1999 جىلى يۋنەسكو-نىڭ باس كونفەرەنتسياسى جاريالاعان, سودان بەرى مادەني ارتەكتىلىكتى جاقىنداتىپ, كوپ ءتىل مەڭگەرۋگە سەپتىگىن تيگىزۋ ءۇشىن جىل سايىن اتالىپ وتەتىن حالىقارالىق انا ءتىلى كۇنىنە بايلانىستى الماتىداعى دوستىق ءۇيىندە بىرقاتار ءىس-شارا ۇيىمداستىرىلدى. باستى ماقساتى – قازاقستانداعى ەتنوس وكىلدەرىنىڭ لينگۆيستيكالىق ارالۋاندىعى مەن كوپتىلدىلىكتى ءجانە ولاردىڭ مادەني ءداستۇرىن قولداۋ.
«ءتىل بىرلىگى» دەپ اتالاتىن شاراعا قازاقستان حالقى اسسامبلەياسىنىڭ, قازاقستان جازۋشىلار وداعىنىڭ, رەسپۋبليكالىق جانە قالالىق ەتنومادەني بىرلەستىكتەردىڭ وكىلدەرى, شىعارماشىلىق زيالى قاۋىم وكىلدەرى, رەسپۋبليكالىق «مىڭ بالا» مادەني-اعارتۋشىلىق جوباسىنىڭ جەڭىمپازدارى قاتىستى. حالىقارالىق انا ءتىلى كۇنى اياسىنداعى شارا قاتىسۋشىلارىنىڭ الدىندا قازاقستان حالقى اسسامبلەياسى ءتوراعاسىنىڭ ورىنباسارى ل.پيتالەنكو, ادەبيەت جانە ونەر ينستيتۋتىنىڭ ديرەكتورى ۋ.قاليجانوۆ, حالىقارالىق «قازاق ءتىلى» قوعامىنىڭ توراعاسى ءو.ايتباەۆ, س.مۇقانوۆ پەن ع.مۇسىرەپوۆ مۇراجايلارىنىڭ ديرەكتورى ءا.قايىربەكوۆ, قوعام قايراتكەرى ا.وسمان, الماتى قالاسى تىلدەردى دامىتۋ باسقارماسىنىڭ ءبولىم جەتەكشىسى ب.قالىمبەت ءسوز سويلەپ, ءتىلدى مەڭگەرۋ مەن ءبىلۋدىڭ, قاسيەتى مەن ساقتاۋدىڭ ماڭىزى تۋرالى ايتتى.
«قوعامدىق كەلىسىم» رمم ديرەكتورىنىڭ ورىنباسارى ت.جاقيانوۆ رەسپۋبليكالىق «مىڭ بالا» مادەني-اعارتۋشىلىق جوباسىنىڭ اياسىندا وتكەن جىلى اتقارىلعان جۇمىستارعا ەسەپ بەرىپ, بيىلعى جىلى ورىندالۋى ءتيىس جوسپاردىڭ ماقساتى مەن مىندەتى تۋرالى اڭگىمەلەدى. «مىڭ بالا» جوباسىنىڭ 2016 جىلعى جەڭىمپازدارى مەن ولاردى دايىنداعان قازاق ءتىلى مەن ادەبيەتى ءپاندەرىنىڭ مۇعالىمدەرىن العىس حاتتارمەن ءجانە ەستەلىك سىيلىقتارمەن ماراپاتتادى. الماتى قالاسى بويىنشا جوبا جەڭىمپازى اتانعان تۋرالى مامەدوۆ ءوز سوزىندە وسكەلەڭ ۇرپاقتى مەملەكەتتىك ءتىلدى مەڭگەرۋگە شاقىردى ءجانە 2017 جىلعى «مىڭ بالا» جوباسىنىڭ باستالعانى ءجونىندە حابارلادى. سونداي-اق, ەتنومادەني ءبىرلەستىكتەردىڭ جاستارى ءوز تىلىندە ءتاۋەلسىزدىكتىڭ 25 جىلدىعىنا ارناعان اۆتورلىق ولەڭدەرىن وقىدى.
اياسىنا بىرنەشە شارانى قامتىعان حالىقارالىق انا ءتىلى كۇنىنە ارنالعان جيىننىڭ ءبىرى بەلگىلى جازۋشى-كينودراماتۋرگ سماعۇل ەلۋبايدىڭ ەتنومادەني بىرلەستىك جاستارىمەن وتكىزگەن كەزدەسۋى بولدى. س.ەلۋباي ءوزىنىڭ شىعارماشىلىق جولى تۋرالى اڭگىمەلەپ, ءتىلدىڭ ارقاسىندا عانا ادامدار ءوز ۇلتىنىڭ رۋحاني باي مۇراسىن ساقتاپ, دامىتا الاتىنىن ايتتى.
ءدال وسى كۇنى دوستىق ۇيىندە ەتنومادەني ءبىرلەستىك وكىلدەرىنىڭ قازاق ءتىلىن مەڭگەرۋ دەڭگەيىن «قازتەست» جۇيەسى بويىنشا انىقتايتىن دياگنوستيكالىق تەستىلەۋ جۇرگىزىلدى. شاراعا ءارتۇرلى ەتنومادەني بىرلەستىكتەن 170-تەن استام وكىل قاتىستى.
ايگۇل احانبايقىزى,
«ەگەمەن قازاقستان»
الماتى