وبلىستىق قازاق دراما تەاترىنىڭ جاس ارتىستەرى جانە وبلىستاعى ونەرپاز جاستاردىڭ كۇشىمەن وتكەن شارا حالقىمىزدىڭ جاراسىمدى ءداستۇرىن جاڭعىرتقانداي بولدى. ەرتەدە ۇلكەن كىسىلەر جول ءجۇرىپ كەتكەندە, قىز-جىگىتتەردىڭ ءبىر ۇيگە جينالىپ, وتكىزگەن ساۋىق كەشىن «باستاڭعى» دەپ اتاعان. بۇل كۇندە باستاڭعىنىڭ اتى بەلگىلى بولسا دا, زاتى كونەرە باستاعانى تاعى شىندىق.
ونەرپاز جاستار ءازىل-قالجىڭعا قۇرىلعان «باستاڭعى» كەشىندە حالقىمىزدىڭ ۇمىتىلا باستاعان داستۇرلەرىن, رۋحاني قۇندىلىقتارىمىزدى ەسكە سالىپ وتىردى. سونىمەن قاتار جاستىق داۋرەنگە ساي جاراسىمدى كورىنىستەردى, ۇلتتىق كيىمدەردىڭ ءسان ۇلگىسىن كورسەتتى. ارينە, كەش بولعان سوڭ, ءان مەن جىرعا دا كەڭىنەن ورىن بەرىلدى. جالپى كەشتىڭ ماقساتى دا ۇلتتىق قۇندىلىقتاردى ناسيحاتتاۋعا ارنالسا كەرەك. سونىمەن قاتار, كورەرمەندەر كەشتە جاڭا تالانتتاردىڭ ەسىمىن تۇڭعىش ەستىدى.
وبلىستا ءبىرىنشى رەت وتكىزىلىپ وتىرعان كەش ۇلتتىق ناقىشقا, بوياۋعا بايلىعىمەن دە كورەرمەندەردى ريزا ەتتى. «مەن وڭىردە «باستاڭعىنىڭ» باستالعانىنا قۋاندىم. ۇلتتىق قۇندىلىقتارىمىزدى ناسيحاتتاماسا كونەرە بەرەتىنى, كەيىنگى ۇرپاقتىڭ ونى مۇلدەم ۇمىتارى حاق.ماعان بۇگىنگى جاستاردىڭ قازاقى قالجىڭدارى, ۇلتتىق ويىندار مەن جاستىق شاققا ءتان جاراسىمدى مىنەزدەردى, بىرلىككە, دوستىققا, شىنايىلىققا تاربيەلەيتىن سالتتارىمىزدى كورسەتە بىلگەنى قاتتى ۇنادى» دەيدى كورەرمەن باقىتگۇل سۇلەيمەنوۆا.
«باستاڭعىعا» جينالعانداردىڭ قاراسى كوپ بولدى. تەاتردىڭ زالى لىق تولدى. ءان مەن جىرعا, قازاقى ءازىل-قالجىڭعا شولىركەگەن جۇرتشىلىق ساحناداعى جاستاردى شاپالاق ۇرىپ, قولپاشتاۋدان دا كەن دە ەتكەن جوق. ۇلتتىق دۋمان كەشتىڭ وزەگىندەي بولعان الداردى جاس اكتەر ولجاس بەگايداروۆ جاقسى الىپ شىقتى. ۇلتتىق دۋماندى وتكىزۋ جونىندەگى ونەرلى جاس گۇلدەن مولداحمەتوۆانىڭ باستاماسىن وبلىستىق مادەنيەت باسقارماسى دا قىزۋ قولدادى, ال ستسەناريىن جۋرناليست, اقىن ابىلاي ماۋدانوۆ جازدى.
«باستاڭعىنى» تەك ناۋرىزعا تەلىپ قويماي, الداعى ۋاقىتتا ءار مەرەكەدە وتكىزۋدى ويلاستىرىپ وتىرمىز. ويتكەنى ۋاقىتتىڭ تىعىزدىعىنا قاراماي, «باستاڭعىنىڭ» وتۋىنە قوستانايداعى ءانشى, كۇيشى, اقىن جاستاردىڭ بارلىعى دا اتسالىستى. الداعى ۋاقىتتا بۇل ۇلتتىق دۋماندى دامىتا تۇسەتىن بولامىز» دەيدى ابىلاي ماۋدانوۆ.
ءنازيرا جارىمبەوۆا
«ەگەمەن قازاقستان»