رەسەيدە «سپورت-ەكسپرەسس» دەگەن تانىمال سپورت باسىلىمى بار. سول اقپارات قۇرالى جاقىندا جاس فۋتبولشى ەركەبۇلان سەيداحمەتتى «قازاقتىڭ مەسسيى» دەپ جازىپتى.
ەركەبۇلاندى اقپان ايىنىڭ باسىندا رەسەيدىڭ «زەنيت» فۋتبول كلۋبىنىڭ جاسوسپىرىمدەر قۇراماسىنا شاقىرعان ەدى. فۋتبولشى پيتەرلىك كوماندامەن بىرگە كيپردەگى وقۋ-جاتتىعۋ جيىندارىنا قاتىسىپ جاتىر.
«زەنيت» كومانداسى سەلەكتسيونەرلەرىنىڭ جاس قازاق فۋتبولشىسىنا كوزى تۇسەتىندەي ءجونى بار. وتكەن جىلى مولدوۆانىڭ تيراسپول قالاسىندا وتكەن «شەريف كۋبوگىندا» قازاقستان جاسوسپىرىمدەر قۇراماسى (U-17) «زەنيتپەن» 3:3 ەسەبىمەن تەڭ ويناعان ەدى. سول كەزدە سەيداحمەت ەكى گول سوعىپ, دۋبل جاسادى. ودان كەيىن گراناتكين مەموريالى تۋرنيرىندە ۇزدىك شابۋىلشى اتاندى. وسىدان كەيىن ەركەبۇلاننىڭ تالانتىنا پيتەرلىك كوماندا نازار اۋدارا باستاعان. ونى 19 جاسقا دەيىنگى قازاقستان جاسوسپىرىمدەر قۇراماسىنىڭ باس باپكەرى الەكساندر كۋزنەتسوۆ تا ايتقان ەدى.
– وقۋ-جاتتىعۋ جيىندارى كەرەمەت ءوتىپ جاتىر. بۇل جەردە بارلىعى كوڭىلىمنەن شىعادى. باپكەرلەر شتابى مەن فۋبولشىلار تاراپىنان قولداۋ بار. جاتتىعۋ بارىسىندا, اسىرەسە دوپپەن جۇمىس ىستەۋگە قاتتى ءمان بەرەمىز. دەڭگەي جاعىنان قازاقستان فۋتبولىنان ايىرماشىلىق ايتارلىقتاي بايقالادى. باپكەرلەر مەنى تەك شابۋىلشى رەتىندە ويناتىپ ءجۇر. «زەنيتتە» قالام با, جوق پا, ازىرگە بەلگىسىز. ءالى ناقتى شەشىم قابىلداعان جوقپىن, – دەيدى سەيداحمەتتىڭ ءوزى.
فيفا-نىڭ تالابى بويىنشا 18 جاسقا تولماعان فۋتبولشىمەن حالىقارالىق ترانسفەرگە تىيىم سالىنعان. ەركەبۇلان 4 اقپان كۇنى 17 جاسقا تولدى. ال 18 جاسقا تولۋ ءۇشىن ءالى ءبىر جىل كەرەك. فيفا كامەلەتتىك جاسقا تولماعان فۋتبولشىنىڭ وزگە ەلدىڭ كلۋبىمەن كەلىسىمشارت جاساۋىنا ءۇش جاعدايدا عانا رۇقسات ەتەدى. ءبىرىنشىسى – اتا-اناسى جۇمىس بارىسى بويىنشا نەمەسە باسقا دا سەبەپپەن سول ەلگە قونىس اۋدارسا. بىراق فۋتبولعا قاتىستى بولماۋ كەرەك. ەكىنشىسى – ەۋروپا وداعىنا مۇشە ەلدەردىڭ ءبىر ەكونوميكالىق ايماعىنا كىرگەن جاعدايدا. سونداي-اق, ءۇشىنشىدەن, اتا-اناسى تۇراتىن مەكەن كلۋب ورنالاسقان قالادان 100 شاقىرىم قاشىقتىقتان الىس بولماعاندا عانا رۇقسات بەرىلەدى.
«سپورت-ەكسپرەستىڭ» مالىمەتى بويىنشا, پيتەرلىك كوماندانىڭ ەركەبۇلاننىڭ ويىنىنا كوڭىلى تولادى ەكەن. جاقىندا «زەنيت» جاستارى كيپردە «لوكوموتيۆ» (ماسكەۋ) كلۋبىنىڭ جاسوسپىرىمدەر قۇراماسىمەن كەزدەسىپ, جەڭىسكە جەتتى. وسى ويىنداعى جالعىز گولدىڭ سوعىلۋىنا سەيداحمەتتىڭ قوسقان ۇلەسى زور. سەبەبى «لوكوموتيۆ» قورعاۋشىلارى ءوز ايىپ الاڭىندا قازاقستاندىق شابۋىلشىعا قارسى ءتارتىپ بۇزىپ, تورەشى پەنالتي بەلگىلەدى. ونى ك.كاپلەنكو مۇلتىكسىز ورىندادى. ءسويتىپ, يگور سيمۋتەنكوۆ جاتتىقتىراتىن «زەنيت» جەتكىنشىكتەرى جەڭىسكە جەتتى.
«زەنيتتىڭ» جاس فۋتبولشىعا كوڭىلى تولادى. بىراق حالىقارالىق تالاپقا سايكەس, كەلىسىمشارتقا وتىرا المايدى. سوندىقتان ەندى ول ۇيىنە قايتاتىن شىعار. وقيعا وسىلاي وربىگەن جاعدايدا جاس فۋتبولشى «تاراز» ساپىندا پرەمەر-ليگادا ونەر كورسەتۋى ءتيىس. ال «زەنيت» ونى ءجىتى باقىلاپ وتىرادى. كەلىسىمشارت ماسەلەسى ءبىر جىلدان كەيىن قايتا قوزعالۋى مۇمكىن. سونداي-اق, سەيداحمەتتىڭ 21 جاسقا دەيىن قازاقستان قۇراماسىنا شاقىرتۋ الۋى دا عاجاپ ەمەس», دەپ جازادى رەسەيلىك باسىلىم.
ەركەبۇلان سەيداحمەت 2000 جىلى تاراز قالاسىندا دۇنيەگە كەلگەن. سەگىز جاسىنان «مونتاجنيك» دەپ اتالاتىن اۋەسقوي كوماندادا فۋتبولدىڭ قىر-سىرىنا قانىعا باستاعان.
جوعارىدا ايتقانىمىزداي, «سپورت-ەكسپرەسس» سىندى بەدەلدى باسىلىم جاس فۋتبولشىعا «قازاقتىڭ مەسسيى» دەگەن باعا بەردى. مەسسيگە ۇقساتقاننان گورى قازاقتىڭ ەركەبۇلانى دەگەن ءالدەقايدا جاراسىمدى ەمەس پە؟! ەندەشە, وعان بولاشاقتا اياقدوپتىڭ قىر-سىرىن مەڭگەرگەن شەبەر فۋتبولشى بولۋعا ءبىز دە تىلەك قوسامىز.
بەك تولەۋوۆ,
جۋرناليست
استانا