بەس جىلدان بەرى پياز ەگۋ جۇمىسىمەن اينالىسىپ كەلە جاتقان «تۇرار» شارۋا قوجالىعى بيىلعى جىلى 35 گەكتار القاپقا ءدان سەۋىپ جاتىر. «رانكو» دەپ اتالاتىن جاڭا تۇقىم سورتىن ەگىپ جاتقان ديقاندار مۇنىڭ ءونىمى بىتىك بولارىنا سەنىمدى. وتكەن جىلى شارۋالار ەككەن پيازدىڭ گەكتارىنا 80 توننادان ءونىم السا, بيىل گەكتارىنا 100 توننادان استام ءونىم الۋدى جوسپارلاپ وتىر.
ايتا كەتەيىك, پياز تۇقىمىن ءبىر مەزەتتە بىرنەشە جۇمىستى اتقاراتىن جاڭا زاماناۋي تەحنيكامەن سەۋىپ جاتىر. ياعني, تەحنيكا, بىرىنشىدەن اراسى 3 سم-دەن تۇقىم تاستاسا, ەكىنشىدەن, تامشىلاتىپ سۋعاراتىن سۋ تۇتىگىن قوسا كومۋدە. سونداي-اق, ءبىر گەكتار جەرگە 6 كەلىدەي تۇقىم كەتسە, جوعارى سورتتى تۇقىمنىڭ ءبىر كەلىسى 64 مىڭ تەڭگە تۇرادى. جەردى جىرتۋدان باستاپ, جيىن-تەرىم ناۋقانىنا دەيىنگى جالپى شىعىننىڭ كولەمى ءار گەكتارعا 1 ملن. 300 مىڭ تەڭگەدەن جۇمسالادى ەكەن. الايدا, تۇسكەن ءونىم كەتكەن شىعىندى ەسەلەپ جابادى دەيدى ديقاندار.
شاردارا اۋدانىنداعى جاۋشىقۇمنىڭ جۋاسى جالپاق جۇرتقا جاقسى تانىس. ءتىپتى, 2013 جىلى ماسكەۋدە وتكەن جارمەڭكەگە «تۇرار» شارۋا قوجالىعى 20 توننا ءونىم اپارىپ ۇسىنعان بولاتىن.