قازاقستاننىڭ برازيلياداعى ءتوتەنشە جانە وكىلەتتى ەلشىسى قايرات سارجانوۆ وسى ەلدىڭ مەملەكەتتىك ورگاندار قىزمەتكەرلەرىنە, اكادەميالىق, قوعامدىق جانە ىسكەرلىك توپتار وكىلدەرىنە, لاتىن امەريكاسى مەملەكەتتەرى ەلشىلىكتەرىنىڭ ديپلوماتتارىنا مەملەكەت باسشىسى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىنىڭ نەگىزگى قاعيدالارىن ءتۇسىندىرۋ بويىنشا بريفينگ وتكىزدى.
ق.سارجانوۆ ۇسىنىلعان ەكونوميكالىق ءۇشىنشى جاڭعىرۋدىڭ جاڭا جوسپارى تەك قانا جاھاندىق سىندار مەن قاتەرلەرگە قارسى كۇرەس بويىنشا مىندەتتەر ەمەس, بولاشاق ەكونوميكالىق ءوسۋدىڭ بەرىك كوپىرى ەكەنىن اتاپ كورسەتتى. سونداي-اق, ول مەملەكەت باسشىسى بەلگىلەگەن ەكونوميكانى رەفورمالاۋ مەن جاڭعىرتۋ جانە قازاقستاننىڭ جاھاندىق باسەكەگە قابىلەتتىلىگىن قامتاماسىز ەتۋ بويىنشا 5 باسىمدىقتارعا ەكپىن بەردى.
بريفينگكە قاتىسۋشىلار ەكونوميكالىق جاڭعىرۋدىڭ ماڭىزدى قۇجات ەكەنىنە نازار اۋداردى. ولاردىڭ پايىمداۋىنشا, جەدەل تەحنولوگيالىق جاڭعىرۋ ءجونىندەگى جوسپاردىڭ ءساتتى ىسكە اسىرىلۋى ەل دامۋىنا ەرەكشە سەرپىن بەرمەك. ماسەلەن, برازيليا ۇلتتىق كونگرەسىنىڭ بۇرىنعى دەپۋتاتى, «Uniao Planetaria» (برازيليا پلانەتارلىق وداعى) ۇيىمىنىڭ باسشىسى, «TV-Supren» تەلەارناسىنىڭ پرەزيدەنتى ۋليسيس ريدەل, برازيليا ۋنيۆەرسيتەتى حالىقارالىق قاتىناستار ينستيتۋتىنىڭ پروفەسسورى السيديس ۆاز جولداۋداعى باسىمدىقتاردىڭ ورىندالۋى قازاقستاندى الەمدەگى اسا دامىعان 30 ەلدىڭ قاتارىنا قوساتىنىنا سەنىمدى ەكەندىكتەرىن ءبىلدىردى.