22 ناۋرىز كۇنى بارلىق ەلمەن بىرگە قىزىلوردالىقتار دا ناۋرىز مەرەكەسىن تويلادى. قالاداعى ورتالىق الاڭدا 30 كيىز ءۇي مەن 6 شاتىر تىگىلىپ, استانادا وتەتىن «ەكسپو-2017» حالىقارالىق كورمەسىنە بيلەت ساتىپ الۋعا بولاتىن كورمە پاۆيلونى ۇيىمداستىرىلدى دەپ حابارلايدى قىزىلوردا وبلىسى اكىمىنىڭ ءباسپاسوز قىزمەتى. ورتالىق الاڭدا ءارتۇرلى سپورتتىق ويىندار مەن جارىستار ۇيىمداستىرىلدى. سونداي-اق ناۋرىز كوجە دايىنداۋ سايىسى وتكىزىلىپ, اسپازدار باستى مەرەكەلىك تاعامدى ازىرلەۋ بويىنشا شەبەرلىكتەرىن سىنعا سالدى. ولاردىڭ ونەرىنە كورەرمەندەر مەن جالپىحالىقتىق سەرۋەنگە كەلگەندەر قازىلىق ەتتى.
بارلىق قالا تۇرعىندارى مەن قوناقتارىنا وبلىس اكىمدىگىنىڭ شاقىرۋىمەن «تۇركسوي» تۇركى مادەنيەتىنىڭ حالىقارالىق ۇيىمىنىڭ وكىلدەرى ونەر كورسەتىپ, باۋىرلاس 11 حالىقتىڭ اندەرى مەن بيلەرى ورىندالدى. قىزىلوردا وبلىسىنىڭ اكىمى قىرىمبەك كوشەرباەۆ ورتالىق الاڭعا جينالعانداردىڭ بارلىعىن ناۋرىز مەرەكەسىمەن قۇتتىقتاپ, باقىت, بىرلىك پەن بەرەكە تىلەدى.
- بىلتىر ءبىز تاۋەلسىزدىكتىڭ شيرەك عاسىرلىق مەرەيتويىن اۋىزبىرلىكپەن اتاپ وتتىك. جىلدى جەمىستى قورىتىندىلادىق. مەرەيلى جىلى سىر ەلى وراسان زور جەتىستىكتەرگە قول جەتكىزدى. وڭدەۋ ونەركاسىبىن دامىتۋ جانە تۇرعىن ءۇي قۇرىلىسىنىڭ قارقىنى بويىنشا وبلىس رەسپۋبليكا ايماقتارىنىڭ اراسىندا كوشباسشىلار قاتارىندا. ءتورتىنشى جىل قاتارىنان كۇرىشتەن رەكوردتىق ءونىم جيناپ, كۇرىششىلەرىمىزدى ەلباسى ارنايى قۇتتىقتادى,- دەدى قىرىمبەك كوشەرباەۆ.
سونداي-اق, قىزىلوردالىقتاردى مەرەكەلەرىمەن «تۇركسوي» ۇيىمىنىڭ باس حاتشىسى, قر بۇرىنعى مادەنيەت ءمينيسترى دۇيسەن قاسەيىنوۆ قۇتتىقتادى. مەرەكەلەۋ بارىسىندا قىرىمبەك كوشەرباەۆ پەن دۇيسەن قاسەيىنوۆ ەكى ءسابيدىڭ تۇساۋىن كەستى.
مەرەكەدە قىزىلوردالىقتاردى قۋانتقان تاعى جاڭالىق, 12 كوپقاباتتى ۇيدەن تۇراتىن تاعى ءبىر جاڭا مولتەك اۋداننىڭ پايدالانۋعا بەرىلۋى. جاڭا مولتەك اۋداندا 580 وتباسى تۇراتىن بولادى.
بۇدان بولەك «تيتوۆ» شاعىن اۋدانىندا اپاتتى جاعدايداعى ۇيلەردىڭ ورنىنا 100 پاتەرلىك كوپقاباتتى 2 تۇرعىن ءۇي سالىنىپ, تۇرعىندارعا تابىس ەتىلدى.
وبلىس اكىمى قىرىمبەك كوشەرباەۆ جاڭا قونىس يەلەرىن ناۋرىز مەرەكەسىمەن قۇتتىقتاپ, قۇرىلىسشىلارعا جەمىستى ەڭبەكتەرى ءۇشىن ريزاشىلىعىن جەتكىزدى.
- ەلباسى تاپسىرماسىمەن بيىل «نۇرلى جەر» مەملەكەتتىك باعدارلاماسى ىسكە اسىرىلادى, ونىڭ اياسىندا ەلىمىزدە الداعى 15 جىلدا 1,5 ميلليون وتباسىن تۇرعىن ۇيمەن قامتاماسىز ەتۋ كوزدەلۋدە. بۇل ماقساتتى جۇزەگە اسىرۋ ىسىندە دە سىر ەلى كوشباسشىلار قاتارىندا بولاتىندىعىنا كامىل سەنەمىز,- دەدى ول. ايتا كەتەيىك, سوڭعى 4 جىلدا قىزىلوردا قالاسىندا جاڭادان 11 شاعىن اۋدان بوي كوتەرىپ, 7 مىڭنان استام وتباسى باسپاناعا قول جەتكىزدى. قۇرىلىس جۇمىستارى بارىسىندا 20 مىڭنان اسا ادام جۇمىسپەن قامتىلدى. - جىل وتكەن سايىن تۇرعىندار سانىنىڭ, ونىڭ ىشىندە جاس وتباسىلاردىڭ قاتارى ارتىپ كەلە جاتقاندىعى قۋانتادى. سوڭعى 2 جىلدا بەس مىڭنان اسا جۇپ نەكەگە تۇرعان بولسا, جاڭا جىلدان بەرى 500-دەي جاس شاڭىراق يەلەرى وتاۋ قۇردى. بۇل – قىزىلوردالىقتاردىڭ ءوز ەلىنە, بولاشاققا جانە ەلباسى ساياساتىنا سەنىممەن قارايتىندىعىنىڭ ايقىن بەلگىسى,- دەدى وبلىس اكىمى.
ەرجان بايتىلەس
"ەگەمەن قازاقستان"
قىزىلوردا