بۇگىن ۇكىمەت وتىرىسىندا مەملەكەت باسشىسىنىڭ 14 اقپانداعى جارلىعىمەن بەكىتىلگەن اگروونەركاسىپتىك كەشەندى دامىتۋدىڭ 2017-2021 جىلدارعا ارنالعان باعدارلاماسىن جۇزەگە اسىرۋ جوسپارى قارالدى.
اتالعان باعدارلاما قازاقستان رەسپۋبليكاسى پرەزيدەنتىنىڭ 2016 جىلعى 9 قىركۇيەكتەگى ۇكىمەتتىڭ كەڭەيتىلگەن وتىرىسىندا بەرگەن تاپسىرماسى نەگىزىندە قازاقستان رەسپۋبليكاسىنىڭ اۋىل شارۋاشىلىعى مينيسترلىگى تاراپىنان ازىرلەندى, دەپ حابارلايدى ۆەدومستۆانىڭ ءباسپاسوز قىزمەتى.
ونىڭ ماقساتى – نارىقتاردا سۇرانىسقا يە, باسەكەگە قابىلەتتى اگروونەركاسىپتىك كەشەن ءونىمىن ءوندىرۋدى قامتاماسىز ەتۋ.
وسىنى باسا ايتقان قر اۋىل شارۋاشىلىعى ءمينيسترىنىڭ ءبىرىنشى ورىنباسارى ق.ايتۋعانوۆ مەملەكەتتىك باعدارلامانىڭ 8 مىندەتى بويىنشا 134 ءىس-شارانىڭ قاراستىرىلىپ وتىرعانىن جەتكىزدى.
«ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىندا كوپتەگەن پوزيتسيالار بويىنشا ءبىزدىڭ الەمدە ءىرى اگرارلىق ەكسپورتتىق ءونىم وندىرۋشىلەردىڭ ءبىرى بولا الاتىنىمىز اتاپ ءوتىلدى. اسىرەسە, بۇل ەكولوگيالىق تازا تاعامدارعا قاتىستى ايتىلدى. بۇل ءۇشىن ەڭ الدىمەن, شاعىن جانە ورتا شارۋاشىلىقتاردى كووپەراتسيالارعا كەڭىنەن تارتۋ كوزدەلۋدە», – دەپ اتاپ ءوتتى ۆيتسە-مينيستر.
سونداي-اق, جوسپار اياسىندا ىشكى نارىقتى تولتىرۋ مەن وتاندىق ءونىمنىڭ ەكسپورتتىق الەۋەتىن دامىتۋ, مەملەكەتتىك قولداۋدىڭ قارجىلىق شارالارىن ءتيىمدى پايدالانۋ, سۋ رەسۋرستارى مەن جەر رەسۋرستارىن ءتيىمدى پايدالانۋعا جاعداي جاساۋ, اۋىل شارۋاشىلىعى تەحنيكالارى مەن حيميالىق قۇرالدارمەن قامتاماسىز ەتۋدى ارتتىرۋ, اوك-ءتى عىلىمي-تەحنولوگيالىق, كادرلىق جانە اقپاراتتىق-ماركەتينگتىك قامتاماسىز ەتۋ جوسپارلانۋدا.
جالپىلاي العاندا, بۇلاردى ىسكە اسىرۋ ءۇشىن 2,4 ترلن. تەڭگە قاجەتتى. ونىڭ ىشىندە, رەسپۋبليكالىق بيۋدجەت ەسەبىنەن 1,2 ترلن. تەڭگە, جەرگىلىكتى بيۋدجەتتەن 852 ملرد. تەڭگە, ميكروقارجىلىق ۇيىمدار مەن شارۋاشىلىق سۋبەكتىلەرىنە 306 ملرد. تەڭگە قاراستىرىلعان.
ايتا كەتەيىك, جاڭا باعدارلاماعا كوزدەلگەن قاراجات وسى تاڭعا دەيىن بەكىتىلگەن رەسپۋبليكالىق بيۋدجەتتىڭ شەڭبەرىندە قاراستىرىلىپ وتىر. ياعني, ۇكىمەتتەن قوسىمشا قارجى تالاپ ەتپەيدى.
جوسپار جوباسىنىڭ قارجىلىق بولىگى 21 اقپاندا رەسپۋبليكالىق بيۋدجەت كوميسسياسىنىڭ وتىرىسىندا ماقۇلداندى.