اقتوبەدە جىلىنا 20 مىڭ توننا قۇس ەتىن وندىرۋگە ارنالعان فابريكا سالىنادى. كاسىپكەر فابريكانى «باتىس قىتاي - باتىس ەۋروپا» تاسجولىنىڭ بويىنداعى اۋىلداردىڭ بىرىنە سالۋ ءۇشىن جەرگىلىكتى بيلىكتەن جەر سۇرادى, دەپ حابارلايدى قازاقپارات.
اقتوبەدە جىلىنا 40 مىڭ توننا شۇجىق ءوندىرىپ, دايىن ءونىمدى ىشكى نارىقتا جانە رەسەيدە ساۋدالايتىن «روكوس» كومپانياسى قۇس فابريكاسىن سالۋدى قولعا الدى. اۋىل شارۋاشىلىعى سالاسىن دامىتۋعا باعىتتالعان جوبا قۇس وسىرۋگە قاجەتتى جەم-شوپتەن باستاپ, دايىن ەتتى ساتۋعا دەيىنگى ارالىقتى قامتيدى. ءونىم الداعى ۋاقىتتا كەدەندىك وداق اۋماعى مەن الىس شەتەلگە ەكسپورتتالادى.
«ەكسپورتقا باعىتتالعان سوڭ «باتىس قىتاي-باتىس ەۋروپا» حالىقارالىق ءدالىزىنىڭ بويىن تاڭداپ وتىرمىز. بۇل جول رەسەيدىڭ ورىنبور وبلىسىنا تاۋار تاسىمالداۋعا مۇمكىندىك بەرەدى. قازىر جەر الۋ, نەسيە راسىمدەۋ جۇمىستارىن باستايمىز. ءبىز قالا ىشىنەن ەمەس, ءبىر اۋىل ماڭىنان فابريكا سالىپ, سول اۋىلدىڭ 200-دەن استام ادامىن جۇمىسپەن قامتۋدى جوسپارلاپ وتىرمىز»,- دەدى «روكوس» كومپانياسىنىڭ يننوۆاتسيالىق دامۋ دەپارتامەنتى باسشىسى ۆياچەسلاۆ شەكانوۆ.
جوبا قۇنى 50 ميلليون دوللار. فابريكا جىلىنا 20 مىڭنان 32 مىڭ تونناعا دەيىن قۇس ەتىن وندىرە الادى. مۇندا تۇتىنۋشىلارعا توڭازىتقىشتا مۇزعا اينالعان ەمەس, سالقىنداتىلعان قۇس ەتىن ساتۋعا مۇمكىندىك بار.
قازىرگى ۋاقىتتا وبلىس اكىمدىگى جوبالىق-سمەتالىق قۇجاتتاماعا ساي جەر بولۋگە ۋادە بەردى.