ۇلتتىق مۋزەيدە قازاقستان حالقى اسسامبلەياسىنىڭ ۇيىمداستىرۋىمەن «قوعامدىق كەلىسىمدى قامتاماسىز ەتۋدەگى مەدياتسيا ينستيتۋتىنىڭ ءرولى» اتتى حالىقارالىق ديسپۋت-فورۋم ءوتتى.
القالى جيىنعا قحا توراعانىڭ ورىنباسارى – حاتشىلىق مەڭگەرۋشىسى ەرالى توعجانوۆ, قحا مەدياتسيا كەڭەسىنىڭ ءتوراعاسى, پارلامەنت ءماجىلىسىنىڭ دەپۋتاتى باقىتجان ءابدىرايىم, رەسەي فەدەراتسياسى ۇلتتىق مەدياتورلار ۇيىمىنىڭ پرەزيدەنتى تسيسانا شامليكاشۆيلي, قازاقستان سۋديالار وداعىنىڭ توراعاسى مۇسابەك الىمبەكوۆ, سونىمەن قاتار, ەلىمىزدەگى دوستىق ۇيلەرى مەدياتسيا كابينەتتەرىنىڭ مەڭگەرۋشىلەرى, كاسىبي مەدياتورلار قاتىستى.
فورۋم بارىسىندا ەلىمىزدەگى ءبىتىمدەستىرۋ ينستيتۋتتارىنىڭ جاي-كۇيى مەن ولاردى دامىتۋ ماسەلەلەرى تالقىلاندى. قاتىسۋشىلار مەدياتسيانىڭ سوت جۇيەسىندەگى ءرولى, سوت ورگاندارىنىڭ مەدياتسيالىق قۇرىلىمدارمەن ءوزارا جۇمىسى تۋرالى وي ءبولىسىپ, پىكىر الماستى.
ە.توعجانوۆ اتاپ وتكەندەي, قوعامدىق كەلىسىم ءبىرتۇتاس ەلدىڭ, مەملەكەتتىڭ جانە ازاماتتىق قوعامنىڭ بارلىق ينستيتۋتتارىنىڭ باستى قاعيداسى بولۋعا ءتيىس. الەۋمەتتىك جانە قۇقىقتىق جانجالداردىڭ الدىن الۋ مەن شەشۋدىڭ ناقتى تەتىكتەرىن پايدالانۋدىڭ قوعامدىق كەلىسىمدى قالىپتاستىرۋداعى ءرولى وتە زور. قوعامدا تۋىنداعان داۋ-دامايلاردى سوتقا دەيىنگى شەشۋدە ءوزارا بىتىمگە كەلۋدىڭ باستى شارتى – مەدياتسيا راسىمدەرى.
– قازاقستاندا داۋلاردى شەشۋدە, قۇقىقتىق ساۋاتسىزدىقپەن كۇرەسۋدە, ازاماتتاردىڭ قۇقىقتىق ساناسىن دامىتۋدا ءار ازامات ءۇشىن ماڭىزدى ماسەلەلەردى سوت جانە اكىمشىلىك ورگاندارىنىڭ قاتىسۋىنسىز شەشۋ مۇمكىندىگىن بەرۋگە مەدياتسيا ايتارلىقتاي ىقپال ەتەدى. مەدياتسيا ءراسىمى قازاقستان حالقىنىڭ قوعامدىق كەلىسىمىن قامتاماسىز ەتۋ بويىنشا زاماناۋي ۇدەرىستەردىڭ اجىراماس بولىگى بولىپ تابىلادى, – دەدى ە.توعجانوۆ.
قوعامداعى تىنىشتىقتى ساقتاۋ – وتباسىنداعى تىنىشتىقتان باستالادى دەگەن قاعيدا بار. وكىنىشكە قاراي, ەلىمىزدە جاس وتباسىلاردا ۇرىس-كەرىس كوبەيىپ, اجىراسۋ كورسەتكىشى ارتىپ بارادى. رەسپۋبليكالىق دوستىق ءۇيى مەدياتسيا كابينەتىنىڭ مەڭگەرۋشىسى نۇرساۋلە ابدىقادىرقىزىنىڭ ايتۋىنشا, كاسىبي مامىلەگەرلەردىڭ قىزمەتىنە جۇگىنەتىندەردىڭ باسىم بولىگى وتباسىنداعى جانجالعا قاتىستى شەشىم ىزدەگەن جاندار ەكەن. ەڭبەك داۋىنا بايلانىستى تورەلىك ىزدەگەندەردىڭ دە قاتارى كوپ.
جيىننىڭ قورىتىندىسىندا ەلىمىزدە مەدياتسيانى دامىتۋ بويىنشا ناقتى ۇسىنىستار ازىرلەندى.
ارنۇر اسقار,
«ەگەمەن قازاقستان»