ورتالىق ازياداعى ايماقتىق «Renal Reform International» وكىلدىگى (حالىقارالىق تۇرمە رەفورماسى) استانادا جۋرناليستەرگە ارنالعان ءباسپاسوز كونفەرەنتسياسىن وتكىزدى. «قازاقستانداعى تۇرمە رەفورماسى: ءۇمىت پەن شىندىق» تاقىرىبىندا ۇيىمداستىرىلعان شارا اياسىندا وتكەن جىلعى تۇرمە رەفورماسىنىڭ جاھاندىق ۇردىستەرى مەن ەلىمىزدەگى تۇزەۋ مەكەمەلەرىنىڭ ۇستاۋ جاعدايلارى, سوتتالعانداردىڭ ءدىني راديكالدانۋ ماسەلەلەرى مەن ولاردى قوعامعا قايتا بەيىمدەۋگە قاتىستى تۇيىندەردىڭ جاي-كۇيى تارقاتىلدى.
ايماقتىق «Renal Reform International» ديرەكتورى ازامات ءشامبىلوۆ جەتەكشىلىك ەتكەن جيىنعا مەملەكەتتىك مەكەمەلەردىڭ, ۇەۇ, حالىقارالىق ۇيىمدار مەن ديپلوماتيالىق ميسسيالاردىڭ وكىلدەرى قاتىسىپ, اشىق ۇنقاتىسۋ الاڭىندا پىكىر الماستى. الدىمەن ءسوز العان ايماقتىق «RRI» ديرەكتورى ا.ءشامبىلوۆ قازاقستاننىڭ تۇرمە رەيتينگىنە قاتىستى كورسەتكىشتەرى تۋرالى بىرقاتار دەرەكتەردى كولدەنەڭ تارتتى. ونىڭ ايتۋىنشا, سوڭعى جىلدارى ەلىمىزدىڭ ەكونوميكالىق باسەكەگە قابىلەتتىلىگى مەن ىشكى ساياسي جاعدايدىڭ تۇراقتىلىعى جانە ازاماتتىق قوعامنىڭ بەلسەندى دامۋىنىڭ ناتيجەسىندە, بۇل سالاداعى جاسالىپ جاتقان جۇمىستار الەم ەلدەرى الدىندا وتە جوعارى باعاعا يە بولعان كورىنەدى.
«بۇل رەتتە الدىمەن مەملەكەتتىڭ قىلمىستىق زاڭناماداعى گۋمانيستىك ساياساتتى جۇيەلى ءجۇرگىزۋى مەن وسى باعىتتاعى باعدارلامالىق جوسپارلاردىڭ ءساتتى ورىندالۋىن ەرەكشە اتاپ وتكەن ءجون. اسىرەسە, قازاقستاندا ازاماتتاردى قۇقىقتىق جاۋاپكەرشىلىككە تارتۋ نەمەسە باس بوستاندىعىنان ايىرۋدا ىزگىلەندىرىلگەن جازا ءتۇرى مەن بالامالى ادىستەردىڭ كەڭىنەن قولدانىلۋى كوپتەگەن ەل ءۇشىن ۇلگى الارلىقتاي دەڭگەيگە جەتۋى زور جەتىستىك رەتىندە قابىلدانۋدا», – دەدى ا.ءشامبىلوۆ.
سونىمەن قاتار, جيىن بارىسىندا 2015-2016 جىلدارداعى ازاپتاۋلار مەن ولار بويىنشا قوزعالعان ىستەر سانىنىڭ ستاتيستيكالىق دەرەكتەرى, قازاقستانداعى تۇرمە ستاتيستيكاسى مەن ونىڭ تالداۋ ماتەريالدارى ينفوگرافيكا رەتىندە ۇسىنىلىپ, جۇرتشىلىق نازارىنا «بوستاندىق جوق مەكەندەر» تاقىرىبىندا ارنايى فوتوكورمە ۇيىمداستىرىلدى.
نۇرلىبەك دوسىباي,
«ەگەمەن قازاقستان»