مەملەكەتتىك باعدارلامالار بويىنشا بەرىلەتىن تۇرعىن ۇيگە بايلانىستى دەپۋتاتتار قر پرەمەر-ءمينيسترى باقىتجان ساعىنتاۆتىڭ اتىنا كەزەكتى رەت دەپۋتاتتىق ساۋال جىبەردى. اتاپ ايتار بولساق, دەپۋتاتتار مەملەكەتتىك باعدارلامالار بويىنشا سالىنعان ءۇيدى بەرۋدەگى ادىلەتسىزدىكتەر, قىمباتتىعى مەن ساپاسىزدىعىن ايتتى.
"مەملەكەتتىك باعدارلامامەن ءۇي العان ازاماتتاردىڭ باسپانا ساپاسىنىڭ تومەن ەكەنىن ايتۋشىلار سانى كوبەيىپ كەلە جاتىر", - دەلىنگەن دەپۋتاتتىق ساۋالدا.
دەپۋتاتتاردىڭ ايتۋىنشا, قۇرىلىس سالۋعا پايدالانىلاتىن قۇرىلىس ماتەريالدارىنىڭ 70 پايىزى, كەيدى ءتىپتى ودان دا كوپ بولىگى قىتايدان اكەلىنەدى. بىراق بيلىك رەسمي تۇردە قۇرىلىس ماتەريالدارىنىڭ 80 پايىزى وتاندىق ءونىم ەكەنىن ايتادى. ءتىپتى, وتاندىق قۇرىلىس ماتەريالدارىنىڭ ءوزى ساپاسى مەن نومەنكلاتۋرا كولەمى سىن كوتەرمەيدى.
زاڭ شىعارۋشىلاردىڭ ايتۋىنشا, 12 جىلدان بەرى ميللياردتاعان تەڭگە قارجى بولىنگەنىمەن, حالىققا ءۇي ءالى دە جەتپەي جاتىر. 2016 جىلدىڭ 1 قاڭتارىنداعى جاعداي بويىنشا, ۇيگە مۇقتاج ازاماتتار سانى 2013 جىلعى كورسەتكىشپەن سالىستىرعاندا 248,9 پايىزعا كوبەيگەن.
وسىعان بايلانىستى ماجىلىسمەندەر ساعىنتاەۆتان مىنا نارسەلەردى سۇراپ وتىر:
1) قولجەتىمدى باسپانانى تاراتۋ كەزىندە اشىقتىقتى قامتاماسىز ەتۋ تەتىگىن دايىنداۋ;
2) شارشى مەتردىڭ باعاسىن ازايتۋ مەن قۇرىلىسقا ساپالى جانە ارزان وتاندىق ماتەريالداردى قولدانۋ;
3) تۇرعىن ءۇي ساپاسىن باقىلاۋدىڭ دۇرىس تەتىگىن قالىپتاستىرۋ;
4) قازاقستاندىق كاسىپورىنداردىڭ قۇرىلىس ماتەريالدارىن شىعارۋدا مەملەكەتتىك ستاندارت تالاپتارىن ارتتىرۋ;
5) نىسانداردى مەملەكەتتىك قابىلداۋ تەتىكتەرىن دايىنداۋ. بۇرىن مەملەكەتتىك قابىلداۋ كوميسسياسىندا 20 ادام جۇمىس ىستەسە, قازىر كوميسسيا 4 ادامنان تۇرادى. بۇل سالاداعى جەمقورلىققا جول اشىپ, باقىلاۋدىڭ ءتيىمدى ەمەستىگىن كورسەتۋدە;
6) مەملەكەتتىك باعدارلاما بويىنشا ءۇي سالاتىن كومپاگيالاردى ىرىكتەۋ تارتىپتەرىن قاتاڭداتۋ;
7) وڭىرلەردە قۇرىلىس نىساندارىنا ينجەنەرلىك-كوممۋنيكاتسيالىق ينفراقۇرىلىمنىڭ جوقتىعى ماسەلەسىن قاراۋ.