قازاقستاننىڭ تاجىكستانداعى ەلشىسى نۇرلان سەيتىموۆ تاجىكستان رەسپۋبليكاسىنىڭ سىرتقى ىستەر ءمينيسترى سيرودجيددين اسلوۆپەن كەزدەستى, دەپ حابارلادى سىرتقى ىستەر مينيسترلىگىنىڭ ءباسپاسوز قىزمەتى.
كەزدەسۋ بارىسىندا تاجىكستان مەن قازاقستاننىڭ ەكىجاقتى جانە كوپجاقتى ىقپالداستىقتىعىنىڭ وزەكتى ماسەلەلەرى تالقىلاندى. قازاقستان ەلشىسى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ اتىنان تاجىكستان رەسپۋبليكاسىنىڭ پرەزيدەنتى ەمومالي راحموننىڭ اتىنا 2017 جىلعى 10-11 قىركۇيەكتە استانا قالاسىندا وتەتىن يسلام ىنتىماقتاستىعى ۇيىمىنىڭ ءبىلىم جانە تەحنولوگيالار جونىندەگى ءبىرىنشى سامميتىنە قاتىسۋ ءۇشىن شاقىرۋىن تابىس ەتتى.
ە. راحموننىڭ جۇمىس كەستەسى سامميتكە جەكە قاتىسۋعا مۇمكىندىك بەرەتىندىگىنە ءۇمىت ءبىلدىردى.
بۇدان كەيىن ەلشى ءمينيستردى قازاقستانداعى مەملەكەتتىك بيلىك اراسىنداعى وكىلەتتىكتەردى قايتا ءبولۋ ماسەلەلەرى بويىنشا حالىققا ۇندەۋ جانە «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋ مازمۇنىمەن تانىستىردى.
اتاپ ايتقاندا, الداعى رەفورمالاۋ بارىسىندا مەملەكەت باسشىسى ءوزىنىڭ 40-قا جۋىق وكىلەتتىلىكتەرىن پارلامەنت پەن ۇكىمەتكە بەرەتىنى اتالدى. پرەزيدەنت ءۇشىن جاڭا جاعدايلاردا ستراتەگيالىق مىندەتتەر, بيلىك بۇتاقتارى اراسىنداعى جوعارى تورەشى ءرولى باسىمدىق بولادى. سونىمەن بىرگە, پرەزيدەنت سىرتقى ساياسات, ۇلتتىق قاۋىپسىزدىك جانە ەلدىڭ قورعانىس سالاسىن قاداعالايدى. بۇل ورايدا پارلامەنت پەن ۇكىمەتتىڭ ءرولى ارتا تۇسەدى. سونداي-اق, جولداۋ اياسىندا مەملەكەت باسشىسى ەلدىڭ جاھاندىق باسەكەلەستىككە قابىلەتتىلىگىن قامتاماسىز ەتەتىن ەكونوميكالىق ءوسۋدىڭ جاڭا ۇلگىسىن جاساۋ مىندەتتەمەلەرىن قويدى.
سۇحبات سوڭىندا قازاقستاندىق ديپلومات س. اسلوۆقا كەزدەسۋ ءۇشىن العىسىن ءبىلدىرىپ, قازاقستان-تاجىكستان قارىم-قاتىناستارىن ستراتەگيالىق ارىپتەسىك رۋحىندا نىعايتۋ ىسىندەگى جەمىستى ىنتىماقتاستىققا دايىندىعىن جەتكىزدى.