ۇكىمەت پرەزيدەنتتىڭ شارۋاشىلىق باسقارۋ سالاسىنداعى 35 وكىلەتتىگىن تومەنگى دەڭگەيگە بەرۋ جونىندە زاڭ جوباسىن دايىندايدى. بۇل تۋرالى بۇگىن ءوتىپ جاتقان پارلامەنت پالاتالارىنىڭ بىرلەسكەن وتىرىسىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ايتتى.
«ونداعى وزگەرىستەر قوعامدى ارى قاراي دەموكراتيالاندىرۋعا باعىتتالعان. پارلامەنتتىڭ ءرولىن ارتتىرىپ, ۇكىمەتتىڭ دەربەستىگى مەن جاۋاپكەرشىلىگىن كۇشەيتۋگە ارنالعان جوبالار. ول قۇقىق قورعاۋ, سوت جۇيەسى, كونستيتۋتسيالىق باقىلاۋدىڭ نەگىزدەرىن دە جەتىلدىرەدى. سونىمەن بۇل جوبادا پارلامەنت تالقىلاۋىنا كونستيتۋتسيانىڭ 23 بابىنا وزگەرىستەر ۇسىنىلىپ وتىر. زاڭدار دا ۇزاماي پارلامەنتكە ەنگىزىلەتىن بولادى. ءبىز وسى زاڭدار ارقىلى بيلىك تارماقتارى مەن ولاردىڭ اراسىنداعى وكىلەتتىكتەردى بارىنشا ءتيىمدى ەتىپ قايتا بولەمىز. وسىنىڭ بارلى جاھاندىق جانە وڭىرلىك سىن-قاتەرلەرگە ۋاقىتىلى جاۋاپ بەرىپ, الدىن الۋ ءۇشىن جاسالۋدا», - دەدى ەلباسى.
نۇرسۇلتان نازارباەۆتىڭ ايتۋىنشا, كونستيتۋتسيالىق رەفورما 5 سالادان تۇراتىن ۇلت جوسپارىمەن جانە جاقىندا جاريالانعان ءۇشىنشى جاڭعىرۋمەن قاتار جۇزەگە اسىرىلۋى ءتيىس. "مەنىڭ جولداۋىمدا ايتىلعان مىندەتتەر زاڭ شىعارۋشى, اتقارۋشى ورگاندارعا ەرەكشە جاۋاپكەرشىلىك ارتادى. جاڭا جاھاندىق جاعدايدا مەملەكەتتىڭ ستراتەگيالىق باعدارى وزگەرمەيدى. ءبىزدىڭ مەجەمىز دامۋ كوشىنىڭ باسىنداعى 30 ەلدىڭ قاتارىندا بولۋ. نەگىزگى ماقسات - سول. ساياسي جانە تەحنولوگيالىق جاڭعىرۋدىڭ ماقساتى دا وسى», - دەدى نۇرسۇلتان نازارباەۆ.