنگەن ۇلۋتاس پەن باعاسى جالىنا قول تيگىزبەيتىن سيليكات كىرپىشتەرگە قاراعاندا گازدى بەتون بلوكتارىن قولايلى كورەدى. اسىرەسە, جەكە قۇرىلىس سالۋشىلاردان تاپسىرىستار كوپ تۇسەدى.
«ەكوتون-باتىس» جشس ديرەكتورى ەربولات راحىمباەۆتىڭ ايتۋىنشا, رەسپۋبليكا بويىنشا وسىنداي گازدى بەتون شىعاراتىن, گەرمانيا تەحنولوگياسىمەن جۇمىس ىستەيتىن ەكى-اق زاۋىت بار ەكەن. ونىڭ ءبىرى – استانادا, ەكىنشىسى اقتوبەدەگى وسى زاۋىت.
سەرىكتەستىك مۇنداي كاسىپورىندى ىسكە قوسۋعا تەحنولوگيالىق ماتەريالدار مەن جەرگىلىكتى شيكىزاتتى زەرتتەپ, تالداپ بارىپ دەن قويىپتى. اقتوبە وڭىرىندە گازدى بەتون شىعارۋعا قاجەتتى كۆارتس قۇمى, اك جانە باسقا ماتەريالدار جەتكىلىكتى. باستاپقىدا سەرىكتەستىك باسشىلارى ەلباسى تاپسىرماسىنا سايكەس قۇرىلىس ماتەريالدارىن سىرتتان تاسىمالداماۋدى ماقسات ەتىپ قويدى, ولاردى ءوز ەلىمىزدە شىعارۋعا باعىت ۇستادى. زاۋىت پايدالانۋعا بەرىلگەنننەن كەيىن بۇل پروبلەمالاردىڭ ءبارى دە ءوز-وزىنەن شەشىمىن تابا باستادى. قازىر كاسىپورىندا شىعارىلاتىن ونىمدەر ىشكى رىنوكتى بىرتە-بىرتە تولتىرىپ كەلەدى. ەندى ەلىمىزدەن تىسقارى جەرلەردەن زاۋىت ونىمدەرىنە سۇرانىس ارتا ءتۇستى. بۇل دا تۇسىنىكتى, كاسىپورىندا شىعارىلاتىن گازدى بەتون بلوكتارى باسەكەگە قابىلەتتى, حالىقارالىق ستاندارتتارعا تولىق جاۋاپ بەرەدى. ونىڭ ۇستىنە زاۋىتتا ورناتىلعان نەمىستىڭ «YTOWG International GmbH» كومپانياسىنىڭ تەحنولوگيالىق جەلىسىنىڭ الەمدىك ساۋدا ماركاسى بار. بۇل قوندىرعىلار ەۋرووداق ەلدەرى كاسىپورىندارىندا قۇراستىرىلادى جانە ۇلكەن سۇرانىسقا يە.
– ءبىز وسى جوبانى جۇزەگە اسىرا وتىرىپ, ءساتتى قادام جاسادىق دەپ ايتا الامىن. الدىن-الا ەسەپتەۋلەرىمىز زايا كەتكەن جوق. گازدى بەتون بۇيىمدارىنىڭ بولاشاعى زور. مۇنداي ماتەريالدار شىعارۋ ەلىمىزدە ەندى-ەندى قولعا الىنۋدا. جوبانى جۇزەگە اسىرۋعا 25 ميلليون دوللارعا جۋىق قارجى سالىندى. زاۋىت ءالى تولىق قۋاتىندا جۇمىسقا كوشكەن جوق. دەگەنمەن جاقىن كۇندەرى ءونىم ءوندىرۋدى اناعۇرلىم ارتتىرۋعا مۇمكىندىك مول. ءبىزدىڭ قۇرىلىستىق گازدى بەتون بلوكتارىمىزعا قىزىلوردادان, اقتاۋدان, ورالدان جانە اتىراۋدان تاپسىرىستار تۇسۋدە, – دەيدى ەربولات راحىمباەۆ.
قىستىگۇندەرى مۇندا اۋىسىمىنا 300 تەكشە مەتر ءونىم ءوندىرىلسە, جازعى ماۋسىمدا اۋىسىمىنا 400 تەكشە مەتر قابىرعالىق بلوكتار شىعارىلادى. ال, كاسىپورىن تولىق قۋاتىندا جۇمىس ىستەگەندە ايىنا ءونىم ءوندىرۋ كولەمىن 10 مىڭ تەكشە مەترگە دەيىن جەتكىزۋگە بولادى.
قازىر زاۋىتتا 143 مامان جۇمىس ىستەيدى. وندىرىستە قولدانىلاتىن وزىق تەحنولوگيا مامان جۇمىسشىلاردان كاسىبي بىلىكتىلىكتى تالاپ ەتەدى. مۇندا ءبارى ەلەكترونيكامەن بايلانىستى, قوندىرعىلار اۆتوماتتاندىرىلعان, ولاردا جۇمىس ىستەۋ ءۇشىن ارناۋلى ءبىلىم كەرەك. سوندىقتان كاسىپورىندا ماماندار مەن جۇمىسشىلاردى دايارلاۋعا, ولاردىڭ كاسىبي بىلىكتىلىگىن جەتىلدىرۋگە ەرەكشە ءمان بەرىلەدى.
وسىنداي يگى ىستەردىڭ ءناتيجەسىندە زاۋىت وتكەن جىلى «قازاقستاننىڭ ۇزدىك تاۋارى» رەسپۋبليكالىق كونكۋرسىندا «حالىق ءۇشىن ۇزدىك تاۋار» نوميناتسياسى بويىنشا جەڭىمپاز بولدى.
– كاسىپورىندا شىعارىلاتىن گازدى بەتون – قۇرىلىستا جاڭا ماتەريال. ءبىز سوندىقتان ءوز كليەنتتەرىمىزگە گازدى بەتون بلوكتارىنان قۇرىلىس سالۋعا قولداۋ-كومەك جاساۋدان قاشپايمىز. ءبىزدىڭ ونىمدەردى ساتىپ الۋشىلار ءالى دە ونى قالاي پايدالانۋدى بىلە بەرمەيدى. كەيدە قۇرىلىس سالۋشىلارعا بۇل ماتەريالدى قالاي قولدانۋ كەرەكتىگى جايىندا كەڭەس بەرۋگە دە تۋرا كەلەدى – دەيدى سەرىكتەستىك باسشىسى.
قازىر كاسىپورىن ۇجىمى ءوندىرىس كولەمىن كەڭەيتۋگە باعىت ۇستاۋدا. سونداي-اق, گازدى بەتون بەلدىك تاستامالارىن ءوندىرۋدى كوزدەۋدە. سەرىكتەستىك ءوز ءونىمدەرىن كورشىلەس رەسەي رىنوگىنا شىعارۋدى جوسپارلاپ وتىر. داعدارىستى ەڭسەرگەن وڭىردە جەكە تۇرعىن ءۇي سالۋ قارقىنى ارتا ءتۇستى. تۇتىنۋشىنىڭ سۇرانىسىن قاناعاتتاندىرۋدى ماقسات ەتكەن زاۋىت ۇجىمى تىڭ تابىستارعا جۇمىلۋدا.
ساتىبالدى ءساۋىرباي.
اقتوبە وبلىسى.