وسى وقيعاعا بايلانىستى ورتالىق كوممۋنيكاتسيالار قىزمەتىندە وتكەن بريفينگتە قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى ءاسانالى ءاشىموۆ, كينو جانە تەاتر اكتريساسى, قازاقستاننىڭ ەڭبەك سىڭىرگەن ءارتىسى مەرۋەرت وتەكەشوۆا, مەملەكەتتىك رەسپۋبليكالىق كورەي مۋزىكالىق كومەديا تەاترىنىڭ ديرەكتورى ليۋبوۆ ني, قازاقستان رەسپۋبليكاسىنىڭ ەڭبەك سىڭىرگەن قايراتكەرى ەرلان ءبىلال, «قازاق اۋەندەرى» اق پرەزيدەنتى اسحات ماەميروۆ اتالعان سىيلىقپەن ماراپاتتاۋ ءراسىمى تۋرالى اڭگىمەلەپ بەردى.
بۇل سىيلىق العاش رەت تاپسىرىلادى. سالتاناتتى جيىن «قازاقستان» ورتالىق كونتسەرت زالىندا قازاقستاننىڭ تەاتر قاۋىمداستىعىنىڭ وكىلدەرىنىڭ قاتىسۋىمەن وتەدى.
بريفينگتە حالىق ءارتىسى ءاسانالى ءاشىموۆ «ساحناگەر» سىيلىعىنىڭ ءمانى مەن ماڭىزىنا كەڭىرەك توقتالىپ ءوتتى.
–بۇگىندە قازاق تەاترلارىنىڭ دامۋ اۋقىمىن كەڭەيتۋ, الەمدىك تەاتر قۇرىلىمدارىمەن بايلانىستاردى نىعايتۋ, جەر-ءجۇزىنىڭ تەاتر كارتاسىندا ءوز ورنىمىزدى ايقىنداپ, ءۇنىمىزدى لايىقتى ەستىرتۋگە اتسالىسۋ ونەرگە جاناشىر ارقايسىمىزعا مىندەت. وسىعان بايلانىستى قازاقستان تەاترلارى اسسوتسياتسياسىنىڭ باستاماسىمەن «ساحناگەر-2017» ۇلتتىق تەاتر سىيلىعى تاعايىندالىپ وتىر. بۇل سىيلىق تەاتر ءداستۇرىن ساقتاۋ مەن نىعايتۋعا ارنالعان. ماراپاتتاۋ ءراسىمى «سامۇرىق-قازىنا» ۇلتتىق ءال-اۋقات قورى» اق قولداۋىمەن وتەدى, – دەدى ول.
ودان كەيىن حالىق ءارتىسى قازاقستان تەاترلارى اسسوتسياتسياسىنىڭ ماقساتى تۋرالى ايتىپ بەردى.
– قازاقستان تەاترلارى اسسوتسياتسياسى 2016 جىلى قۇرىلعان. ول مەنىڭ ازاماتتىق باستامام بولاتىن. قازىرگى كەزدە قاۋىمداستىققا رەسپۋبليكالىق تەاترلاردىڭ بارلىعى جانە كوپتەگەن وبلىستىق تەاترلار مۇشە بولىپ وتىر. اسسوتسياتسيا العاشقى شارالارىن وتكىزىپ تە ۇلگەردى. بۇگىندە جاسى 100-دەن اسقان قادىرلى ساحناگەرىمىز, قازاقستاننىڭ حالىق ءارتىسى ايشا ابدۋللينانىڭ 100 جىلدىعىن اتاپ وتتىك. اياۋلى ايشا انامىزدىڭ ءوزى ونەر جولىن باستاعان قارا شاڭىراق م.اۋەزوۆ تەاترىنىڭ ۇلكەن ساحناسىندا وتىرىپ – جاس ۇرپاققا ۇلاعاتتى ءسوزىن ايتۋىنىڭ ءوزى قانداي عانيبەت! ال, ونەرىمىزدىڭ بەكزات تۇلعاسى, كسرو حالىق ءارتيسى, كسرو مەملەكەتتىك سىيلىعىنىڭ لاۋرەاتى حاديشا بوكەەۆانىڭ تۋعانىنا 100 جىل تولۋىنا وراي وتكىزىلگەن ەسكە الۋ كەشىنىڭ دە تاعلىمى زور. مۇنداي ۇلاعاتتى شارالار اسسوتسياتسيانىڭ الداعى جۇمىستارىنىڭ جوسپارلى شارالارى بولارى انىق. ءبىزدىڭ قاۋىمداستىق مەملەكەتتىك تەاترلاردىڭ ءيميدجىن قالىپتاستىرۋعا, تەاتر قىزمەتىنىڭ پاراساتتىق الەۋەتى مەن مۇمكىندىكتەرىن الەمدىك دارەجەگە كوتەرۋ, تەاترلار اراسىنداعى شىعارماشىلىق ىزدەنىس مونيتورينگىن قالىپتاستىرۋ, جاڭا ەسىمدەردى انىقتاۋ, جاستاردىڭ اعا تولقىن وكىلدەرىنەن تاجىريبە الۋ, كاسىبي باعدارلارىن ايقىنداۋ مۇمكىندىكتەرىن بىرىزدىلەۋ, الەۋمەتتىك-تۇرمىستىق جاعدايلارلارىنا قولداۋ كورسەتۋ, ماراپاتتارعا ۇسىنۋ, تەاتر قايراتكەرلەرىنىڭ ەسكە الۋ كەشتەرى مەن مەرەيتويلارىن ۇمىت قالدىرماۋ, حالىقارالىق فەستيۆالدەر, الەمدىك ماستەر-كلاسستار مەن كونفەرەنتسيالار ۇيىمداستىرۋ سەكىلدى جالپى قازاق تەاتر ونەرىنىڭ حالىقارالىق دەڭگەيدەگى مۇددەسىنە قىزمەت ەتەتىن, بۇگىنگى قازاق تەاتر ونەرىندەگى وزەكتى نەگىزگى باعىتتاردى جۇزەگە اسىراتىن بىرەگەي بىرلەستىك! ءبىز وسى باعىتتاعى جۇمىسىمىزدى ءارى قاراي جالعاستىرامىز, – دەدى ول.
كەزدەسۋدە قازاقستاننىڭ ەڭبەك سىڭىرگەن ءارتىسى مەرۋەرت وتەكەشوۆا قازاقستان تەاترلارى اسسوتسياتسياسىنىڭ پرەزيدەنتى بولىپ قازاقستان مەن كسرو حالىق ءارتىسى, مەملەكەتتىك سىيلىقتار لاۋرەاتى, رەسەي فەدەراتسياسىنىڭ «م. لومونوسوۆ» وردەنىنىڭ كاۆالەرى, «وتان», «دوستىق» وردەندەرىنىڭ كاۆالەرى ءاسانالى ءاشىموۆ تاعايىندالعانى بارلىق ونەر سۇيەر قاۋىمعا ماقتانىش ەكەنىن, بيىل قاۋىمداستىقتىڭ «ساحناگەر-2017» سىيلىعىن تاعايىنداعانى بولاشاعىنان ءۇمىت كۇتتىرەتىن جاستار ءۇشىن قىزىعى مەن قيىندىعى كوپ ونەر جولىندا ءوزىن كورسەتۋگە ۇلكەن مۇمكىندىك بولاتىنىن اتاپ ءوتتى.
– «ساحناگەر-2017» ۇلتتىق تەاتر سىيلىعى تەاتر ونەرى سالاسىنداعى شىعارماشىلىق جەتىستىكتەر ءۇشىن بەرىلەدى. تەاتر قاۋىمداستىعىنىڭ پىكىرى بويىنشا, سىيلىق قازاقستاندىق پاتريوتيزم مەن ۇلتتىق مادەنيەتكە دەگەن سۇيىسپەنشىلىكتى نىعايتۋعا باعىتتالىپ, ەڭبەككە, كاسىبي جەتىستىككە, وتانعا قىزمەت ەتۋگە, جوعارعى پاتريوتتىق يدەيالارعا وڭ كوزقاراس قالىپتاستىراتىن تۋىندىلاردىڭ دۇنيەگە كەلۋىنە ىقپال ەتۋ ءتيىس, – دەدى م.وتەكەشوۆا.
سونداي-اق ول, «ساحناگەر» سىيلىعى ەلىمىزدىڭ مادەني كەڭىستىگىن بىرىكتىرىپ قانا قويماي, شىعارماشىلىق تاجىريبەمەن تۇراقتى الماسۋ ءۇشىن جاعداي جاسايتىنىن, ۇلتتىق سىيلىق اياسىندا جاس دارىندى ارتىستەردى قولداۋعا ەرەكشە نازار اۋدارىلاتىنىن ايتتى.
–«ساحناگەر» سىيلىعى «جىلدىڭ ۇزدىك رەجيسسەرى», «جىلدىڭ ۇزدىك قويۋشى-سۋرەتشىسى», «جىلدىڭ كوستيۋم بويىنشا ۇزدىك سۋرەتشىسى», «جىلدىڭ جارىق بويىنشا ۇزدىك سۋرەتشىسى», «ۇزدىك ايەل ءرولى», «ۇزدىك ەر ءرولى», «جىلدىڭ ۇزدىك سپەكتاكلى», «جىلدىڭ ۇزدىك بالالارعا ارنالعان سپەكتاكلى», «جىلدىڭ ۇزدىك دراماتۋرگى», «جىلدىڭ ۇزدىك گريمەرى», «جىلدىڭ ۇزدىك تەاتر سىنشىسى», «سپەكتاكلدىڭ ۇزدىك مۋزىكالىق راسىمدەلۋى», «تەاتر ونەرىن دامىتۋعا قوسقان ۇلەسى ءۇشىن», «جىل اشۋى», «ۇزدىك وپەرا جانە بالەت پارتياسى» نوميناتسياسىندا ۇزدىكتەرگە تاپسىرىلادى. بيىل ىرىكتەۋ تۋرىنا قازاقستاننىڭ 52 تەاتر ۇجىمى قاتىستى, – دەدى ول.
بريفينگتە ونەرتانۋشىلار ەرلان ءبىلال مەن اسحات ماەميروۆ «ساحناگەر» سىيلىعىنىڭ العاش رەت بەرىلەتىنىن, ونى تاپسىرۋ ءۇشىن بىشكەكتەن قازاقستاننىڭ حالىق ءارتىسى ايشا ابدۋللينانىڭ ارنايى كەلەتىنىن ايتتى.
–قازىرگى كەزدە دراما تەاترى كەنجە قالىپ بارادى. سوندىقتان ءبىز سىيلىقتىڭ اۋقىمىن كەڭەيتىپ, وعان بارلىق تەاترلاردى قوستىق. بۇل سىيلىق تاەترلار مەن ارتىستەردىڭ جانە سونىڭ اينالاسىندا جۇرگەن بارلىق مامانداردىڭ مارتەبەسىن كوتەرەتىنىنە سەنىم مول, – دەدى اسحات ماەميروۆ.
داستان كەنجالين,
«ەگەمەن قازاقستان»