بقو-دا مادەني نىساندارعا كورنەكتى تۇلعالاردىڭ ەسىمى بەرىلەدى

باتىس قازاقستان وبلىستىق ءماسليحاتى وڭىردەگى بىرنەشە الەۋمەتتىك, مادەنيەت نىسانىنا كورنەكتى تۇلعالاردىڭ ەسىمىن بەرۋ تۋرالى شەشىم قابىلدادى. 1993 جىلى تاۋەلسىزدىك مەرەكەسى كۇنى اشىلعان وبلىستىق قازاق دراما تەاترىنا كسرو حالىق ءارتىسى حاديشا بوكەەۆانىڭ ەسىمىن بەرۋ ماسەلەسى كوپ جىلدان بەرى كوتەرىلىپ جۇرگەن ەدى. الايدا, قازاقستان رەسپۋبليكاسى ۇكىمەتىنىڭ «قا­زاق­ستان رەسپۋبليكاسىنداعى مەم­لەكەتتىك ونوماستيكالىق جۇ­مىس تۇجىرىمداماسىندا» ەلى­مىزگە ايرىقشا ەڭبەگى سىڭگەن قايراتكەر تۇلعالاردى ولار قايتىس بولعانىنا 5 جىل تولعان جاعدايدا عانا ۇلىقتاۋ بەلگىلەنگەن. مىنە, سول مەرزىم ءوتىپ, بقو-نىڭ باس ساحناسى بەلگىلى ءارتىستىڭ ەسىمىن يەلەندى. ال ءاۋ باستان-اق «قادىر ورتا­لىعى» اتالىپ كەتكەن وبلىستىق مادەنيەت جانە ونەر ورتالىعىنا اقىن قادىر مىرزا ءالىنىڭ ەسىمىن بەرۋ الدەقاشان حالىق قولداعان, جۇزەگە اسقان شەشىمدى رەسمي قۇجاتتاۋ دەسە دە بولادى. اقىننىڭ 80 جىلدىعىنا وراي ارنايى سالىنىپ, 2015 جىلى 27 ماۋسىم كۇنى ەسكەرتكىشىمەن بىرگە اشىلعان بۇل ورتالىق – بۇگىندە ورالداعى مادەني شارالار ەڭ ءجيى وتەتىن شاڭىراق. سونداي-اق, دەپۋتاتتار ۇشقىش, حالىق قا­ھار­­مانى حيۋاز دوسپانوۆانىڭ ەسىمىن ورال­داعى №30 جوبب مەكتەپكە, بەلگىلى جازۋشى, حالىق­ارالىق «الاش» سىيلىعىنىڭ يەگەرى مۇقادەس ەسلامعالي ۇلىنىڭ ەسىمىن سىرىم اۋدانىنداعى ورتالىق كىتاپحاناعا بەرۋ ۇسىنىسىن قولدادى. بۇل اتاۋلار رەسپۋبليكالىق ونوماس­تيكالىق كوميسسيا بەكىتكەن سوڭ زاڭدى كۇشىنە ەنەتىن بولادى. قازبەك قۇتتىمۇرات ۇلى, «ەگەمەن قازاقستان» ورال