ءتۇس اۋا اسپاندى بۇلت تۇتاستاي تورلادى دا ءبىر كەزدە كۇتپەگەن جەردەن ۇشقىنداپ قار جاۋدى. سالدەن سوڭ ۇساق قار تۇيىرشىكتەرى ىرىلەنىپ جاپالاقتاپ جاۋا باستادى. وسى ساتتە تاڭەرتەڭگىلىك ادامداردى دىردەكتەتىپ جىبەرگەن ىزعىرىق جەل دە باسەڭدەپ توڭىرەكتىڭ ءبارى جىلىنىپ سالا بەرگەندەي كورىندى.
البەتتە مۇنىڭ ءوزى ناۋرىزدىڭ اقشاقارى ەدى. «قاردىڭ باسىن قار الار» دەمەۋشى مە ەدى مۇندايدا دانا حالقىمىز. سونداي-اق ناۋرىز كۇنى جاۋعان قار – تازالىق پەن پاكتىكتىڭ, جاقسىلىق پەن قۇت-بەرەكەنىڭ حابارشىسىنداي كورىنەتىنى دە بار. سونىمەن بىرگە, ناۋرىزدىڭ اقشاقارى ادەمىلىك پەن تابيعاتتىڭ ەرەكشە ءارى كەلىستى كورىنىسى دە بولا الادى. بۇل جونىندە حالىق اۋىز ادەبيەتىندە نەبىر تاپتىرماس تاماشا تەڭەۋلەر مەن ەپيتەتتەر دە بار ەكەنى بەلگىلى. ايتالىق, قىز جىبەك ەپوسىنىڭ ءبىر قايىرماسى بىلاي دەپ كەلمەۋشى مە ەدى: «قىز جىبەكتىڭ اقتىعى, ناۋرىزدىڭ اقشاقارىنداي. اق بەتىنىڭ قىزىلى اق تاۋىقتىڭ قانىنداي».
ناۋرىزدىڭ اقشاقارى جوعارىدا ايتىلعانداي الداعى قۇت-بەرەكەنىڭ باسى بولسا يگى.
تەمىر قۇسايىن,
«ەگەمەن قازاقستان»
اقتوبە