وبلىس ورتالىعىنداعى دوستىق ۇيىندە «قوعامدىق كەلىسىم» بىرلەستىگى بالقار, قاراشاي-شەركەس, قاباردين حالىقتارىنىڭ دەپورتاتسياسىنا ارنالعان «قازاق حالقىنا مىڭ العىس!» اتتى مادەني شارا ءوتتى. «ەلبرۋس» ەتنومادەني ورتالىعى» قوعامدىق بىرلەستىگى ۇيىمداستىرعان جيىنعا قاتىسۋشىلار 1944 جىلدىڭ ناۋرىزىندا سولتۇستىك كاۆكاز حالقىن كۇشتەپ قالاي ەلىمىزگە جەر اۋدارعانى جايلى كينوسيۋجەتتەر كوردى. – مەن ول كەزدە 2-اق جاستا ەكەنمىن. قازاق حالقى جازىقسىزدان قاڭعىرۋعا تۇسكەن حالىقتى رۋحاني كۇيزەلىستەن, كەمسىتۋشىلىك پەن اشتىقتان امان الىپ قالدى عوي. تولەبايدىڭ وتباسىندا 8 ادام بولسا, اكە-شەشەم بار, 11 بالا قوسىلدىق. ءبىر قازاننان اس ىشتىك. قازاق اۋىلى – ءبىزدىڭ ەكىنشى وتانىمىز بولدى. قۇلاعىمىزدا ۇلكەندەردەن ءجيى ەستيتىن ەلبرۋس دەگەن ءبىر-اق ءسوز جۇرەتىن. ءبىزدىڭ ۇلت وكىلدەرى ءۇشىن وسى ءسوزدىڭ قۇدىرەتتى ەكەنىن ەسەيگەن سوڭ بىلدىك قوي, – دەيدى «ەلبرۋس» ەتنومادەني بىرلەستىگىنىڭ ءتورايىمى ءماريام بايرامقۇلوۆا. ءىس-شارا بارىسىندا جەرگىلىكتى اسسامبلەيا توراعاسىنىڭ ورىنباسارى س.جەتپىسباەۆ, قوعامدىق كەلىسىم كەڭەسىنىڭ توراعاسى ي.ابدىقالىقوۆ ءسوز سويلەپ, «ەلبرۋس» قوعامدىق بىرلەستىگىنىڭ مادەنيەتتى, ءتىلدى, رۋحاني قۇندىلىقتاردى جاڭعىرتۋ بويىنشا بەلسەندى جۇمىستارى, سونداي-اق, دوستىقتى, بەيبىتشىلىكتى, ەتنوسارالىق كەلىسىمدى نىعايتۋداعى ۇلەستەرى ءۇشىن العىس ءبىلدىردى. ال تاتار-باشقۇرت اقساقالدار كەڭەسىنىڭ توراعاسى مينير گالەەۆ, «ۆاتان» ازەربايجان اقساقالدار كەڭەسىنىڭ توراعاسى دجافار ماحمۋدوۆ, «پولونيا» پولياكتار قوعامىنىڭ توراعاسى ۆيتالي سۆينتسيتسكي دە اتا-انالارى مەن تۋىسقاندارىنىڭ قيىن تاعدىرلارى جايلى ايتىپ, قازاق حالقىنا العىس ءبىلدىردى. ءيا, وتكەننىڭ اۋىر وقيعاسى بالقارلار مەن قاراشايلاردىڭ, باسقا دا ۇلت وكىلدەرىنىڭ جۇرەگىندە ماڭگى قالدى. قازىر وڭىردە بالقارلار مەن قاراشايلاردىڭ ءتورتىنشى ۇرپاعى تۇرىپ جاتىر. ولار بارلىق سالالاردا ەڭبەك ەتىپ, قىزمەت ىستەۋدە. – مەن قازاق جىگىتىنە تۇرمىسقا شىقتىم. شۇكىر, قۋعىن-سۇرگىنگە ۇشىراعان ۇلت وكىلدەرىنىڭ دە تىنىسى كەڭەيىپ, ۇرپاق جالعاستى. اۋىلدا تۇرعان كەزدەن قازاق تىلىندە سويلەپ وستىك. بىرلەستىكتەگى «جاڭعىرتۋ مەكتەبىندە» ۇل-قىزدارىمىز بالقار, قازاق تىلدەرىن ۇيرەنۋدە. ولاردى ءبىز ەركەلەتىپ «قازاقستاندىق «ەلبرۋستىڭ» بالالارى» دەپ اتايمىز. اكە-شەشەلەردىڭ ساعىنىشىنا اينالعان تاۋدى – ۇلكەندەرگە قۇرمەت, تاعزىم رەتىندە ورتالىقتى «ەلبرۋس» دەپ اتادىق. وبلىستا قاراشاي-شەركەس جانە قاباردين-بالقار ۇلت وكىلدەرىنىڭ 1 200-دەن استامى تۇرسا, ونىڭ 900-ءى بالقارلار. ءوزىمىزدى اسسامبلەيانىڭ كىشكەنتاي وتاۋى دەپ سەزىنەمىز. ەلباسىنا ءاردايىم العىس ايتىپ وتىرامىز, – دەيدى ءماريام بايرامقۇلوۆا. فاريدا بىقاي, «ەگەمەن قازاقستان» پاۆلودار وبلىسى سۋرەتتى تۇسىرگەن ماقسات ايتباي