ءماجىلىس توراعاسىنىڭ ورىنباسارى ۆلاديمير بوجكونىڭ قاتىسۋىمەن, اگرارلىق ماسەلەلەر كوميتەتىنىڭ توراعاسى ساپارحان وماروۆتىڭ جەتەكشىلىگىندە «ورگانيكالىق ءونىم ءوندىرۋ تۋرالى» («100 ناقتى قادام» ۇلت جوسپارىنىڭ 60 جانە 61-قادامدارى شەڭبەرىندە) دەگەن تاقىرىپتا دوڭگەلەك ۇستەل ءوتتى.
دوڭگەلەك ۇستەل جۇمىسىنا دەپۋتاتتىق كورپۋستىڭ, ۋاكىلەتتى مەملەكەتتىك ورگانداردىڭ جاۋاپتى قىزمەتكەرلەرى, «اتامەكەن» ۇلتتىق كاسىپكەرلەر پالاتاسى, «KAZFOAM» ورگانيكالىق اۋىل شارۋاشىلىعى ءۇشىن قوزعالىسى قازاقستان فەدەراتسياسى, «ورگانيكالىق ەگىنشىلىك قۋىمداستىعى» رەسپۋبليكالىق قوعامدىق بىرلەستىگى, قازاقستان رەسپۋبليكاسى اگرارلىق-ونەركاسىپتىك كەشەنىنىڭ ەكونوميكاسى ءجانە اۋىلدىق اۋماقتاردى دامىتۋ عىلىمي-زەرتتەۋ ينستيتۋتى سياقتى ۇكىمەتتىك ەمەس سەكتوردىڭ وكىلدەرى, سونداي-اق ورگانيكالىق ءونىم وندىرۋشىلەرى قاتىستى.
«ورگانيكالىق ءونىم ءوندىرۋ تۋرالى» 2015 جىلعى 27 قاراشادا قابىلدانعان زاڭدى ىسكە اسىرۋعا باعىتتالعان مينيسترلىك قابىلداپ جاتقان شارالار تۋرالى نەگىزگى باياندامانى اۋىل شارۋاشىلىعى ۆيتسە-ءمينيسترى قايرات ايتۋعانوۆ جاسادى.
وكىنىشكە قاراي, بۇگىنگى تاڭدا سەرتيفيكاتتاۋ وتكىزۋ ءۇشىن مۇمكىندىك جوق. ستاندارتتاردى ازىرلەۋدەن باستاپ مامانداردى وقىتۋعا دەيىن – ونىڭ بارلىق جۇيەسىن جاساۋ قاجەت. اوك-ءتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى شەڭبەرىندە ءبىرقاتار ءىس-شارا اتقارۋ كوزدەلگەن», دەدى ۆيتسە-مينيستر.
اگرارلىق ماسەلەلەر كوميتەتىنىڭ مۇشەسى ايقىن قوڭىروۆ – ءوزىنىڭ قوسىمشا بايانداماسىندا وسى كەزەڭدە سالانى دامىتۋعا كەدەرگى كەلتىرەتىن نەگىزگى پروبلەمالىق ءماسەلەلەردى اتاپ ءوتتى. ودان باسقا, وتاندىق سالا ماماندارىنىڭ پىكىرلەرى تىڭدالدى, ولار دا پروبلەمالىق ساتتەردى بەلگىلەپ, ورگانيكالىق ءونىم ءوندىرۋ جانە ولاردىڭ اينالىمى سالاسىنداعى مىندەتتەردى شەشۋدەگى ءوز كوزقاراستارىن ۇسىندى.
دوڭگەلەك ۇستەل وتىرىسى بارىسىندا ءمۇددەلى مينيسترلىكتەر مەن ۆەدومستۆولاردىڭ وكىلدەرى ءسوز سويلەپ, قازاقستانداعى ورگانيكالىق ءونىم ءوندىرۋ جانە ولاردىڭ اينالىمى سالاسىنداعى وزەكتى ماسەلەلەر مۇقيات تالقىلاندى. ناتيجەسىندە وتىرىس قورىتىندىسى بويىنشا ۋاكىلەتتى ورگاندارعا ءتيىستى ۇسىنىستار جىبەرىلدى, دەپ حابارلادى ءماجىلىستىڭ ءباسپاسوز قىزمەتى.