الماتىدا وندىرۋشىلەر مەن تۇتىنۋشىلاردىڭ اراسىن تىكەلەي جالعايتىن ساۋدا ورتالىعى اشىلدى. بۇل باستامانىڭ ارقاسىندا باعانى وسىرەتىن ەكى اراداعى دەلدال ۇعىمى جويىلماق.
«Mizam» اتالاتىن بۇل بازاردىڭ اۋماعى دا اتشاپتىرىم – 2,5 مىڭ شارشى كيلومەتر جانە بۇل كورسەتكىش الداعى جازدا تاعى دا وسە تۇسپەك كورىنەدى. دەلدالسىز ساۋدانىڭ ارزانعا تۇسەتىنى بەلگىلى, بۇل جەردەگى باعا, باسشىلىقتىڭ ايتۋىنشا, ساۋدا ۇيلەرىن بىلاي قويعاندا, قارا بازارداعى نارىقتان دا تومەن بولماق. سونداي-اق, ونىمدەردىڭ ەكولوگيالىق تازا بولۋى دا قاتاڭ باقىلاۋعا الىنادى.
قالا اكىمىنىڭ ورىنباسارى ەرلان اۋكەنوۆتىڭ ايتۋىنشا, جىلىنا 228 ميلليارد تەڭگەگە ازىق-ت ۇلىك تۇتىناتىن تۇرعىنى بار مەگوپوليستەگى بۇل جوبا ەكى تاراپ ءۇشىن دە وتە ءتيىمدى. ساتىپ الۋشى مەن ساتۋشىنىڭ اراسىندا تىعىز قارىم-قاتىناس ورناسا, تاۋاردىڭ ساپاسى جانە ارتادى. سونىمەن بىرگە, بۇل ورتالىق بۇكىل قالاداعى ازىق-ت ۇلىك باعاسىنىڭ تومەندەۋىنە اسەر ەتەدى.
«Mizam» جشس كوتەرمە-بولشەك ساۋدا ورتالىعىنىڭ باسشىسى دوسمۇحان كەرىمبەكوۆ «ەۋروپا مەن ازيانىڭ ءبىراز ەلدەرىن ارالادىق, جيىرما شاقتى بازاردى سالىستىرىپ كوردىك. جاڭا, تىڭ فورمات ىزدەدىك», دەيدى. اقىرى فرانتسيانىڭ «رانجيس» نارىعىنىڭ تاجىريبەسىنە نەگىزدەۋدى ءجون كورىپتى. ساۋدا ورتالىعىندا ءوز ءونىمىن ساتقىسى كەلەتىندەر الىپ-ساتار ەمەس, ناقتى ءوندىرۋشى بولۋى – باستى تالاپ. بۇل ءجىتى تەكسەرىستەن ءوتىپ, ۋاقتىلى قاداعالانىپ تۇراتىنىن ايتادى بازار باسشىلىعى.
ازىرگە تۇساۋى جاڭا عانا كەسىلىپ, ەسىگى ەندى اشىلىپ جاتقان ورتالىقتا 300-گە جۋىق ادام جۇمىس ىستەپ جاتىر. ال, نەگىزگى جوسپار بويىنشا 2000 ادام جۇمىسپەن قامتىلماق. بۇل ءىرى ساۋدا ورتالىعى الداعى ۋاقىتتا ءتاۋلىك بويى قىزمەت كورسەتۋدى جوسپارلاپ وتىر.
الماس ءنۇسىپ,
«ەگەمەن قازاقستان»
الماتى