پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ ءتورايىمى داريعا نازارباەۆا ەۋروپالىق وداقتىڭ قازاقستان رەسپۋبليكاسىنداعى وكىلدىگىنىڭ باسشىسى ترايان حريستەامەن كەزدەستى, دەپ حابارلادى سەناتتىڭ ءباسپاسوز قىزمەتى.
سەناتور ەۋروپالىق وداقپەن قارىم-قاتىناس قازاقستاننىڭ سىرتقى ساياساتىنىڭ ستراتەگيالىق باعىتتارىنىڭ ءبىرى ەكەنىن اتاپ ءوتتى. د.نازارباەۆا قازاقستان مەن ەۋروپالىق وداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى جاڭا كەلىسىمدى ءتيىمدى ىسكە اسىرۋ ەكىجاقتى ىنتىماقتاستىقتىڭ باسىمدىققا يە ءماسەلەلەرىنىڭ ءبىرى ەكەنىن جەتكىزدى.
«ءبىز جاڭا قۇجاتتىڭ بارلىق الەۋەتىن تەزىرەك ءىسكە اسىرۋعا مۇددەلىمىز. ەۋرووداق ەلدەرىنىڭ ۇلتتىق پارلامەنتتەرىندە راتيفيكاتسيالاۋ جانە ونى ەۋروپا پارلامەنتىندە قاراۋ ۇزاققا سوزىلمايدى دەپ سەنەمىز», دەدى سەناتور. قازىرگى كەزدە قۇجاتتى ەۋروپالىق وداققا مۇشە 8 مەملەكەت راتيفيكاتسيالاپتى.
ت.حريستەا قازاقستان ەۋروپالىق وداقتىڭ ورتالىق ازياداعى ەڭ ماڭىزدى ءارىپتەسى ەكەنىن ايتا كەلىپ, ءوزارا ءتيىمدى ىنتىماقتاستىقتى نىعايتۋدا پارلامەنتتىك ديپلوماتيانىڭ رولىنە توقتالدى.
تاراپتار, سونداي-اق, ءمادەني-گۋمانيتارلىق سالاداعى ءوزارا ءىس-قيمىل ءماسەلەلەرىن دە تالقىلادى. ەۋروپالىق وداق وكىلدىگىنىڭ باسشىسى ەۋروپانىڭ 5 مىڭنان استام ۋنيۆەرسيتەتى قازاقستاننىڭ جوعارى وقۋ ورىندارىمەن ىنتىماقتاسۋعا ءازىر ەكەنىن, قازاقستاننىڭ 15 جوعارى وقۋ ورنى ستۋدەنتتەر الماسۋ باعدارلاماسى بويىنشا ەۋروپالىق وداق ەلدەرىنە ستۋدەنتتەر جىبەرگەنىن جەتكىزدى.
قىتاي حالىق رەسپۋبليكاسىنىڭ ەلشىسى چجان حانحۋەيمەن كەزدەسۋدە قازاقستان مەن قىتاي اراسىنداعى ىنتىماقتاستىقتى كەڭەيتۋدىڭ كەلەشەگى تالقىلاندى.
ەلشى قىتاي ءۇشىن قازاقستان «تاماشا دوس, ىزگىلىكتى كورشى جانە سەنىمدى ءارىپتەس» ەكەنىن اتاپ ءوتتى. ول سەناتوردى ەلدەرىمىزدىڭ 25 جىلدىق ىنتىماقتاستىقتا قول جەتكىزگەن تابىستارى تۋرالى حاباردار ەتتى. «ءبىزدىڭ ەلىمىز قازاقستاننىڭ بەيبىتشىلىكتى, تۇراقتىلىقتى قولداۋ جانە حالىقتىڭ ءال-اۋقاتىن ارتتىرۋ جونىندەگى ساياسي جانە ەكونوميكالىق رەفورمالارىن قولدايدى», دەدى ديپلومات.
د.نازارباەۆا قازاقستان مەن قىتاي حالىقتارىنىڭ يگىلىگى ءۇشىن ءوزارا ءتيىمدى ءىس-قيمىلدى ۇدەتۋ قاجەتتىگىن اتاپ ءوتتى.
چ.حانحۋەي بيىلعى جىلدىڭ حالىقارالىق شارالار تۇرعىسىنان وتە مازمۇندى ەكەنىنە دە توقتالدى. ءۇستىمىزدەگى جىلى استانادا شىۇ-عا مۇشە ەلدەر مەملەكەت باسشىلارىنىڭ ءسامميتى وتەدى, سونداي-اق, ەكسپو-2017 حالىقارالىق كورمەسى اشىلادى ءجانە وعان قحر توراعاسى سي تسزينپيننىڭ قاتىسۋى كۇتىلىپ وتىر, دەدى ديپلومات.