بەرەرى كوپ سايىن دالامىزدىڭ قار كوبەسى سوگىلىپ,ءار جەرى,توبە,ادىرلاردىڭ باسى قارا قوشقىلدانىپ قالىپتى.ءبىز ءۇي جانىنا كەلىپ توقتاعاندا,كۇن دە ساسكەگە تاقاپ قالعان-دى.ءۇي جاققا بەت الا بەرگەنىمىزدە, اياعىنداعى كەبىسىن تارپىلداتىپ مال قورا جاقتان كەلە جاتقان «قارا جەڭگەمدى» كوردىم.انادايدان كورگەن مەنى: – «كىشى ۇل-اۋ», اۋزىڭنىڭ سالىمى بار ەكەن,سارى ۋىزعا ءدوپ كەلدىڭ,ەكى كۇن بولدى,قىزىل الا سيىردىڭ ۋىزىن جيناپ ءجۇر ەدىم دەپ, − اڭقىلداپ قارسى الىپ جاتىر. مەنىڭ ءىشىم جىلىپ سالا بەردى. ارقاشان بالا كەزىمدە ەركەلەتىپ قويعان اتىمەن اتاپ, ىلعي وسىلاي قارسى الاتىن جانى جايساڭ جەڭگەمنىڭ قۇشاعىنا ەنە بەردىم. كورمەگەلى ءبىر ايعا تولماسا دا, كوپتەن كورمەگەندەي, سالدىرلاپ نەمەرە ىنىلەرىم مەن قارىنداستارىمنىڭ ساۋلىعىن ايتىپ, اۋىلدىڭ ءبىراز جاڭالىعىن ءتىزىپ تۇرىپ جەتكىزدى. ۋىز دەمەكشى, كوز الدىما بال داۋرەن بالالىق شاعىم ەسىمە ءتۇستى. اق جاۋلىقتى اجەلەرىمىز بەن مەيىربان انالارىمىز ۋىزعا ەرەكشە ءمان بەرىپ باعالاي بىلگەن. ۋىز دەگەنىمىز − جاڭا بۇزاۋلاعان سيىردىڭ, قوزىلاعان قويدىڭ, لاقتاعان ەشكىنىڭ العاشقى ءسۇتى. العاش تولدەگەن مالدى سارقىپ ساۋماي, تولىنە قالدىرىپ وتىرادى. ۋىز قويۋ بولسا − سارى, ال سۇيىقتاۋ بولسا-اق ۋىز دەپ ايتاتىنى ەسىمدە قالىپتى.وسى ءبىر ۇلتتىق تاعامدى بالا كەزىمدە اجەلەرىمىز قويدىڭ بۇيەنىنە تولتىرىپ پىسىرگەنىن دە كوردىم.سيىر بۇزاۋلاعاننان كەيىن ەكى-ءۇش كۇن وتكەن سوڭ اتا داستۇرىمەن, قىسقى سوعىمنان قالعان ەتتى ءپىسىرىپ, اعايىن-تۋىستار, كورشى قولاڭدار مەن جورا-جولداستار شاقىرىلىپ ۋىز بەرەدى. تابيعاتتىڭ ۇلىلىعى شىعار, جاس تولدەگەن انالىق ۋىزىنداعىداي قۋاتتىلىق ايەل اناعا ءتان. سوندىقتان بولار, ءبىزدىڭ اتام قازاق «ۋىزعا جارىعان» دەگەن ءسوز قالدىرعان. جارىقتىق ۋىزدىڭ قۇندىلىعى بولار, جەلىندەگەن مالدىڭ جەلىنى تولىپ, تىرسيعانمەن, ۋىز جارماي تولدەمەيتىنى تاعى بار ەكەنىن اۋىلدىڭ قاريالارىنان تالاي ەستىدىم. ايتايىن دەگەنىم «قارا جەڭگەمنىڭ» مەتالل ىدىسقا ءپىسىرىپ بەرگەن ۋىزى مەن ءسۇر بولۋعا اينالعان جىلقى ەتىنەن اۋىز ءتيىپ, اتا سالتىمىزدىڭ, سونىڭ ىشىندە ۇلتتىق تاعامىمىزدىڭ ءتىل ۇيىرەر دامىنە تامساندىم. كونەنىڭ كوزى ۇمىتىلماعانىنا, قازاق اۋىلىنداعى ۇلتتىق ءداستۇردىڭ جوعالىپ كەتپەۋىنە دانەكەر بولىپ جۇرگەن «قارا جەڭگەمدەي» اق جاۋلىقتى, كوڭىلى اشىق جاندارعا ءدان ريزا بولىپ, بويىما قۋات, كوڭىلىمدە شاتتىق ورناعانداي بولدى. باتاگوي اتا-بابالارىمىز ناۋرىز مەيرامىندا «اق مول بولسىن» دەپ اق جول تىلەپ جاتقانى,ناعىز قازاقي ءداستۇرىمىز ەمەس پە!
امانگەلدى ەستاي, زەينەتكەر اقمولا وبلىسى, ەسىل اۋدانى, كراسيۆوە اۋىلى