جىلدىڭ اۋقىمدى اسكەري شاراسىنا كەشەندى دايىندىق باستالىپ تا كەتتى. سونىمەن, قر قورعانىس ءمينيسترى گەنەرال-پولكوۆنيك ساكەن جاسۇزاقوۆ كوشپەلى جۇمىس كەڭەسىن وتكىزدى. ونىڭ بارىسىندا استانا قالاسىندا وتەتىن اسكەري پارادتى ساپالى ۇيىمداستىرۋ جانە ونى وتكىزۋ جونىندە بىرقاتار ناقتى تاپسىرمالار بەردى, دەپ حابارلايدى قر قورعانىس مينيسترلىگىنىڭ ءباسپاسوز قىزمەتى.
ەگەمەندى قازاقستاننىڭ تاريحىندا ايرىقشا داتاعا, ياعني, قارۋلى كۇشتەردىڭ قۇرىلۋىنىڭ 25 جىلدىعىنا تۇسپا-تۇس كەلگەن الداعى اسكەري پارادتىڭ وزىندىك ەرەكشەلىكتەرى بار. تارتىلعان جەكە قۇرام مەن اسكەري تەحنيكانىڭ سانى بويىنشا بۇل شەرۋ بۇدان بۇرىن وتكىزىلگەن پارادتاردان وزگەشە بولۋى ءتيىس.ەلورداداعى تاۋەلسىزدىك الاڭىندا شامامەن 30 جاياۋ اسكەر پارادتىق ەسەپتوپ قۇرامىندا 5 000-نان اسا اسكەري قىزمەتشى سالتاناتتى مارشپەن ادىمداپ ءوتۋى جوسپارلانۋدا. كوزتارتارلىق شەرۋگە 300-گە تارتا بىرلىك اسكەري تەحنيكا تارتىلاتىن بولادى. قازاقستاندىق اۆياتسيانىڭ كوك اسپانداعى قۋاتى مەن جاۋىنگەرلىك ازىرلىگىن ەلىمىزدىڭ اۋە قورعانىسى كۇشتەرىنىڭ شامامەن 80 بىرلىك اۆياتسيالىق تەحنيكاسى پاش ەتەدى. بۇل رەتتە قازاقستاندىقتار العاش رەت ءوز كوزدەرىمەن 2016 جانە 2017 جىلدارى اسكەرىمىزدىڭ ارسەنالىن تولىقتىرعان سۋ جاڭا اسكەري تەحنيكانى, زاماناۋي قارۋ-جاراق ۇلگىلەرىن تاماشالاپ, ءوز باعالارىن بەرە الادى.
پارادتىڭ تاعى ءبىر ەرەكشەلىگى قازاقستان قارۋلى كۇشتەرىنىڭ ارداگەرلەرىن, قورعانىس مينيسترلىگىنىڭ يەلىگىنە بەرىلگەننەن كەيىن العاش رەت بارابانشىلاردىڭ (داۋىلپازشىلاردىڭ) قۇراما روتاسىندا ونەر كورسەتەتىن «جاس ۇلان» ءتورت اسكەري مەكتەپتىڭ تاربيەلەنۋشىلەرى, اۋماقتىق قورعانىس بريگاداسىنىڭ روتاسى, اسكەري-پاتريوتتىق كلۋبتاردىڭ تاربيەلەنۋشىلەرى مەن اسكەري-تەحنيكالىق مەكتەپتىڭ اسكەري ءاۆتوموبيلدى تەحنيكاسىندا الاڭدا ءجۇرىپ وتەتىن قورعانىس مينيسترلىگى اسكەري-تەحنيكالىق مەكتەپتەرىنىڭ شاكىرتتەرىن قاتىستىرۋعا تارتۋ بولىپ تابىلادى.
اتالمىش ءىس-شارانىڭ نەگىزگى ءتۇيىنى ءالى قۇپيا رەتىندە ساقتالۋدا. الايدا, قارۋلى كۇشتەردە اسكەري قىزمەتشىلەردى ىرىكتەۋ جانە تەحنيكانى دايىنداۋ باستالىپ تا كەتتى.
اسكەري پاراد – بۇل مەرەكەلىك جانە كوزتارتارلىق ءىس-شارا عانا ەمەس, ول ءتول اسكەرىمىزدىڭ جاۋىنگەرلىك قۋاتىن, قارۋلى كۇشتەردىڭ تەحنيكالىق تۇرعىدا جابدىقتالۋىن, ەلىمىز بەن حالقىمىزدىڭ ەگەمەندىگى مەن قاۋىپسىزدىگىن كۇزەتىپ جۇرگەن اسكەري قىزمەتشىلەردىڭ جاۋىنگەرلىك ازىرلىگى مەن جاۋىنگەرلىك قابىلەتتىلىگىن كورسەتۋ. بۇدان بۇرىن قازاقستاندا وتكىزىلىپ جۇرگەن اسكەري پارادتاردىڭ ارقايسىسى وزىنشە ايرىقشا جانە ەستە قالارلىق بولىپ كەلەدى. سوڭعى جىلدارى وتكىزىلىپ جۇرگەن پارادتاردىڭ ىشىندە 1941-1945 جج. ۇلى وتان سوعىسىنداعى جەڭىستىڭ 70 جىلدىعىنا ارنالعان 2015 جىلعى پاراد بولدى. ونىڭ تاريحي جانە زاماناۋي بولىگىندە ۇلى جەڭىستىڭ مۇراگەرى رەتىندە ۇوس جىلدارى مەن قازىرگى زامانعى قازاقستاندىق ارميانىڭ اسكەري تەحنيكاسىنىڭ ۇلگىلەرى ۇسىنىلدى.