بيىلدان باستاپ ى.التىنسارين وليمپياداسى حالىقارالىق دەڭگەيدە وتكىزىلەتىن بولادى. بۇل – قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ۇيىمداستىرۋمەن التى جىلدان بەرى مەكتەپ تۇلەكتەرى اراسىندا ءوتىپ جۇرگەن پاندىك وليمپيادا.
مەكتەپ بىتىرۋشىلەرگە تەگىن ءبىلىم گرانتتارىن ۇتىپ الۋعا مۇمكىندىك بەرەتىن بايقاۋ ەندى وزگەردى.
الدىمەن رەسپۋبليكالىق وليمپيادا وبلىستىق ءبىلىم باسقارمالارىمەن, اۋداندىق ءبىلىم بولىمدەرىمەن بىرلەسە وتىرىپ, الماتى وبلىسى بويىنشا الماتى, تالدىقورعان, جاركەنت قالالارىندا, كەگەن اۋىلدىق وكرۋگى, جامبىل وبلىسى بويىنشا تاراز قالاسى مەن قورداي اۋدانىندا, وڭتۇستىك قازاقستان وبلىسىنىڭ شىمكەنت, تۇركىستان, جەتىساي قالالارىندا, قىزىلوردا وبلىسى بويىنشا قىزىلوردا قالاسى مەن قازالى, جاڭاقورعان, قارماقشى اۋداندارىندا, شىعىس قازاقستان وبلىسى بويىنشا سەمەي قالاسىندا, قاراعاندى وبلىسى بويىنشا قاراعاندى قالاسىندا, باتىس قازاقستان بويىنشا اتىراۋ, ورال قالالارىندا ۇستىمىزدەگى جىلدىڭ 3 ناۋرىزىندا وتكىزىلەدى.
ال حالىقارالىق دەڭگەيدەگى ى.التىنسارين وليمپياداسى 17 ناۋرىزدا 5 مەملەكەتتە, ياعني وزبەكستان, قىرعىزستان, مونعوليا, قىتاي جانە رەسەي ەلدەرىندە وتەدى. قازىرگى ۋاقىتتا وليمپياداعا قاتىسۋعا تىلەك ءبىلدىرۋشى وقۋشىلاردى تىركەۋ جالعاسۋدا. ايتا كەتەيىك, نيەت ءبىلدىرۋشىلىر قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەسمي سايتىندا بەكىتىلگەن فورما بويىنشا ونلاين رەجىمىندە تىركەلە الادى جانە وليمپيادا تۋرالى تولىق ماعلۇمات قىزدار ۋنيۆەرسيتەتىنىڭ سايتىندا (www.kazmkpu.kz) ورنالاسقان.
بايقاۋ ادەتتەگىدەي سەگىز ءپان بويىنشا ەمەس, توعىز ءپان بويىنشا وتپەك. ماتەماتيكا ءپانى قوسىلعان. وليمپيادا جۇمىسىنىڭ ەڭ جوعارى كورسەتكىشى – 160 بالل.
وليمپيادانىڭ ءبىر ەرەكشەلىگى – وعان تەك قانا قىز بالالار قاتىسادى.
ماسەلەن وتكەن جىلى «ى.التىنسارين-2016» وليمپياداسىنا 3500-دەن اسا مەكتەپ ءبىتىرۋشى قاتىسىپ, 24 تۇلەك رەكتور گرانتىنا يە بولسا, 10 پايىزدىق جەڭىلدىككە 548 وقۋشى ىلىككەن ەدى.
ايناش ەسالي, «ەگەمەن قازاقستان».
الماتى