كەشە ەلوردادا ەكسپو-2017 كورمەسىنە قاتىسۋشىلاردىڭ ءۇشىنشى جينالىسى جۇمىسىن باستادى. حالىقارالىق شارانىڭ باستى ءارى قورىتىندى وتىرىسىنا پرەمەر-ءمينيستردىڭ
ءبىرىنشى ورىنباسارى اسقار مامين قاتىسىپ, ءسوز سويلەدى. استانادا «بولاشاقتىڭ ەنەرگياسى» تاقىرىبىندا وتەتىن كورمەنىڭ ءمان-ماڭىزى مەن سالماعىنا توقتالعان ول باسقوسۋ تابىستى
كەلىسىمدەرگە, ورايلى ۋاعدالاستىقتارعا جەتكىزەتىنىنە سەنىم ءبىلدىردى.
جينالىس بارىسىندا حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەس ەكسپو-2017 كورمەسىنە ازىرلىك جۇمىستارىن جوعارى باعالادى. ءاسىرەسە, قازاقستان پرەزيدەنتى نۇرسۇلتان نازارباەۆتىڭ ۇلتتىق كومپانياعا كورمەدەن كەيىن ونىڭ نىساندارىن پايدالانۋ بويىنشا مىندەت جۇكتەگەنىن ەرەكشە اتاپ ءوتتى. بيۋرونىڭ باس حاتشىسى حالىقارالىق شارا كەزىندە ەلورداعا كەلەتىن شەتەلدىكتەردىڭ ۇلەسى ۇيىمداستىرۋشىلارعا بايلانىستى ەكەنىن ايتتى. «قىتايدا وتكەن بەسىنشى مامانداندىرىلعان كورمەگە كەلگەن شەت مەملەكەتتىكتەر 5-7 پايىزدى قۇراعان. ال ەۋروپاداعى وسىنداي شارالارعا اتسالىسقان تۋريستەردىڭ ۇلەسى 30 پايىزعا دەيىن جەتكەن ەدى. ويتكەنى, مەملەكەتتەر ءبىر-بىرىنە جاقىن, كولىك جاعى قولجەتىمدى. قازاقستانعا كەلەدى دەپ كۇتىلىپ وتىرعانى – 15 پايىز. بۇل شىندىققا ساي كەلەدى», دەدى ۆ.لوسسەرتالەس.
وتىرىستا «استانا ەكسپو» ۇك» اق باسقارما توراعاسى احمەتجان ەسىموۆ كورمە پاۆيلوندارى بىلتىرعى قاراشادان باستاپ ودان ءارى جابدىقتاۋ ءۇشىن حالىقارالىق قاتىسۋشىلارعا تاپسىرىلا باستاعانىن مالىمدەپ, وسى جۇمىستا بەلسەندىلىك تانىتۋعا شاقىردى. «پاۆيلوندارىن يەلەنگەن قاتىسۋشىلاردىڭ كوبى قۇرىلىس-مونتاج جۇمىستارىنا كىرىسىپ كەتتى. كورمەنىڭ باستالۋىنا 108 كۇن قالدى. سوندىقتان, قالعان قاتىسۋشىلاردى پاۆيلوندارىن دايىنداۋعا تەزىرەك كىرىسۋگە شاقىرامىز», دەگەن ا.ەسىموۆ قازاقستان ءوز تاراپىنان كورمەگە تولىق دايىن ەكەنىن جەتكىزدى.
«سوڭعى مالىمەتكە سايكەس, 115 مەملەكەت پەن 18 حالىقارالىق ۇيىم كورمەگە قاتىساتىندارىن راستادى. ولارعا ىڭعايلى بولۋ ءۇشىن ءتۇرلى باعىتتار بويىنشا ارنايى نۇسقاۋلىق ازىرلەنگەن. ودان بولەك, «ءبىر تەرەزە» قاعيداتى بويىنشا ۆيزالىق قولداۋ, سالىقتىق, بانكتىك, ساقتاندىرۋ جانە قازاقستان مەمورگاندارىنىڭ باسقا دا قىزمەتتەرى كورسەتىلەتىن بىرىڭعاي قىزمەت كورسەتۋ ورتالىعى ىسكە قوسىلعان. ۇلتتىق سەكتسيا كوميسسارلارى مەن ولاردىڭ وتباسىلارى, پاۆيلوننىڭ باسقا دا قىزمەتكەرلەرى ءۇشىن ەكسپو اۋماعىندا 1 374 پاتەرلى قالاشىق سالىندى. سونداي-اق, ءتىركەۋ رەسىمىن جەڭىلدەتىپ, ۋاقىت ۇنەمدەۋ ءۇشىن «اككرەديتاتسيا» ۇلتتىق ءجۇيەسى ەنگىزىلدى», دەدى كومپانيانىڭ باسقارما توراعاسى.
ءۇشىنشى جينالىستا ەكسپو-2017 كوميسسارى ءراپىل جوشىباەۆ كورمە اياسىندا وتەتىن حالىقارالىق شارالاردى ءاڭگىمەلەدى. «كورمە وتەتىن كەزەڭدە ۇيىمداستىرىلاتىن باسقوسۋلاردىڭ ءبىرى – شانحاي ىنتىماقتاستىق ۇيىمىنىڭ سامميتى. سونىمەن قاتار, ءبىز ەنەرگەتيكا جانە تۋريزم ماسەلەلەرى بويىنشا ءتۇرلى مينيسترلەر دەڭگەيىندەگى كەزدەسۋلەر وتكىزبەكپىز. حالىقارالىق ايەلدەر فورۋمى دا وتەدى. ال كورمە اياقتالۋعا جاقىنداعان تۇستا ەلىمىزدە العاش رەت يسلام ىنتىماقتاستىعى ۇيىمىنىڭ عىلىم جانە تەحنولوگيا جونىندەگى ءسامميتىن وتكىزەمىز», دەدى ر.جوشىباەۆ. كوميسساردىڭ ايتۋىنشا, كورمە كەزىندە قاتىسۋشى مەملەكەتتەردىڭ ۇلتتىق كۇندەرى, ءتۇرلى ءمادەني-تانىمدىق, تاقىرىپتىق ءجانە سپورتتىق شارالار دا كوپتەپ ۇيىمداستىرىلادى.
ەكسپو-2017 كورمەسىنە ازىرلىك شارالارى تۋرالى استانا قالاسى اكىمى اسەت يسەكەشەۆ جالعاستىردى. «بيىلعى جىلدىڭ مامىر ايىندا ەكى بىردەي نىسان پايدالانۋعا بەرىلەدى. استانا حالىقارالىق اۋەجايىندا جاڭا تەرمينالدىڭ قۇرىلىسى اياقتالادى. ناتيجەسىندە جولاۋشىلاردى وتكىزۋ مۇمكىندىگى 7,6 ميلليونعا دەيىن ارتادى», دەگەن قالا باسشىسى بۇل جاعداي تۋريستەردىڭ تىركەۋدەن كەدەرگىسىز وتۋىنە مۇمكىندىك بەرەتىنىن ايتتى. «سونداي-اق, جاڭا تەمىر جول ۆوكزالى ەل يگىلىگىنە بەرىلەدى. بۇل نىسان جىلىنا 9 ميلليون ادامعا دەيىن قىزمەت كورسەتە الادى. ول قازاقستاننىڭ بارلىق ايماعى مەن تاياۋ شەت مەملەكەتتەردەن كەلەتىن تۋريستەردىڭ شاراعا ەمىن-ەركىن قاتىسۋىنا قولايلى جاعداي جاسايدى», دەدى ءا.يسەكەشەۆ.
اكىم كورمە قوناقتارىن ورنالاستىرۋعا قاتىستى ماسەلەلەردى دە جەتكىزدى. «قازىرگى ۋاقىتتا ەلوردادا 169 قوناق ءۇي مەن 36 حوستەل جۇمىس ىستەيدى. بۇعان قوسا, كورمە باستالار الدىندا تاعى 16 قوناق ءۇي كەشەنى اشىلادى. بۇدان بولەك, جالدامالى باسپانالاردى تارتۋ جۇمىستارى قارقىندى جۇرۋدە. جالپى, كەمىندە 35 مىڭ ورىن دايىنداۋ جوسپارلانۋدا», دەدى قالا باسشىسى. ونىڭ مالىمەتىنشە, استانا ەكسپو قوناقتارى ءۇشىن قاۋىپسىز ءارى جايلى قالا بولادى. سەبەبى, قاۋىپسىزدىكتى قامتاماسىز ەتۋ ماسەلەسىنە ايرىقشا نازار اۋدارىلعان. شاراعا 9 مىڭعا جۋىق پوليتسيا قىزمەتكەرى تارتىلادى, قالا اۋماعىندا شامامەن 3 مىڭ كامەرا ورناتىلادى. كوپشىلىكتى قوعامدىق كولىكپەن قامتاماسىز ەتۋ ءۇشىن 380 جاڭا اۆتوبۋس ساتىپ الىنباق.
اسحات رايقۇل,
«ەگەمەن قازاقستان»