«قايرات» فۋتبول كلۋبىنىڭ باس جاتتىقتىرۋشىسى كاحابەر تسحادادزە قازاقستان سۋپەركۋبوگى ءۇشىن «استانامەن» وتەتىن ماتچ جايلى وي ءبولىستى.
«مىنە, جاڭا ماۋسىم دا باستالايىن دەپ قالدى. بۇل جىل دا ادەتتەگىدەي تارتىستى وتەدى دەپ سەنەمىن. ال بۇگىنگى جاتتىعۋعا كەلەر بولساق, اۋا رايىنا بايلانىستى جوسپارىمىزدى وزگەرتۋگە تۋرا كەلدى. سول ءۇشىن جاتتىعۋ جۇمىستارى بازامىزدا وتەدى», – دەدى تسحادادزە.
قازاقستان سۋپەركۋبوگىنىڭ سوڭعى ەكى ويىنى ءدال وسى كوماندالار اراسىندا وتكەن بولاتىن. ەكەۋىندە دە جەڭىمپاز كوماندا پەنالتي سەرياسى ارقىلى انىقتالعان.
«پەنالتي سەرياسىنا ەمەس نەگىزگى 90 مينۋتقا كوڭىل بولەمىز. ەرتەڭ الاڭعا شىعاتىن نەگىزگى قۇرامدى دا جوسپارلاپ قويدىم», – دەدى ول.
«استانانىڭ» وقۋ-جاتتىعۋ جيىندارىندا وتكەن جولداستىق كەزدەسۋلەرىنىڭ بىرىنە كاحابەر تسحادەدزەنىڭ بارىپ كورگەنى حابارلانعان. ەلوردالىقتاردىڭ ويىن مانەرىندە قانداي وزگەرىستەر بولعان ەكەن؟
«ولاردىڭ وزىندىك فيلوسوفياسى بار. كوماندانىڭ ويىنى ايتارلىقتاي وزگەرگەن دەپ ايتا المايمىن. بىراق ولارعا جاڭادان يۆان ماەۆسكي مەن ازدرەن لۋلاكۋ كەلدى. ازدرەننىڭ ويىنى ۇنادى. ايىپ الاڭىندا بارىن سالىپ وينايدى ەكەن. سونداي-اق, جاس تالانت ديدار جالمۇقاندى ەرەكشە اتاۋعا بولادى. «استانا» قايتا كۇشەيە تۇسكەندەي اسەر قالدىردى», – دەدى «قايرات» جاتتىقتىرۋشىسى.
ەستەرىڭىزدە بولسا, قوس كوماندانىڭ اراسىندا وتكەن ەل كۋبوگىنىڭ فينالىندا توقتاۋسىز قار جاۋىپ, «قايرات» ءوز ويىنىن كورسەتە الماعان. الماتىعا مىنە, تاعى دا قار جاۋدى.
«اۋا رايى بارىنە بىردەي. استانالىقتارمەن وتكەن سوڭعى ويىندا اۋا رايى كەرى اسەرىن تيگىزگەنى انىق. بىراق بۇل جولى ساتتىلىك ءبىزدىڭ جاقتا بولىپ, جانكۇيەرلەرىمىزدى قۋانتامىز دەگەن ۇمىتتەمىن. «استانانى» قاس دۇشپانىمىز دەپ ەسەپتەمەيمىن. ءبىز تەك الاڭدا عانا ءبىر-بىرىمىزگە قارسىلاسپىز», – دەدى باس باپكەر.
الماتىلىقتاردىڭ ساپىن الداعى ۋاقىتتا تاعى ءبىر شابۋىلشى تولىقتىرۋى مۇمكىن.
«قىستا لايىقتى فۋتبولشى تابۋ قيىن. ارنايى توپ وسى جۇمىستارمەن اينالىسىپ جاتىر. كومانداعا تاعى ءبىر جوعارى دەڭگەيلى شابۋىلشى قاجەت. ال باۋىرجان تۇرىسبەككە كەلەر بولساق, الاڭداعى ءرولىن اۋىستىردىق. قازىر شابۋىل شەبىندە وينايدى. دەڭگەيىنە كوڭىلىمىز تولادى. بىزدە ءبىرىنشى نەمەسە ەكىنشى قۇرام دەپ بولىنبەيدى. ءار ويىنشىمىز ءبىز ءۇشىن ماڭىزدى. كىم دايىن سول الاڭعا شىعادى», – دەدى ول.
ايتا كەتەيىك, «قايرات» پەن «استانا» اراسىنداعى ماتچ 4 ناۋرىز كۇنى الماتى قالاسىنداعى ورتالىق ستاديوندا ساعات 15:00-دە وتەدى.