جاپونيانىڭ ساپپورو قالاسىندا وتكەن VIII قىسقى ازيا ويىندارىندا ايبارىمىزدى اسپانداتقان قازاقستان ۇلتتىق قۇراماسى سپورتشىلارىنىڭ العاشقى لەگى ەلگە ورالدى. سپورتشىلارىمىزدى الماتى اۋەجايىنان جۇرت بولىپ جۇمىلا قارسى الدىق.
جانكۇيەرلەر اسىرەسە, كونكيمەن جۇگىرۋدەن ءۇشىنشى ورىندى ەنشىلەگەن فەدور مەزەنتسەۆتى, شاڭعىمەن تۇعىردان سەكىرۋ بويىنشا كۇمىس جۇلدە العان سابىرجان ءمۇمىنوۆ پەن كونستانتين سوكولەنكونى جانە حوككەيدەن ءۇشىنشى ورىن يەلەنگەن قىزدار قۇراماسىن ايرىقشا قۇرمەتپەن قارسى الدى. جۇلدەگەرلەر جاپونيا جەرىندەگى جارىس ءساتتى وتسە دە, ىشتە ءسال اتتەگەن-ايلارى بار ەكەنىن ايتىپ, كەلەسى جارىستاردا بۇل تۇعىردان دا بيىكتەن كورىنۋگە تالپىناتىنىن جەتكىزدى.
قىسقى ازيا ويىندارىنىڭ قولا جۇلدەگەرى فەدور مەزەنتسەۆ: «جارىس جوعارى دەڭگەيدە ءوتتى. جاپونيا مەن كورەيا ەلىنىڭ سپورتشىلارى ازيا اۋماعىندا عانا ەمەس جالپى الەمدىك دەڭگەيدەگى باسەكەلەردە دە ءبىزدىڭ باستى قارسىلاسىمىز. قولىمىزدان كەلگەنىن كورسەتۋگە تىرىسىپ باقتىق. دايىندىعىمىز دا تىڭعىلىقتى بولدى. ەڭبەگىمىزدى ەلەپ, اياعىمىزدى جەرگە تيگىزبەي قارسى العان وتانداستارىمىزعا ايتار العىسىمىز شەكسىز. ءالى تالاي جارىستاردا ەلىمىزدىڭ اتىن الەمگە تانىتامىز», دەپ اعىنان جارىلدى.
شاڭعىمەن تۇعىردان سەكىرۋ بويىنشا قازاقستان قۇراماسىنىڭ باس باپكەرى پاۆەل ۆاسيلەۆ: «باسىندا ءبىر مەدال الساق دەپ جوسپارلاعانبىز, بىراق قاتارىنان ءۇش مەدال جەڭىپ الدىق. بۇل ءبىز ءۇشىن وتە جاقسى ناتيجە. ارينە, جارىس قيىن بولدى. ويتكەنى, تورەشىلەر قۇرامىندا ءبىزدىڭ قازاقستاندىق وكىلدەر بولعان جوق. سوندىقتان, جاپونيالىق تورەشىلەر بىزگە تومەن بالل قويۋعا تىرىستى. دەگەنمەن, جىگىتتەر قاشىقتىق بويىنشا دا, تەحنيكالىق شەبەرلىك بويىنشا دا بارلىعىن جاقسى ورىنداپ ولارعا مۇمكىندىك قالدىرمادى», دەپ ءوز ويىن ورتاعا سالدى.
«جارىس ءوزىم ويلاعاننان دا ءساتتى ءوتتى. جۇلدە العان ساتتەگى كوڭىل كۇيىمدى جەتكىزە المايمىن. اۋا رايىنىڭ جايسىزدىعى ءسال قولايسىزدىق تۋعىزدى. جاپونيادا جەل كوپ تۇرادى ەكەن, ال بىزگە جەل ارقاشان كەدەرگى كەلتىرەدى. دەگەنمەن, ساتتىلىك جولداس بولدى دەپ ەسەپتەيمىن», دەيدى شاڭعىمەن تۇعىردان سەكىرۋ بويىنشا ازيادا ويىندارىنىڭ كۇمىس جۇلدەگەرى كونستانتين سوكولەنكو.
ەستەرىڭىزگە سالا كەتسەك VIII قىسقى ازيا ويىندارىندا قازاقستان ۇلتتىق قۇراماسى جالپى العاندا 32 مەدالمەن (9 التىن, 11 كۇمىس, 12 قولا) ءتورتىنشى ورىنعا تۇراقتاعان بولاتىن.
ارمان وكتيابر,
جۋرناليست
الماتى