جاقىندا سەمەيگە جول ءتۇسىپ, اباي قورىق-مۇراجايىن ارالاعاندا سونداعى ءبىر جادىگەردىڭ نازارىمدى وزىنە ەرەكشە اۋدارعانى بار. مۇراجايداعى «شىرايلى شىڭعىستاۋ» كورمەسىن تاماشالاعاندا سول بولمەنىڭ بۇرىشىندا, ءبىر قاراعاندا بايقالمايتىن ەلەۋسىز جەردە, جوعارىدا ۇيادا وتىرعان قۇس كوزگە ىستىق كورىندى.
سويتسەك, بۇل جاي قۇس ەمەس, ايگىلى شاكىر اقىننىڭ قارشىعاسى ەكەن. مۇنى بىزگە اباي مۇراجايىنىڭ ديرەكتورى بولات جۇنىسبەكوۆ ايتتى. 1991 جىلى ەلباسىنا اق باتاسىن بەرگەن اقىننىڭ ساياتشىلىقپەن شۇعىلدانعانى دا بەلگىلى. ابىز اقساقال قارشىعاسى ولگەننەن كەيىن ونىڭ ت ۇلىبىن ءوز قولىمەن جاساپ, ۇيىندە قالدىرعان ەكەن. بۇل جادىگەردى بىلتىر جەلتوقسان ايىندا اقىننىڭ قىزى سانا اپامىز مۇراجايعا اكەپ تاپسىرىپتى.
اقىن بۇل قارشىعانى قاي جىلدارى ۇستاعان؟ جالپى, باتاگوي قاريانىڭ قانشا قارشىعاسى بولعان؟ وسى جانە وزگە دە ساۋالدارىمىزعا جاۋاپ ىزدەپ, اباي اۋدانىنىڭ قۇندىزدى اۋىلىندا تۇراتىن, سونداعى شاكىر ابەنوۆ اتىنداعى مۇراجايدىڭ جەتەكشىسى, تەكتىنىڭ تۇياعى سانا شاكىرقىزىنا تەلەفون شالدىق.
– «جىگىتكە جەتپىس ونەر دە از» دەيدى عوي. شاكىر اتاڭ ايتۋلى اقىن عانا ەمەس, ءوزى اتبەگى, ءوزى قۇسبەگى, ءوزى اعاشتان ءتۇيىن تۇيگەن شەبەر ادام بولعان. جۇيرىك ات, قۇماي تازى ۇستاعان. اكەم قاراشا تۋا ساياتشىلىققا كەتەتىن. ءبىراز ۋاقىت ۇيدە بولمايتىن. قۇسبەگىلىگىنە كەلسەك, بۇل ونەردى وتكەن عاسىردىڭ 1972-1973 جىلدارىنان باستاپ جانىنا سەرىك ەتتى. كولەمباي الىمبەكوۆ دەگەن ءىنىسى ەكەۋى ءبىر ساياتشىلىققا بارعاندا قارشىعانىڭ ەركەگى مەن ۇرعاشىسىن الىپ كەلگەن ەكەن. جالپى, اكەم ءبىر ەمەس, بىرنەشە قارشىعا ۇستادى. ناقتى سانى ەسىمدە جوق. ال اباي مۇراجايىندا تۇرعان قارشىعا شاكىر اتاڭنىڭ ەڭ سوڭعى قارشىعاسى. اتى – كوكقۇس. قاتەلەسپەسەم, بۇل قۇس 1988 جىلى ءولدى. سول كەزدە اكەم ونى ءوز قولىمەن ت ۇلىپ قىلىپ جاساعان ەدى, – دەيدى اسىلدىڭ سىنىعى.
شاكىر اقىن قۇستاردى ەرەكشە جاقسى كورگەن ەكەن. قارشىعادان بولەك تىرنا مەن كەپتەرلەردى دە اسىراعان كورىنەدى. كەپتەرلەرى اشىققان كەزدە اقىننىڭ قوس يىعىنا قوناقتاپ وتىرادى ەكەن. سانا شاكىرقىزى اكەسىنىڭ بايگەدەن كەلگەن اتىنىڭ جۇلدەلەرىن كوپ بالالى انالارعا تاراتىپ بەرەتىن اتىمتاي جومارت مىنەزىن دە ساعىنىشپەن ەسكە الدى.
ازامات قاسىم, «ەگەمەن قازاقستان»
شىعىس قازاقستان وبلىسى
سۋرەتتى تۇسىرگەن اۆتور