استانادا مەملەكەت باسشىسى نۇرسۇلتان نازارباەۆتىڭ قاتىسۋىمەن پارلامەنتتىڭ قوس پالاتاسىنىڭ بىرلەسكەن وتىرىسى ءوتىپ جاتىر.
كۇن تارتىبىندە "قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭ جوباسى.
"بۇگىن ءبىز ەل ءۇشىن تاريحي ماسەلەنى شەشۋ ءۇشىن جينالىپ وتىرمىز. وزدەرىڭىز بىلەسىزدەر, قاڭتاردا كونستيتۋتسيالىق رەفورما جاساۋ تۋرالى باستاما كوتەردىم. بۇگىندە زاڭ جوباسى دايىندالدى. زاڭ جوباسى ءبىر اي بويى قوعامدا تالقىلاندى. وعان ساياسي پارتيالار, قوعامدىق بىرلەستىكتەر, بەلسەندىلەر مەن ازاماتتىق قوعام قاتىستى. ماسەلەگە قاتىستى 6 مىڭداي ۇسىنىس ءتۇستى. كەي باپتار ازاماتتاردىڭ ەرەكشە نازارىنا ىلىكتى. بىرلەسە اتقارىلعان جۇمىستا كەم-كەتىك بولماۋى ءتيىس", - دەدى نۇرسۇلتان نازارباەۆ.
ەلباسى قوعامدىق ساياسي ورتادا رەفورماعا قاتىستى 2 مىڭنان اسا, عىلىمي-شىعارماشىلىق ورتادا 50-دەن اسا رەسپۋبليكالىق دەڭگەيدەگى باسقوسۋ, وڭىرلەردە 10 مىڭعا جۋىق شارا وتكىزىلىپ, وعان 2 ميلليوننان استام ادام قاتىسقانىن ايتتى.
«ون جىل بۇرىن پارلامەنت وكىلەتتىگىن كەڭەيتۋ ۇدەرىسى ىسكە قوسىلعان بولاتىن. وسى ورايدا پارلامەنت پەن ۇكىمەتكە قاجەتتى تەتىكتەردى ءبولىپ بەردىك. وسىنىڭ الدىنداعى رەفورمالار وڭتايلى ناتيجەلەردى بەردى, حالىق جانە الەمدىك قوعامداستىق تاراپىنان جاقسى قابىلداندى. 25 جىل ىشىندە قول جەتكىزگەن ناتيجەلەر تۋرالى وتكەن جىلى بۇل مەرەيتويدى اتاپ ءوتۋ كەزىندە كەڭىنەن ايتىلعان بولاتىن»,-دەدى ەلباسى.
سونىمەن قاتار پرەزيدەنت ۇكىمەتتىڭ دەربەستىگى كەڭەيەتىنىن, ياعني مينيسترلەر كابينەتىنە ەكونوميكانى تىكەلەي باسقارۋ بويىنشا وكىلەتتىك بەرىلەتىنىن, ەل ازاماتتارىنىڭ قۇقىعىن قورعاۋدا جوعارعى سوتتىڭ ءرولى كۇشەيەتىنىن, سونداي-اق كونستيتۋتسيالىق قاداعالاۋدىڭ جۇيەسى نىعاياتىنىن اتاپ ءوتتى.