بۇل تۋرالى بۇگىن ماجىلىستەگى ۇكىمەت ساعاتىندا ەلىمىزدىڭ ۇلتتىق ەكونوميكا ءمينيسترى تيمۋر سۇلەيمەنوۆ ءمالىم ەتتى, دەپ حابارلايدى قازاقپارات.
«جالپى العاندا, ەلدەگى ەكونوميكالىق بەلسەندى حالىق 8,9 ملن. ادامدى قۇرايدى, ولاردىڭ ىشىندە 6,3 ملن. ادام - جالدامالى جۇمىسكەرلەر, 2,1 ملن. - ءوزىن-ءوزى ەڭبەكپەن قامتىعاندار جانە 447 مىڭ ادام - جۇمىسسىز حالىق. ەل حالقىنىڭ جالپى سانىنىڭ 3 ميلليوننان استامى شاعىن جانە ورتا بيزنەس سەكتورىندا جۇمىسپەن قامتىلعان. وتكەن جىلدىڭ قورىتىندىسى بويىنشا جۇمىس ىستەپ تۇرعان شوب سۋبەكتىلەرىنىڭ سانى 1,1 ملن. بىرلىكتى قۇرادى, ولار 9 ايدا 11,2 ترلن. تەڭگە سوماعا ءونىم شىعاردى», - دەپ اتاپ ءوتتى مينيستر.
ونىڭ ايتۋىنشا, ەكونوميكاداعى شاعىن جانە ورتا بيزنەستىڭ ۇلەسى 24,9 پايىزدى قۇرايدى. بۇل رەتتە مەملەكەت باسشىسى وسى كورسەتكىشتى 2050 جىلعا قاراي 50 پايىزعا دەيىن جەتكىزۋ مىندەتىن قويىپ وتىر.
ايتا كەتەرلىگى, الەمدىك ستاتيستيكاعا سايكەس, دۇنيەجۇزى حالقىنىڭ 12 پايىزىندا عانا بيزنەسپەن اينالىسۋ داعدىسى بار.
«قاراپايىم ەسەپ كورسەتىپ وتىرعانداي, قازاقستاننىڭ ەكونوميكالىق تۇرعىدا بەلسەندى حالقىنىڭ ءۇشىنشى بولىگى قازىردىڭ وزىندە شاعىن جانە ورتا كاسىپكەرلىكپەن اينالىسادى. وسىلايشا, مەملەكەت باسشىسىنىڭ تاپسىرمالارىن ورىنداۋ فورمالدى تۇردە كاسىپورىندار سانىنىڭ ءوسۋى ەسەبىنەن ەمەس, جۇمىس ىستەپ تۇرعان بيزنەس, شىعاراتىن ءونىمنىڭ, كورسەتەتىن قىزمەتتىڭ ساپاسىن ارتتىرۋ ارقىلى جۇزەگە اسىرىلۋى قاجەت», - دەدى سۇلەيمەنوۆ.
ءمينيستردىڭ دەرەگىنە سايكەس, ەلدىڭ ەكونوميكالىق بەلسەندى حالقى قۇرىلىمىنىڭ 24 پايىزى كىرىس دەڭگەيى تومەن ءوزىن-ءوزى جۇمىسپەن قامتىعانداردىڭ جوعارى ۇلەسىمەن سيپاتتالادى. ولاردىڭ 42 پايىزىنىڭ ورتا نەمەسە باستاۋىش ءبىلىمى عانا بار.
«كىرىسى 60 مىڭ تەڭگەدەن تومەن ءوزىن-ءوزى جۇمىسپەن قامتىعاندار جانە جۇمىسسىزدار سانى 853 مىڭ ادامدى قۇرايدى. ولاردىڭ ىشىندە اۋىلدىق ەلدى مەكەندەردە 716 مىڭ ادام تۇرادى. ءبىزدىڭ پايىمىمىزشا, ازاماتتاردىڭ ءدال وسى ساناتى شاعىن جانە ورتا بيزنەستى دامىتۋدىڭ قوسىمشا كوزى بولا الادى», - دەدى ول.