ساپپوروداعى ءساتتى كۇن ەكى التىن, ەكى كۇمىس جانە ءبىر قولا سىيلادى

ساپپوروداعى اق ازيادانىڭ التىنشى كۇنى قازاقستان ءۇشىن ولجالى بولدى. بۇل كۇنى قورجىنىمىزعا ەكى التىن, ەكى كۇمىس جانە ءبىر قولا مەدال ءتۇستى. ساتىمەن بولعان بۇل ىسكە بياتلونشىلارىمىز سۇبەلى ۇلەس قوستى. ون شاقىرىمدىق سپرينتەرلىك قاشىقتىقتا باق سىناعان يان ساۆيتسكي جەلدەن جۇيرىك شاڭعىشى عانا ەمەس, قۇرالايدى كوزگە اتقان مەرگەن دە ەكەندىگىن دالەلدەدى. ول بۇل بەلەستى 26 مينۋت 59,2 سەكۋندتا باعىندىردى. مارە سىزىعىن ەكىنشى بولىپ قيعان تاعى ءبىر جەرلەسىمىز ۆاسيلي پودكورىتوۆ نىسانا اتۋدا ەكى رەت ءمۇلت كەتىپ, سۋ جاڭا چەمپيوننان 15 سەكۋندقا قالىپ كەلدى. قولا جۇلدەگە جاپوندىق بياتلونشى ميكيتو تاچيزاكي (+20,2; ءبىر رەت ءمۇلت كەتتى) قول جەتكىزدى. ازيادا چەمپيونى يان ساۆيتسكي شىعىس قازاقستان وبلىسىنىڭ وكىلى. جاسى بيىل وتىزعا تولاتىن تاجىريبەلى سپورتشى. ۆانكۋۆەر-2010 وليمپياداسىنىڭ قاتىسۋشىسى. 2011 جىلعى ازيا ويىندارىنىڭ چەمپيونى (4ح7,5 كم ەستافەتاسى), 2014 جىلى الماتىدا وتكەن ازيا چەمپيوناتىنىڭ جەڭىمپازى (15 كم ماسس-ستارت). ساپپوروداعى ءۇشىنشى التىننىڭ يەگەرى كوشباسشى بياتلونشىمىز گالينا ۆيش­نەۆسكايا بولدى. قىزدار اراسىنداعى سپرين­تەرلىك سىندا ساڭلاق سپورتشى 20:32.6 مينۋت كورسەتكىشپەن جەڭىس تۇعىرىنىڭ ەڭ بيىك ساتىسىنا كوتەرىلدى. جارىس جولىنا گالي­نامەن تىزە قوسىپ شىققان تاعى ءبىر بيات­لونشىمىز الينا رايكوۆا (+50.6) قۇرا­مانىڭ قورجىنىنا قولا جۇلدە سالدى. ال بۇل سىنداعى كۇمىس مەدال قىتايلىق بياتلونشى يان جانعا (+24.2) بۇيىردى. ەسكە سالار بولساق, شىعىس قازاقستان وبلىسى­نىڭ 23 جاستاعى وكىلى گالينا ۆيشنەۆسكايا تاياۋدا عانا الماتىدا وتكەن XXVIII دۇنيەجۇزىلىك قىسقى ۋني­ۆەرسيادا دوداسىندا ەكى التىن, ءۇش كۇمىس مەدال­دى جەڭىپ العان بولاتىن. سونداي-اق, التىنشى جارىس كۇنىندە شاڭعىشى ەلەنا كولومينا دا ەرلەدى. ول بەس شاقىرىمدىق قاشىقتىقتى 15:02.8 مينۋتتا جۇگىرىپ ءوتىپ, كۇمىس جۇلدەگە يە بولدى. بۇل باسەكەدە ەلەنادان 6.7 سەكۋندقا وزىپ كەتكەن جاپون قىزى يۋكي كاباياشي چەمپيون اتاندى. كولومينا بۇدان بۇرىن 1,4 شاقىرىم­دىق قىسقا قاشىقتىقتا كۇمىس جانە 10 شاقى­رىمدىق جارىستا قولا جۇلدە العان بولاتىن. سونىمەن, قىسقى ازيا ويىندارىنداعى التى كۇندە العان جۇلدەلەرىمىزدىڭ سانى 12-گە جەتتى. ياعني, 3 ال­تىن, 4 كۇمىس جانە 5 قولا مەدال­مەن جال­پى­كو­ماندالىق ەسەپتە ءتورتىنشى ورىندا كەلەمىز. كوش باسىندا قورجىنىندا 45 مەدالى (14 التىن, 15 كۇمىس, 16 قولا) بار جاپونيا كەلەدى. ەكىنشى ورىنداعى وڭتۇستىك كورەيانىڭ ەنشىسىندە 34 جۇلدە (14, 12, 9) بار. ال ازىرگە ءۇشىنشى ساتىعا تابان تىرەگەن قىتاي قۇراماسى 18 (6, 6, 6) مەدال الىپ ۇلگەردى. قايرات ءابىلدينوۆ, «ەگەمەن قازاقستان» سۋرەتتەردى تۇسىرگەن دانيار مايلىباەۆ