قازاقستاندا كوممەرتسيالىق اۆتوتەحنيكا پاركىنىڭ جاڭارۋى باستالدى. بۇل تۋرالى ءىى قازاقستاندىق حالىقارالىق اۆتوموبيل فورۋمىندا «استانا موتورس» كومپانياسىنىڭ ماركەتينگ جانە دامۋ جونىندەگى ديرەكتورى انار ماقەشەۆا ءمالىم ەتتى, دەپ حابارلايدى قازاقپارات.
«جالپى, 2016 جىلى تىركەلگەن كوممەرتسيالىق تەحنيكا اۆتوموبيلدەرىنىڭ سانى 100 مىڭنان استى. بۇل وتكەن جىلى تىركەلگەن جالپى كولەمنىڭ 13 پايىزىن قۇرايدى. زاڭدى تۇلعالارعا قايتا تىركەۋ 30 پايىزدى قامتىدى, ال جەكە تۇلعالارعا 70 پايىز تيەسىلى بولدى. ياعني, بۇرىن قولدانىستا بولعان اۆتوموبيلدەر دە اتالعان ستاتيستيكادا ەسكەرىلگەن. تىركەلگەن كولىكتەردىڭ 54 پايىزدان استامى 10 جىلدان اسقان اۆتوموبيلدەردى قامتىدى. سونىمەن قاتار, 3 جىلعا دەيىنگى كولىكتەردىڭ ۇلەسى 15 پايىزعا جەتكەندىگى قۋانتارلىق جاعداي. بۇل ءوز كەزەگىندە پارك بىرتىندەپ جاڭارىپ كەلە جاتقاندىعىن بايقاتادى. وسى ورايدا الداعى 10 جىلدا پاركتى جاڭارتۋعا باعىتتالعان ستراتەگيا جۇزەگە اسىرىلادى دەگەن ۇمىتتەمىز»,-دەدى ا. ماقاشەۆا.
بەلگىلى بولعانداي, قازىرگى كەزدە قازاقستاندا كوممەرتسيالىق اۆتوتەحنيكانىڭ 80 پايىزى 10 جىلدان اسقان اۆتوماشينالاردى قۇراپ وتىر. قولدانىس مەرزىمى 3 جىلعا دەيىنگى كولىكتەردىڭ ۇلەسى تەك قانا 3 پايىز. دەگەنمەن, جاڭا اۆتوموبيلدەردى تىركەۋ دەڭگەيى ارتىپ كەلە جاتقانىن ەسكەرە وتىرىپ, پاركتىڭ جاڭارۋى ءۇردىسى جوعارىلاي تۇسەتىنىن اتاپ وتۋگە بولادى.
كوممەرتسيالىق اۆتوتەحنيكا قاتارىنا اۆتوبۋستار, جۇك كولىكتەرى, جارتىلاي تىركەمەلەر, بورتتى پلاتفورمالار, فۋرگوندار, ەۆاكۋاتورلار, اۆتوتسيستەرنالار جانە ارنايى تەحنيكا كىرەدى.