نەگىزىن بەلگىلى رەجيسسەر لۇقپان ەسەنوۆ قالاعان «تاماشا» ءازىل وتاۋى جاڭا جوبادا جارقىراماق. 40 جىل بويى قازاقى قالجىڭمەن حالىقتىڭ كوڭىلىن كوتەرىپ, كوكەيىن ءتۇرتىپ كەلگەن ۇجىم ەندى تەلەۆيزيالىق نۇسقادا حالىقپەن قاۋىشپاق.
«تاماشا City» اتالاتىن بۇل جوبا سان ءتۇرلى ونەردىڭ باسىن بىرىكتىرمەك. شوۋدىڭ ءاربىر شىعارىلىمى قانداي دا ءبىر تاقىرىپقا ارنالعان ەمىن-ەركىن يمپروۆيزاتسيالىق كونتسەرت تۇرىندە وتەدى. «ەۋرازيا» ارناسىنان ءار جەكسەنبى سايىن كورسەتىلەتىن شوۋ ءبىر باعدارلاما شەڭبەرىندە كورەرمەن نازارىنا «تاماشا» تەاترىنىڭ جاڭا مينياتيۋرالارى, اكتەرلەردىڭ وزدەرى ورىندايتىن مۋزىكالىق نومىرلەر, ينتەراكتيۆتى ويىندار ۇسىنىلادى. كورەرمەن اتالمىش باعدارلاما اياسىندا «تاماشانىڭ» التىن قورىنان ەل جادىنان وشپەيتىن قويىلىمداردى دا كورە الادى.
الماس ءنۇسىپ,
«ەگەمەن قازاقستان»
الماتى