قازاقستاننىڭ وزىنە ءتان ساياسي مودەلى - تۇراقتى پرەزيدەنتتىك بيلىك ساقتالادى. بۇل تۋرالى بۇگىن قازاقستان پارلامەنتى پالاتالارىنىڭ بىرلەسكەن وتىرىسى بارىسىندا ەلباسى نۇرسۇلتان نازارباەۆ ءمالىم ەتتى.
«جاڭا جاعدايدا پارلامەنتكە, ۇكىمەتكە, بارلىق اتقارۋشى ورگاندارعا زور جاۋاپكەرشىلىك جۇكتەلەدى. ساياسي جاڭعىرتۋ كونستيتۋتسيالىق رەفورمالار ارقىلى ناقتى جۇزەگە اسىرىلاتىن بولادى. ءبىر ايقىن ماسەلە - قازاقستاننىڭ وزىنە ءتان ساياسي مودەلى, ياعني تۇراقتى پرەزيدەنتتىك بيلىك ساقتالادى. سونىمەن بىرگە پارلامەنت پەن ۇكىمەتتىڭ وكىلەتتىكتەرى نەعۇرلىم كەڭەيىپ, ولاردىڭ ءرولى ارتا تۇسەدى. ءوزىمنىڭ تاجىريبەمە سۇيەنە وتىرىپ ايتايىن, وكىلەتتىكتى ءتيىمدى قولدانۋدىڭ ءوزى اسقان ونەر. ءبىزدىڭ پرەزيدەنتتىك بيلىك جايىندا وسى جىلداردىڭ ىشىندە وزىمىزدە دە, سىرتتا دا نەشە ءتۇرلى ءسوز ايتىلعانىن بىلەمىز. بىراق ءبىز ەڭ الدىمەن وزىمىزگە, قازاقستاندىقتارعا, حالقىمىزعا نە كەرەك, سونىمەن جۇردىك. وسى ناعىز دۇرىس جول. بۇل قاجىرلى ەڭبەك پەن ىجداعاتتىلىقتى قاجەت ەتەدى», - دەدى پرەزيدەنت.
مەملەكەت باسشىسى ساياسي جاڭعىرۋدىڭ تەحنولوگيالىق جاڭعىرۋمەن قاتار قولعا الىنۋى ايرىقشا ماڭىزدى ەكەندىگىن باسا ايتتى.
«ولار ءبىرىن-ءبىرى كۇشەيتە, تولىقتىرا ءتۇسۋى قاجەت. كونستيتۋتسيالىق رەفورما 5 سالادان تۇراتىن ۇلت جوسپارىمەن جانە جاقىندا جاريالانعان ءۇشىنشى جاڭعىرۋمەن قاتار جۇزەگە اسۋى ءتيىس. ءبىر-بىرىمەن جالعاسىپ جاتادى. مەنىڭ جولداۋىمدا ايتىلعان مىندەتتەر زاڭ شىعارۋشى, اتقارۋشى ورگاندارعا ەرەكشە جاۋاپكەرشىلىك ارتادى. جاڭا جاھاندىق جاعدايدا مەملەكەتتىڭ ستراتەگيالىق باعدارى وزگەرمەيدى. ءبىزدىڭ مەجەمىز دامۋ كوشىنىڭ باسىنداعى 30 ەلدىڭ قاتارىندا بولۋ. نەگىزگى ماقسات - سول. ساياسي جانە تەحنولوگيالىق جاڭعىرۋدىڭ ماقساتى دا وسى», - دەدى نۇرسۇلتان نازارباەۆ.