1963 جىلى اشىلعان وسى ۋنيۆەرسيتەتتە ءار سالاداعى تاڭداۋلى ماماندار ۇلتىمىزدىڭ فولكلورلىق مۇرالارىنان باستاپ سول زامانداعى اسا ءىرى تۇلعالارعا دەيىنگى ارالىقتاعى بۇكىل ادەبي, مادەني, عىلىمي شىعارماشىلىقتى قامتيتىن 500-دەن اسا لەكتسيا وقىپتى.
وسى ۋنيۆەرسيتەتتىڭ قولعا الۋىمەن 70-جىلدارعا دەيىن ءوز ولكەسىنەن ارىگە تانىلا قويماعان سىر بويىنىڭ جىراۋلىق ءداستۇرى بۇكىل ەلىمىزگە ءمالىم بولىپ, كەڭ تاراعان. وسى ۋنيۆەرسيتەتتىڭ باستاۋىمەن ايتىس ونەرى جاندانعان. جىرشىلىق, تەرمەشىلىك ونەردىڭ, شەرتپە كۇيدىڭ باعى جانۋىنا, حالىق كومپوزيتورلارىنىڭ رەسپۋبليكا كولەمىندە تانىلۋىنا زور ەڭبەك ەتكەن ۋنيۆەرسيتەتتىڭ باسىندا اكادەميك راحمانقۇل بەردىباي تۇردى.
ءبىر عانا مىسال, كەڭەس زامانىندا ەكەۋارا ايتىستىڭ قانداي تۇرىندە دە وقۋ ورىندارىنىڭ, باسقا دا كىشىگىرىم ساحنالارعا شىققان جۇپتاردىڭ قاعازعا قاراپ ايتىسقانىن كوزى كورگەن ادامدار ءالى بار ارامىزدا. ەگەر ايتىسكەرلەر بۇگىندە قولما-قول جانىنان سۋىرىپ شىعارىپ ايتىپ جۇرسە, بۇل جانردىڭ جايقالعانىن, دامىعانىن كورسەتەدى. «ءبىر ولەڭى ءبىر ەلدىڭ مۇراسىنداي» دەمەكشى, ءبىر عانا قوعامدىق قىزمەتىنىڭ ءوزىندە حالقىنا ولشەۋسىز ەڭبەك ەتكەن راحمانقۇل بەردىباي سياقتى اكادەميكتەردىڭ عىلىمي مۇراسى تۋرالى ايتۋ, جازۋ ءۇشىن تاڭدى تاڭعا ۇرۋ كەرەك ەكەنىن ءوزىڭىز دە پايىمداي بەرىڭىز. بىراق, ولاردىڭ عىلىمي مۇراسىن دا, مادەنيەتىمىزگە سىڭىرگەن ولشەۋسىز ەڭبەگىن دە ناسيحاتتاۋ, كەيىنگى جاستاردىڭ ساناسىنا قۇيۋ پارىز بولىپ قالا بەرمەك.
وسى ورايدا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى م.جۇماباەۆ اتىنداعى ادەبي بىرلەستىكتىڭ «القا» كلۋبى ۇيىمداستىرعان «تولاعاي تولقىن تاعىلىمى» اتتى عىلىمي سەميناردىڭ ستۋدەنت-جاستارعا بەرگەن اسەرى مول بولدى. تولاعاي تولقىن دەگەنىڭىز وسى – راحمانقۇل بەردىباي, قاجىم جۇماليەۆ, ءمۇسىلىم بازارباەۆ, زەينوللا قابدولوۆ, سەرىك قيراباەۆ, نىعمەت عابدۋللين سىندى اكادەميكتەر مەن پروفەسسورلاردىڭ ءتىزىمى بولىپ جالعاسا بەرەدى. ءجانە بۇلاردىڭ بارلىعى بيىل توقسان جاسقا شىعىپ وتىر. ولاردىڭ حالقىمىزدىڭ ادەبيەتىنە, مادەنيەتىنە سىڭىرگەن ولشەۋسىز ەڭبەكتەرى جايىندا ۋنيۆەرسيتەتتىڭ پروفەسسورلارى كەڭىنەن تولعادى.
ايگۇل سەيىلوۆا,
«ەگەمەن قازاقستان»