جاپونيانىڭ ساپپورو قالاسىندا ءوتىپ جاتقان VIII قىسقى ازيا ويىندارىندا حوككەيدەن قازاقستان قۇراماسى وڭتۇستىك كورەيامەن كەزدەسىپ, 4:0 ەسەبىمەن جەڭىسكە جەتتى.
تورەشىنىڭ ىسقىرىعى ەستىلىسىمەن العا ۇمتىلعان قوس كوماندا گول سالاتىن بىرقاتار قاۋىپتى شابۋىل ۇيىمداستىرعان. الايدا, بۇل كەزەڭدە ەسەپ وزگەرىسسىز قالدى.
كەزدەسۋدىڭ ەكىنشى بولىگىندە جەرلەستەرىمىزدىڭ مەرەيى ۇستەم بولدى. 34-مينۋتتا ويىنشى باسىمدىعىن ءتيىمدى پايدالانىپ, العا شىقتى. بۇل تۇستا ماكسيم ۆولكوۆ مەرگەندىگىمەن تانىلدى. ارادا ەكى مينۋت وتەر-وتپەس نيكيتا ميحايليس باسىمدىقتى ارتتىرا ءتۇستى.
سوڭعى 20 مينۋتتا سەرگەي ستارىگين شاكىرتتەرى جۇيەلى ويناپ, قورعانىستا ساق قيمىلدادى. ناتيجەسىندە, 47-مينۋتتا نۇرسۇلتان بەلگىباەۆتىڭ كومەگىمەن ءۇشىنشى شايبانى سالسا, 54-مينۋتتا كونستانتين ساۆەنكوۆ ماتچتاعى سوڭعى گولدىڭ اۆتورى اتاندى.
قازاقستان قۇراماسى كەلەسى ويىنىن 24 اقپاندا قىتاي قۇراماسىمەن وتكىزەدى.