«KOBYZBOOK» – قوبىزشىلارعا ارنالعان ءموبيلدى قوسىمشا جانە ۆەب-سايت. وقۋ قۇرالىنىڭ ەلەكتروندى فورماتى ونى ينتەرنەت جەلىسى ارقىلى الەمنىڭ كەز كەلگەن نۇكتەسىنەن پايدالانۋعا مۇمكىندىك بەرەدى. ياعني, ۇيالى تەلەفونىڭىز نەمەسە كومپيۋتەر ارقىلى جۇكتەپ الىپ قولدانا بەرەسىز. ەلەكتروندى وقۋلىقتا 180-نەن استام قوبىزعا ارنالعان كۇيلەردىڭ, ولاردىڭ پايدا بولۋى تۋرالى اڭىزدار جانە تاريحى تۋرالى اۋديو-نۇسقالار جيناقتالعان. ءاربىر شىعارمانىڭ نوتاسى, بەينە جانە اۋديو-نۇسقالارىنىڭ ارانجيروۆكاسى ۇسىنىلعان. «KOBYZBOOK» ورتا وقۋ ورىندارىنىڭ وقۋشىلارىنا جانە جوعارى وقۋ ورىندارىنىڭ شاكىرتتەرىنە, سونداي-اق, قوبىزعا قىزىعۋشىلارعا ارنالعان حالىق اسپاپتارى بويىنشا الەمدەگى ءبىرىنشى وقۋلىق.
جوبا اۆتورى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ «ءداستۇرلى مۋزىكا ونەرى» كافەدراسىنىڭ اعا وقىتۋشىسى, حالىقارالىق جانە رەسپۋبليكالىق كونكۋرستاردىڭ لاۋرەاتى, «قازاقستان رەسپۋبليكاسى تۇڭعىش پرەزيدەنتى – ەلباسى قورى» گرانتىنىڭ يەگەرى – ماقسات مەدەۋبەك.
ونىڭ ايتۋىنشا, «KOBYZBOOK-ءتىڭ» ارقاسىندا ءاربىر ادام قورقىت, ىقىلاس, ابىكەي, نىشان, ج.قالامباەۆ, د.مىقتىباەۆ جانە ت.ب. تالانت يەلەرىنىڭ ءومىرى مەن شىعارماشىلىعى جايىنداعى تولىق ماعلۇماتپەن تانىسا الادى. وقۋلىقتا قازىرگى زامانعى قوبىزشىلاردىڭ ەسىمدەرى دە قامتىلعان. اتالعان ەلەكتروندىق وقۋلىق وقۋ جۇيەسىن جاقسارتۋعا, «ماماندىق», «قىلقوبىزشىلار ءانسامبلى», «ورىنداۋشىلىق شەبەرلىك», «ۇقساس اسپاپتاردى زەرتتەۋ» پاندەرى بويىنشا ادىستەمەلىك ماتەريالداردى تولىقتىرۋعا مۇمكىندىك بەرەدى. وقۋلىق ءۇش تىلدە ياعني, قازاق, ورىس جانە اعىلشىن تىلدەرىندە ۇسىنىلعان. تۇساۋكەسەر بارىسىندا «KOBYZBOOK» جوباسىنىڭ اۆتورى اسپاپتىڭ شىعۋ تاريحىمەن, ونىڭ ماعىناسى جانە مانىمەن تانىستىرىپ, قوبىزدى ازىرلەۋ تەحنولوگياسى تۋرالى اڭگىمەلەدى. «ەلەكتروندى وقۋلىعىمىزدىڭ قورجىنى قوبىزعا قاتىستى تىڭ دەرەكتەرمەن جانە جاڭالىقتارمەن تولىعا بەرمەك. الداعى ۋاقىتتا ۇلتتىق ونەرىمىز بەن مۇرامىزدى ناسيحاتتايتىن اتالمىش جوبانىڭ اۋقىمىن كەڭەيتۋ جوسپارىمىزدا بار», – دەيدى ماقسات مەدەۋبەك.
تۇساۋكەسەر سوڭى «تۇران» ەتنو-فولكلورلىق ءانسامبلى, قازاقستان رەسپۋبليكاسى تۇڭعىش پرەزيدەنتى – ەلباسى قورى گرانتتارىنىڭ يەگەرلەرى مەن حالىقارالىق جانە رەسپۋبليكالىق كونكۋرستاردىڭ لاۋرەاتتارىنىڭ قاتىسۋىمەن وتكەن كونتسەرتكە ۇلاستى.
ارمان وكتيابر, «ەگەمەن قازاقستان»