جيىندا ي.ابىشەۆ بۇگىنگى كۇنى سۋ رەسۋرستارى كوميتەتىنىڭ باسسەيندىك ينسپەكتسيالارى اكىمدىكتەرمەن جانە تج اۋماقتىق ورگاندارىمەن بىرلەسىپ 859 گيدروتەحنيكالىق قۇرىلىستارعا تەكسەرىس جۇرگىزگەنىنە توقتالدى. ونىڭ ايتۋىنشا, گيدروتەحنيكالىق قۇرىلىستاردى تەكسەرۋ جۇمىستارىن كوميتەتتىڭ ينسپەكتسيالارى ودان ءارى جالعاستىرۋدا. سونداي-اق, گيدروتەحنيكالىق قۇرىلىستاردىڭ مەنشىك يەلەرىنە تاسقىن سۋدى قاۋىپسىز وتكىزۋ بويىنشا شارالاردى قامتاماسىز ەتۋ قاجەتتىلىگى تۋرالى حات جولدانعان.
بريفينگتە بەلگىلى بولعانداي, رەسپۋبليكالىق مەنشىكتەگى بارلىق سۋ شارۋاشىلىعى نىساندارىندا قۇرىلىستار ارقىلى تاسقىن سۋدى اپاتسىز وتكىزۋ بويىنشا ءىس-شارالار جوسپارىنا سايكەس, كوتەرگىش مەحانيزمدەر مەن ەلەكترومەحانيكالىق قوندىرعىلاردى تەكسەرۋ جانە سىنامالاۋ وتكىزىلگەن. بۇعان قوسا, 2017 جىلعى 10 اقپاننان باستاپ تاۋلىك بويعى كەزەكشىلىك ۇيىمداستىرىلعان, تۇراقتى بايلانىس قامتاماسىز ەتىلگەن.
تاسقىن سۋ قۇبىرلارىنا بايلانىستى ءتوتەنشە جاعدايدا «قازسۋشار» رمك-دە ينەرتتىك ماتەريالداردىڭ, ججم (جانار-جاعارماي ماتەريالدارى) اپاتتى قورى قۇرىلعان, ارنايى تەحنيكا دايىندالعان جانە سۋ شارۋاشىلىعى وبەكتىلەرىندەگى ەلەكتر جەلىلەرىنىڭ اپاتى بولعان جاعدايدا ديزەلدى ەلەكتر ستانسالارى دايىندالعان.
«جالپى, بۇگىنگى كۇنى رەسپۋبليكاداعى سۋ قويمالارىندا سۋ شارۋاشىلىعى جاي-كۇيى تۇراقتى جانە ۇنەمى باقىلاۋعا الىنعان», – دەپ اتاپ ءوتتى ي.ابىشەۆ. سونىمەن قاتار, ي. ابىشەۆ وڭتۇستىك قازاقستان وبلىسىن اۋىز سۋمەن قامتاماسىز ەتۋ جونىندە ايتتى. ونىڭ ءسوزىنە قاراعاندا, ۇستىمىزدەگى جىلى اۋىل شارۋاشىلىعى مينيسترلىگىنىڭ سۋ رەسۋرستارى كوميتەتى مەن «WIND POWER GmbH» گەرمانيا فيرماسىنىڭ اراسىندا ەكىجاقتى مەموراندۋمعا قول قويىلعان. قۇجاتتا ەلەكتر ەنەرگياسىن ءوندىرۋ ارقىلى قۋاتتىلىقتى ارتتىرىپ, وڭتۇستىك قازاقستان وبلىسى حالقىن ساپالى اۋىز سۋمەن قامتاماسىز ەتۋگە بار كۇشتى بىرىكتىرۋ, سونداي-اق, جاڭا گەنەراتسيالىق قۋاتتى قۇرۋ مۇمكىنشىلىگىمەن جاڭا سۋ قويمالارىن سالۋ جانە قولدانىستاعىلاردى قايتا جاڭارتۋعا قاتىسۋ كوزدەلگەن.
بۇل كەلىسىم, قازىعۇرت, سارىاعاش, ماقتاارال, شاردارا اۋداندارىنىڭ ەلدى مەكەندەرىن جانە شىمكەنت قالاسىن اۋىز سۋمەن قامتۋدا ۇلكەن باستاما بولىپ تابىلادى.