ۇكىمەت ۇيىندە وتكەن ءباسپاسوز ءماسليحاتىندا اقپارات جانە كوممۋنيكاتسيالار ءمينيسترى داۋرەن اباەۆ باق وكىلدەرىنە «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا ناقتىلانعان مىندەتتەردىڭ ورىندالۋ بارىسىن بايانداپ, بيىل اتقارىلۋى ءتيىس جۇمىستاردىڭ جاي-كۇيىن ءسوز ەتتى.
مەملەكەت باسشىسىنىڭ جولداۋدا ايقىنداپ بەرگەن تاپسىرمالارىن جۇزەگە اسىرۋ ماقساتىندا مامىر ايىندا مينيسترلىك ماماندارى ۇكىمەتكە «تسيفرلىق قازاقستان» باعدارلاماسىنىڭ جوباسىن ەنگىزەدى دەپ جوسپارلانعانى بەلگىلى بولدى. باق وكىلدەرىنىڭ ساۋالدارىنا جاۋاپ بەرۋ بارىسىندا ۆەدومستۆو باسشىسى د.اباەۆ وسىلاي دەپ مالىمدەدى.
«پرەزيدەنتىمىز ەل ۇكىمەتىنە «تسيفرلىق قازاقستان» باعدارلاماسىن قابىلداۋدى تاپسىرعانىن بىلەسىزدەر. وسى ارقىلى قازاقستانداعى تسيفرلىق يندۋستريا مەن ءىت سالانى دامىتۋ ماسەلەلەرى ءبىرىڭعاي جولعا قويىلۋى ءتيىس. سول سەبەپتەن دە, ءبىز بۇگىنگى كۇنى بۇل باعىتتا ءۇلكەن جۇمىستار اتقارۋدامىز. اتاپ ايتقاندا, مەملەكەتتىك دەڭگەيدە ورىندالۋى كەرەك باعدارلامانىڭ جوباسىن ۇكىمەتكە الداعى مامىر ايىندا ۇسىنۋدى جوسپارلاپ وتىرمىز», – دەدى مينيستر.
سونىمەن قاتار, سالا ماماندارى وسى كۇندەرى 1300-گە جۋىق ەلدى مەكەندە وپتيكالىق-تالشىقتى جەلىمەن قامتاماسىز ەتۋ جوباسىن قولعا العان. مەملەكەتتىك-جەكەمەنشىك سەرىكتەستىگى اياسىندا 2020 جىلعا دەيىن جۇزەگە اسىرىلاتىن بۇل جوبا, ەلىمىزدىڭ 2 ميلليوننان استام حالقىنا كەڭ جولاقتى ينتەرنەتتى پايدالانۋ مۇمكىندىگىن بەرەدى دەپ كۇتىلۋدە.
جيىندا قازاقستان بويىنشا راديوجيىلىك ستانسالارىن ورناتۋ جۇمىسى دا ءساتتى ءجۇرىپ جاتقاندىعى ايتىلدى. «راديوجيىلىك ستانسالارىن سالۋ بەلگىلى ءبىر ۋاقىتتى قاجەت ەتەدى. ال جىل سوڭىنا قاراي شامامەن 200 ءراديوجيىلىك ستانسانى ورناتىپ ۇلگەرەمىز دەپ ۇمىتتەنەمىز. مىنە, سول كەزدە ۇيالى بايلانىس پەن موبيلدى ينتەرنەتتىڭ ساپاسى الدەقايدا جاقسارا تۇسەتىن بولادى. بۇل جوبا نەگىزىنەن جەلىلىك تاراتۋ جۇيەسىن ساندىق تەلە-راديوتاراتۋعا كوشىرۋ ناتيجەسىندە بوساعان جيىلىكتەردى ۇيالى وپەراتورعا بەرۋ ارقىلى ىسكە اسىرىلماق. وسىلايشا, ۇيالى بايلانىس وپەراتورلارى بايلانىس پەن ينتەرنەتتىڭ ساپاسىن ارتتىرادى دەپ جوسپارلانۋدا», – دەدى داۋرەن اسكەربەك ۇلى.
باق وكىلدەرى تاراپىنان مينيسترگە قويىلعان سۇراقتىڭ ءبىرى – جاقىن كۇندەرى كورەرمەنگە قايتا جول تارتاتىن «ەل ارنا» توڭىرەگىندە ءوربىدى. قوعام اراسىنداعى قىزۋ تالقىلانعان ارنانىڭ قايتا اشىلۋىنا قاتىستى مالىمدەمەسىندە مينيستر بىلاي دەدى.
«اتاۋىنىڭ ءوزى ەلدىڭ كوڭىلىنەن شىققان بۇل ارنانىڭ قايتا اشىلۋىنىڭ ەكى نەگىزگى مىندەتى بار. ارينە, بۇل تانىمدىق باعىتتاعى ارنا بولعاندىقتان, ونىڭ العاشقىسى – ءارتۇرلى تاقىرىپتارداعى قۇندىلىقتاردى دارىپتەيتىن دەرەكتى فيلمدەردى كورەرمەن نازارىنا ۇسىنۋ بولسا, ەكىنشىسى – حالىقتىڭ كوڭىلىنەن شىعىپ, كلاسسيكالىق دۇنيەلەرگە اينالعان كوركەم تۋىندىلارمەن قالىڭ بۇقارانى قاۋىشتىرۋ. سونىمەن قاتار, 1 ناۋرىزدان باستاپ ەلىمىزدە «Discovery Showcase» HD تەلەارناسى حابار تاراتا باستايدى جانە ول كەيىنىرەك قازاق تىلىنە وتەدى. وسى جەردە ەرەكشە اتاپ وتكىم كەلەتىنى, وسى ىسكە قوسىلاتىن قازاق تىلىندەگى نۇسقاسىنىڭ ءوزى پرايم-تايم ساتتەگى التى ساعاتتى قۇرايتىن بولادى», – دەدى د.اباەۆ.
بيىل استانادا ەكسپو-2017 حالىقارالىق كورمەسى وتەتىندىگى بارشامىزعا بەلگىلى. ەلباسى تاپسىرماسىنا وراي, ايتۋلى شارا ءوز مارەسىنە جەتكەننەن كەيىن, كورمە نىساندارىندا حالىقارالىق IT-ستارتاپتار تەحنوپاركىن قۇرۋ كوزدەلگەن. اتالعان مينيسترلىك وسى جوبانىڭ جۇزەگە اسىرىلۋىنا مۇددەلى بولىپ تابىلادى. سونداي-اق, بۇل ۆەدومستۆو مەملەكەتتىك ورگاندارمەن بىرلەسە وتىرىپ, مەملەكەتتىك قىزمەتتەردى مەيلىنشە «ازاماتتارعا ارنالعان ۇكىمەت» كورپوراتسياسىنا بەرۋدى ماقسات ەتىپ وتىر. ءناتيجەسىندە, جىل سوڭىنا دەيىن مەملەكەتتىك كورپوراتسيا ارقىلى كورسەتىلەتىن قىزمەتتىڭ ۇلەسىن 85 پايىزعا ۇلعايتۋ جوسپارلانۋدا.
نۇرلىبەك دوسىباي,
«ەگەمەن قازاقستان»