استاناداعى "شۇبار" تۇرعىن ءۇي الابىنداعى جەر ۇيلەر استانانىڭ باس جوسپارىنا ساي كەلمەيدى. سول ءۇشىن بىرتىندەپ سۇرىلەدى. بۇل تۋرالى «استانا باس جوسپارى» عىلىمي-زەرتتەۋ جوبالاۋ ينستيتۋتىنىڭ سىناقتىق جوبالاۋ شەبەرحاناسى باسشىسى ۆاسيلي شەين مالىمدەدى, دەپ حابارلايدى tengrinews.kz.
"قازىرگى تاڭدا "شۇبار" شاعىن اۋدانى تولىعىمەن سالىنعان. ونداعى جەر ۇيلەر جالپى قۇرىلىس اۋماعىنىڭ ۇشتەن ءبىرىن الىپ جاتىر. بۇل استانانىڭ باس جوسپارىنا ساي كەلمەيدى. سوندىقتان الداعى ۋاقىتتا ينۆەستورلار تابىلىپ, ارنايى باعدارلاما قابىلدانىپ جاتسا بىرتىندەپ سۇرىلە باستايدى. بۇل ءبىر جىلدىڭ جۇمىسى ەمەس", - دەدى ۆاسيلي شەين.
ونىڭ ايتۋىنشا, قازىرگى تاڭدا مەكتەپ قۇرىلىسى سالىناتىن جەر تاڭدالىپ جاتىر. قاي جەرگە سالىناتىنى بەلگىسىز بولعاندىقتان, شاعىن اۋداننىڭ قاي ايماعى سۇرىلەتىنى بەلگىسىز.
شەيننىڭ ايتۋىنشا, استانا ساۋلەت جانە قالا قۇرىلىسى باسقارماسى كولىك تۇراعى بار كوپقاباتتى ۇيلەر مەن ىسكەرلىك ورتالىقتاردىڭ, بالاباقشا مەن وزگە دە نىسانداردىڭ قۇرىلىسى قولعا الىناتىن جەرلەردى انىقتادى.
"جەر ۇيلەردەن بولەك, شاعىن اۋداندا رەسەي-قازاقستان ۋنيۆەرسيتەتى, قوناقۇيلەر مەن دۇكەندەر دە بار. ولار سۇرىلمەيدى", - دەدى ۆاسيلي شەين.
ايتا كەتەيىك, كەشە "شۇبار" شاعىن اۋدانىنىڭ سۇرىلەتىنى تۋرالى اقپارات تاراعان ەدى.