ءىس-شاراعا الماتى قالاسى قحا توراعاسىنىڭ ورىنباسارى قازبەك مامسۇروۆ, الماتى قالاسى قحا انالار كەڭەسىنىڭ بەلسەندىلەرى, الماتى تاتار قوعامدىق-مادەني ورتالىعىنىڭ باسشىلىعى, قازاقستان تاتارلارى مەن باشقۇرتتارى قاۋىمداستىعىنىڭ وكىلدەرى, الماتى قالاسى ءماسليحاتىنىڭ دەپۋتاتتارى, قحا مۇشەلەرى, رەسپۋبليكالىق جانە قالالىق ەتنومادەني ءبىرلەستىكتەردىڭ وكىلدەرى, جاستار ۇيىمدارىنىڭ مۇشەلەرى, باق وكىلدەرى مەن قحا وزگە دە قۇرىلىمدارىنىڭ باسشىلارى قاتىستى.
جيىندا ەلباسى ۇسىنعان جاڭا رەفورمالاردىڭ حالىق تاراپىنان قۋاتتالىپ ىسكە اسۋى جايى ءسوز بولدى. ەل ەكونوميكاسىنىڭ قارىشتاپ دامىپ, كەڭگە قانات جايۋىنا, ەلدىڭ ساياسي ومىرىندەگى جاڭا وزگەرىستەر ارقىلى حالىقتىڭ ءال-اۋقاتى ارتىپ, دەموكراتيالىق ۇدەرىستەردىڭ العا جىلجۋى سياقتى نەگىزگى جەتىستىكتەرگە جول اشاتىن جاڭا رەفورما ەل تاريحىنداعى ەلەۋلى وقيعا دەپ باعالاندى. قازاقستان حالقى اسسامبلەياسىنىڭ الماتى قالاسى بويىنشا توراعاسىنىڭ ورىنباسارى قازبەك مامسۇروۆ: «ەلباسى ۇسىنعان جاڭا رەفورمانى تالقىلاۋ كەزىندە قحا بار ەرىك-ءجىگەرىمەن قىزمەت جاسادى. قحا اياسىندا رەفورمانى تالقىلاۋعا ارنالعان 400-دەن استام ءىس-شارا ءوتتى. سونداي-اق, «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى ەلباسىمىزدىڭ جاڭا جولداۋى دا ءوزىنىڭ ماڭىزدىلىعى مەن وزەكتىلىگىن كورسەتۋدە», دەدى ءوزىنىڭ ءسوزىندە.
شارا بارىسىندا جولداۋدا ايتىلعان نەگىزگى باسىمدىقتار دا ءسوز بولدى. «ءبىزدىڭ ەلىمىزدە ءۇلكەن وزگەرىستەر جۇزەگە اسۋدا. قيىندىقتى ەڭسەرىپ, تاۋەلسىزدىكتى نىعايتۋ جولىندا حالقىمىز تالاي جولدان ءوتىپ كەلەدى. بۇل – باسقارۋدىڭ جاڭا تەتىگى. ۋاقىت پەن زامان تالابىنا قاراي ءار نارسە وزگەرىپ دامىپ, العا جىلجىپ وتىرادى. وسىنداي جاۋاپتى كەزەڭدە الماتى قالاسى انالار كەڭەسى اتىنان ساياسي باستامالارعا قولداۋ كورسەتۋ ماقساتىندا
جيىلىپ وتىرمىز. ويتكەنى, بۇل – ءبىز بەن ءسىزدىڭ بولاشاعىمىز, كەلەشەك ۇرپاقتارىمىزدىڭ جارقىن ءومىرى. ەلباسىمىز نۇرسۇلتان ءابىش ۇلى نازارباەۆ ءوزىنىڭ جاڭا جولداۋىندا دا ءبىلىم ساپاسىن ارتتىرۋعا, دەنساۋلىق ساقتاۋ قىزمەتىن ودان ءارى دامىتۋعا, الەمدىك دامىعان جاڭا تەحنولوگيالاردى مەڭگەرۋگە, حالىقتىڭ الەۋمەتتىك-ەكونوميكالىق جاعدايىن جاقسارتۋعا باسا نازار
اۋدارىپ وتىر. سوندىقتان, ۇلت بولىپ ۇيىسىپ, جۇرت بولىپ جۇمىلىپ, پرەزيدەنتىمىزدىڭ جارقىن باستامالارىنىڭ ىسكە اسۋىنا ءار سالانىڭ ماماندارى وزىندىك ۇلەسىمىزدى قوسۋىمىز قاجەت», دەدى انالار كەڭەسىنىڭ ءتورايىمى نۋريا نيازوۆا.
قازاقستان حالقى اسسامبلەياسىنا قاراستى ەتنومادەني بىرلەستىكتەردىڭ وكىلدەرى دە ءوز ويلارىن ورتاعا سالىپ, جاڭا رەفورما جاڭا بەلەستەردى باعىندىرۋ جولىنداعى بەرىك كوپىر ەكەندىگىن ايتتى.
ارمان وكتيابر,
«ەگەمەن قازاقستان»
الماتى