ەلىمىزدەگى تىنىشتىق, ءتۇرلى ەتنوستار مەن كونفەسسيالار اراسىندا تۇسىنىستىك پەن كەلىسىم, ەلدە جۇرگىزىلىپ جاتقان بەيبىت ساياسات ءۇشىن العىس ايتۋ كۇنىنىڭ بەلگىلەنگەنى قازاقستاندىقتاردىڭ جاڭا عاسىرداعى جاقسى ۇردىستەرىنىڭ ءبىرى. كۇندەلىكتى ومىردە, اعىن سۋداي ءوتىپ جاتقان تىرلىكتە تىنىشتىقتىڭ قادىرىنە ەشكىم نازار اۋدارا قويمايدى, ال وسىنداي ناقتى كۇن بەلگىلەنىپ, ەسكە سالىنعاندا ادامنىڭ ويلانىپ, باردى باعالاي بىلۋىنە ءبىر سەرپىن بولاتىنى ءسوزسىز. ءبىز ءماجىلىستىڭ ەڭ جاس دەپۋتاتى, قازاقستان حالقى اسسامبلەياسى دەپۋتاتتىق توبىنىڭ مۇشەسى نارينە ميكاەلياندى ءاڭگىمەگە تارتىپ, وسى كۇننىڭ ءوزى ءۇشىن قانداي ماڭىزى بارىن سۇراعان ەدىك.
– مەنىڭ وتباسىم قازاقستاندا 1955 جىلدان بەرى تۇرىپ كەلە جاتىر.
ناعاشى اتام سوعىسقا قاتىسىپ, تۇتقىنعا تۇسكەن ەكەن. جەڭىستەن كەيىن ونى 10 جىلعا سوتتاپ, ساحا ەلىنە جەر اۋدارادى. سول جاقتا ۇيلەنىپ, كەسىلگەن مەرزىمىن تولىق وتەپ شىعادى. سودان كەيىن تۋعان جەرىنە بارماي, قازاقستاندا قونىس تەۋىپتى. ونىڭ قالعان ءومىرى وسىندا ءوتتى. انام وسىندا ءوستى, اكەم ارمەنيادا تۋعانىمەن, مەنىڭ شەشەمە ۇيلەنگەن سوڭ قازاقستاندىق بولدى. مەن ءوزىم الماتىدا تۋىپ, سوندا وسكەن بالامىن. ءوزىمدى جەرگىلىكتى الماتىلىقپىن دەپ سانايمىن. مەكتەپتى دە, ۋنيۆەرسيتەتتى دە الماتىدا ءبىتىردىم. مەن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ حالىقارالىق قۇقىق فاكۋلتەتىن 2005 جىلى ءۇزدىك ءبىتىردىم. بىرنەشە جىل ارمەنيانىڭ قازاقستانداعى ەلشىلىگىنىڭ الماتىداعى كونسۋلدىق ءبولىمىندە كومەكشى-رەفەرەنت قىزمەتىن اتقاردىم. ودان كەيىن ءبىرنەشە كومپانيادا زاڭگەر بولىپ ىستەدىم. سول قىزمەتتەردە جۇرگەندە ارميان مادەني-ەتنوستىق ورتالىعىنىڭ جۇمىسىنا بەلسەنە قاتىسىپ, جاستار قاناتىنىڭ جەتەكشىسى بولدىم. قازاقستان حالقى اسسامبلەياسىنىڭ جۇمىسىنا دا بەلسەنە ارالاستىم. ال 2016 جىلدىڭ ناۋرىزىنان قحا تىزىمىمەن ارميان ەتنوستىق ورتالىعىنىڭ وكىلى رەتىندە دەپۋتات بولىپ سايلاندىم.
– نارينە گاملەتوۆنا, العىس ايتۋ كۇنى ءسىز ءۇشىن نەنى ءبىلدىرەدى؟ وسىنداي كۇندى بەلگىلەۋدىڭ قانشالىقتى قاجەتتىلىگى بار دەپ ويلايسىز؟
– ءبىز ءبىر-بىرىمىزگە دەگەن قۇرمەتىمىزدى كۇندە ايتىپ, تاتۋ كورشىلىگى مەن سەنىمدى جولداستىعى ءۇشىن ءبىر-بىرىمىزگە كۇندە رازىلىعىمىزدى ءبىلدىرۋىمىز كەرەك. بىراق كۇندە قايتالايتىن بولساق, بۇل اسىل دۇنيەمىزدى اياقاستى ەتىپ الامىز. سوندىقتان ءبىر كۇننىڭ بەلگىلەنگەنى دۇرىس دەپ سانايمىن. قازاقستان حالقى اسسامبلەياسىنىڭ قۇرىلعان كۇنىنە بەلگىلەنگەن وسى كۇنى ءبىر-ءبىرىمىزگە العىسىمىزدى ايتىپ, تاتۋلىق, ۇندەستىك, سەنىم مەن قۇرمەتى ءۇشىن جانىمىزداعى بارلىق جاندارعا العىس ايتۋىمىز قاجەت. ارينە, ەڭ الدىمەن وسىنداي احۋالدى قالىپتاستىرعان ەلباسىمىزدىڭ ساياساتىنا العىسىمىز شەكسىز بولۋى ءتيىس. بەيبىت كۇندى باعالاي ءبىلۋىمىز كەرەك.
– اڭگىمەڭىزگە راحمەت.
اڭگىمەلەسكەن
جاقسىباي سامرات,
«ەگەمەن قازاقستان»